Surykaŭ: Suvierenitet pavinny abaraniać pracoŭnyja miescy i zarpłaty, a nie «ledź dychajučyja zavody»
Rasijski pasoł Alaksandr Surykaŭ nazvaŭ pryčynaj krachu intehracyjnych pramysłovych prajektaŭ Biełarusi i Rasii čałaviečyja ambicyi. Pra heta Surykaŭ zajaviŭ žurnalistam 31 sakavika.
Kamientujučy infarmacyju pra toje, što kancern «Ałmaz-Antej» — vytvorca zienitna-rakietnych sistem S-400 «Tryumf» — hatovy całkam admovicca ad zakupki pradukcyi Minskaha zavoda kołavych ciahačoŭ na karyść anałahičnaj techniki Branskaha aŭtamabilnaha zavoda, rasijski pasoł adznačyŭ, što vinoj usiamu ambicyi. Ale nie skazaŭ, čyje.
«U śviecie rastuć transnacyjanalnyja kampanii, zavajoŭvajuć rynki, sił u ich pabolš. Niekalki hadoŭ abmiarkoŭvali sumiesnaje pradpryjemstva — dla abjadnańnia namahańniaŭ, vytvorčaści šasi. Rašeńnia pakul nie pryniata. Značyć, pačynajuć krucicca vytvorcy rakiet — «my možam pazbavicca šasi, kali što». Jany pačynajuć rabić svajo», - rastłumačyŭ jon rašeńnie rasijskaha kancernu.
Surykaŭ ličyć, što Biełarusi i Rasii treba maksimalna iści na abjadnańnie pradpryjemstvaŭ. Pry hetym treba ŭličvać, dzie jość pradpryjemstvy, jakija pracujuć u anałahičnych abłaściach — aŭtakampanienty, abstalavańnie i h.d. Na jaho dumku, patrebnyja adzinyja ahulnyja vytvorcy, pakolki ciapier na našych rynkach bolš za pałovu pradukcyi — trecich krain.
«Niama vytvorcaŭ hruzavikoŭ, jakija vypuskajuć mienš 100 tysiač aŭtamabilaŭ. KamAZ — 50 tysiač, MAZ — 30 tysiač: jak im kankuravać? U zamiežnych vytvorcaŭ bolš vytvorčych mahčymaściaŭ, u tym liku inavacyjnych — čaho čakać? MAZ budzie tam, dzie češskaja Tatra paśla stvareńnia ES — nidzie. KamAZ, mahčyma, tam ža. Užo pałovu rynku Kitaj zajmaje!» — adznačyŭ rasijski pasoł.
Alaksandr Surykaŭ padkreśliŭ, što tolki abjadnańnie pradpryjemstvaŭ daść mahčymaść «vyciskać z rynku inšych».
«Nichto nie pieraškadžaje, akramia našych čałaviečych ambicyj. Nie budu kazać - čyich. A heta było b na karyść narodu. Treba vyjści ŭsio ž taki na intehracyjny praces, kab pradukcyja była ahulnaja i abaraniałasia našymi rynkami. I plunuć na ambicyi», - skazaŭ jon.
Rasijski pasoł taksama adznačyŭ: suvierenitet i niezaležnaść pavinny abaraniacca inviestycyjami, pracoŭnymi miescami, zarobkami, a nie «ledź dychajučymi zavodami».
«Nie varta tracić hrošy na stvareńnie lišnich vytvorčaściaŭ — a sieści i padumać ab nastupnym kroku: ad kaapieracyi da hłybiejšych pracesaŭ», — zajaviŭ pasoł.
***
Nahadajem, jak paviedamlali «Iźviestija», kancern «Ałmaz-Antej» — vytvorca zienitna-rakietnych sistem S-400 «Tryumf» — hatovy całkam admovicca ad zakupki pradukcyi Minskaha zavoda kołavych ciahačoŭ na karyść anałahičnaj techniki Branskaha aŭtamabilnaha zavoda, jaki kancern niadaŭna kupiŭ. Aficyjnaja pryčyna pierachodu na rasijskija ciahačy — rezki rost unutranaj i vonkavaj zamovy na kompleksy S-400.
Vosieńniu minułaha hoda Minabarony staviła zadaču pa pieravodzie sistem uzbrajeńniaŭ rasijskaj armii na šasi ajčynnaj vytvorčaści. Papiarednie byŭ abrany Branski aŭtamabilny zavod, kudy płanavałasia pierakinuć z MZKC bolšuju častku zakazaŭ na śpiecyjalnyja kołavyja šasi, pierš za ŭsio dla takich sistem, jak «Iskander» i RSZA.
Kamientary