Jak i kamu pryjdziecca płacić pošlinu na zamiežnyja pasyłki?

Z 14 krasavika pačnuć dziejničać novyja praviły ŭ adnosinach da zamiežnych pakupak. Śpiecyjalisty Dziaržaŭnaha mytnaha kamiteta padrabiazna adkazali na pytańni čytačoŭ FINANCE.TUT.BY pra limity na pasyłki z-za miažy.

Z 14 krasavika limity na mižnarodnyja pasyłki dla asabistaha karystańnia pamienšacca: maksimalnaja suma zakazu składzie nie bolš za 22 jeŭra i vaha nie bolš za 10 kiłahramaŭ. Siońnia biełarusy mohuć biaspošlinna atrymlivać z-za miažy pasyłki dla asabistaha karystańnia na sumu da 200 jeŭra na miesiac (niezaležna ad kolkaści pakupak) i vahoj da 31 kiłahrama.

Kali hety abjom pieravyšany, to treba płacić uvaznuju mytnuju pošlinu z sumy pieravyšeńnia i mytny zbor.

Što budzie z pasyłkami, jakija byli zamoŭlenyja da 14 krasavika?

Pytańnie: Ci možna zakazvać niekalki pasyłak na miesiac na adnaho čałavieka, kab u sukupnaści atrymałasia nie bolš za 22 jeŭra ŭ miesiac, ci možna budzie tolki adnu pasyłku zakazvać?

— Biaspošlinny limit pa koštu (22 jeŭra), a taksama vazie (10 kh) aznačaje sumarnuju vieličyniu ŭsich mižnarodnych paštovych adpraŭleńniaŭ (MPA) za kalandarny miesiac. Inakš kažučy, u ramkach nazvanych normaŭ možna ŭvieźci niekalki pasyłak.

Pytańnie: U jaki momant budzie ličycca, što pasyłka pastupiła z-za miažy — u momant pastupleńnia na mytniu abo na poštu? Bo heta, byvaje, zusim roznyja terminy. I atrymać na pošcie možna adnačasova tavar, zamoŭleny ŭ rozny pieryjad, i nie ŭkłaścisia ŭ limit, choć kožnaja asobnaja pasyłka jaho nie pieravyšała.

— Mytnymi orhanami prymajecca pad uvahu data rehistracyi pasyłki na składzie časovaha zachoŭvańnia. Ukazanaja data nie moža być źmienienaja. U adpaviednaści z punktam 4 artykuła 160 MK MS pasyłki źmiaščajucca na časovaje zachoŭvańnie na praciahu 3 hadzin paśla ich pradjaŭleńnia mytnamu orhanu paśla prybyćcia ŭ miesca (ustanovu) mižnarodnaha paštovaha abmienu.

Pytańnie: Ci buduć naličvacca pošliny na pasyłki, jakija byli adpraŭlenyja, naprykład, u sakaviku, ale pryjduć paśla 14 krasavika?

— Tak, buduć, kali mytny košt tavaraŭ u pasyłcy pieravyšaje ŭstanoŭlenyja normy biaspošlinnaha ŭvozu — 22 jeŭra.

Pytańnie: Zamoŭlena try pasyłki, ich košt 22 jeŭra, 5 jeŭra i 1 jeŭra adpaviedna. Usie pasyłki prychodziać u rozny čas, ale ŭ adzin miesiac. Pasyłku koštam 22 jeŭra zabirajem biez prablem. Što budzie z astatnimi? Jakija pošliny i zbory pryjdziecca apłacić pry atrymańni astatnich dźviuch? Kankretna cikavić pytańnie z mytnym zboram ŭ 5 jeŭra i apłataj pasłuh pošty.

— Vykažam zdahadku, što ahulnaja vaha troch pasyłak da 10 kh. Paśla biaspošlinnaj vydačy pasyłki koštam 22 jeŭra za nastupnyja pasyłki, jakija pastupili ŭ adras toj ža fizičnaj asoby, treba vypłacić mytnyja pošliny i mytny zbor za ažyćciaŭleńnie mytnych apieracyj za kožnuju pasyłku.

U dačynieńni da druhoha mižnarodnaha paštovaha adpraŭleńnia treba vypłacić mytnyja płaciažy ŭ pamiery kala 6,5 jeŭra: 5 jeŭra (mytny košt tavaraŭ) ch 30% + 5 jeŭra (mytny zbor). Suma mytnych płaciažoŭ u dačynieńni da treciaj pasyłki składzie kala 5,3 jeŭra: 1 jeŭra ch 30% + 5 jeŭra (mytny zbor).

Pytańnie: Da ŭstupleńnia ŭkaza ŭ siłu 5 krasavika ja atrymaŭ mižnarodnaje paštovaje adpraŭleńnie na sumu 30 jeŭra. Pa raniejšych praviłach vypłačvać pošlinu nie treba. A paśla 14 čysła ŭ krasaviku mnie pryjdzie jašče adno MPA koštam 10 jeŭra. Ci budzie na jaho naličana pošlina? Zakon nie moža mieć zvarotnuju siłu i MPA, atrymanyja da 14-ha krasavika, nie pavinny ŭličvacca ŭ sumu 22 jeŭra.

— Padpunktam 1.1 punkta 1 ukaza № 360 praduhledžana, što pieryjadam ŭliku faktaŭ pierasyłki fizičnaj asobie tavaraŭ dla asabistaha karystańnia źjaŭlajecca kalandarny miesiac. Dadzieny padychod nie byŭ źmienieny ukazam № 40.

U nazvanaj situacyi da momantu ŭstupleńnia ŭ siłu ŭkaza № 40 vy ŭžo atrymali ŭ krasaviku tavary na sumu 30 jeŭra. Takim čynam, paśla ŭstupleńnia ŭ siłu ŭkaza № 40 vami ŭžo była vykarystanaja za krasavik miesiačnaja norma ŭ 22 jeŭra i 10 kh.

«Sam ničoha nie kuplaŭ, svajaki dasłali padarunak»

Pytańnie: Jak buduć abkładacca pošlinami, padatkami pasyłki (padarunki) z-za miažy (u našym vypadku z ZŠA) ad blizkich svajakoŭ? Na jakuju sumu jany zmohuć vysyłać nam padarunki i jak časta?

— Jakich-niebudź asablivaściaŭ (asobych norm) pa pierasyłcy nazvanaj katehoryi tavaraŭ (padarunkaŭ) ŭkazam № 40 nie ŭstanoŭlena.

Pytańnie: Maje baćki žyvuć u ZŠA, vyjhrali Green Card, dasyłajuć mnie pasyłku (vopratku, posud i da t.p.), košt rečaŭ nidzie nie paznačany. Ci treba mnie płacić pošlinu, bo ja ž sam ničoha nie kuplaŭ, valuta z krainy nie vyvoziłasia?

— Tak, u vypadku pieravyšeńnia normaŭ, ustanoŭlenych ukazam №40. U adpaviednaści z častkaj druhoj punkta 1 artykuła 316 MK MS padlik sum mytnych pošlin, padatkaŭ adbyvajecca na padstavie źviestak pra košt tavaraŭ, ukazanych u dakumientach, jakija praduhledžanyja aktami Suśvietnaha paštovaha sajuza i vykarystoŭvajucca ŭ mytnych metach.

U toj ža čas, u adpaviednaści z punktam 2 artykuła 361 MK MS u vypadku adsutnaści ŭ fizičnaj asoby, jakaja pieramiaščaje tavary dla asabistaha karystańnia, aryhinałaŭ dakumientaŭ, jakija paćviardžajuć źviestki pra košt padarunku, i najaŭnaści ŭ mytnaha orhana abhruntavanych pryčyn mierkavać, što pradstaŭlenyja źviestki i (abo) dakumienty nie źjaŭlajucca praŭdzivymi, mytny košt takich tavaraŭ budzie vyznačany mytnym orhanam samastojna na padstavie najaŭnaj u jaho rasparadžeńni cenavaj infarmacyi na anałahičnyja tavary, u tym liku na padstavie dadzienych katałohaŭ zamiežnych firm, jakija ažyćciaŭlajuć roźničny prodaž anałahičnych tavaraŭ.

Jak buduć aceńvać rečy, nabytyja na rasprodažach?

Pytańnie: akcyjny tavar byŭ nabyty za 20 jeŭra. Pasyłka pryjšła praz dva tydni ci miesiac, košt hetaha tavaru na sajcie pradaŭca paznačany ŭžo inšy — 35 jeŭra. Jak mytnia budzie dziejničać pa fakcie acenki koštu? Jakija źviestki treba pradjaŭlać?

— Fizičnaja asoba maje prava dakazvać dakładnaść źviestak, pradstaŭlenych dla vyznačeńnia mytnaha koštu. Dla hetaha joj nieabchodna pradstavić dakumienty, jakija paćviardžajuć zajaŭleny košt (dahavor, śpiecyfikacyja, rachunak-faktura, tavarny ček, kvitancyja ab apłacie).

Što rabić, kali pradaviec niapravilna paznačyć košt tavaru?

Pytańnie: Časam zdarajecca tak, što kitajski pradaviec zavyšaje košt tavaru ŭ dekłaracyi. Naprykład, ja kuplaju reč koštam 22 jeŭra, h.zn. faktyčna zapłaciŭ 22 jeŭra — sumu, jakaja nie pieravyšaje limit, a ŭ dekłaracyi paznačany košt, da prykładu, 40 jeŭra. Jak ja zmahu dakazać, što hetaja pasyłka kaštuje mienavita 22 jeŭra? Ci možna dać skrynšoty?

— Kali atrymalnik nie zhodny z koštam, nazvanym adpraŭnikom, jon maje prava nie atrymlivać takoje MPA i infarmavać apieratara paštovaj suviazi ab nieabchodnaści jaho viartańnia ŭ miesca (ustanovu) mižnarodnaha paštovaha abmienu, u jakim ažyćciaŭlaŭsia vypusk. Paśla hetaha atrymalnik moža źviarnucca piśmova ŭ mytny orhan i prykłaści aryhinały dakumientaŭ, jakija paćviardžajuć košt tavaraŭ u pasyłcy.

Pry niazhodzie z mytnym koštam, jaki vyznačajecca mytnym orhanam dla raźliku mytnych płaciažoŭ, atrymalnik tavaru maje prava padać u mytny orhan dakumienty, na padstavie jakich moža być vyznačana mytny košt tavaru (dahavor, śpiecyfikacyja, rachunak-faktura, tavarny ček, kvitancyja ab apłacie i inšyja).

U jakaści dadatkovych dakumientaŭ mytnym orhanam mohuć być pryniatyja internet-katałohi z publična raźmieščanaj infarmacyjaj ab košcie tavaraŭ, jakija pierasyłajucca, razdrukoŭki staronak bankaŭskich pieravodaŭ i inšaje.

Ci možna zakazvać niekalki pasyłak na adzin adras dla roznych ludziej?

Pytańnie: Chacieła b udakładnić, jakim čynam mytnyja orhany płanujuć raźmiažoŭvać atrymalnikaŭ? Pa proźvišču, adrasie atrymalnika, karcie, ź jakoj prajšła apłata?

— Normy biaspošlinnaha ŭvozu, ustanoŭlenyja ŭkazam № 40, raspaŭsiudžvajucca na tavary dla asabistaha karystańnia, jakija pierasyłajucca ŭ MPA na praciahu kalandarnaha miesiaca ŭ adras adnaho atrymalnika, jaki źjaŭlajecca fizičnaj asobaj na terytoryi Respubliki Biełaruś. Varta ŭličyć, što pavodle padpunkta 2.2 punkta 2 artykuła RE 106 «Umovy pryjomu pasyłak» Rehłamientu paštovych pasyłak (Akt Suśvietnaha paštovaha sajuza) u jakaści adrasata moža być paznačana tolki adna fizičnaja abo jurydyčnaja asoba.

Takim čynam, adna fizičnaja asoba na praciahu kalandarnaha miesiaca moža atrymać biaspošlinna MPA na sumu, ekvivalentnuju nie bolš za 22 jeŭra i ahulnaj vahoj nie bolš za 10 kh, albo niekalki MPA u miesiac, kali jany nie pieravysiać nazvanyja limity.

Pytańnie: Ci nie budzie ličycca pieravyšeńniem limitu, kali zamoŭleny tavar z Kitaja prychodzić na adzin i toj ža adras na kožnaha z členaŭ siamji (syn 6 hadoŭ, mama i ja). Na kožnaha možna zakazvać na 22 jeŭra ŭ miesiac?

— Nazvanaja norma raźličvajecca dla kožnaha atrymalnika pry pastupleńni tavaraŭ u jaho adras. U tym liku i na niepaŭnaletnich.

Pytańnie: Mahčymaja situacyja, kali adna pasyłka zatrymajecca, a druhaja pastupić raniej. U vyniku košt pasyłak za miesiac moža pieravysić 22 jeŭra. Ci možna niejak paźbiehnuć vypłaty pošliny na asnovie kvitancyj ab apłacie, ź jakich budzie vidać, što tavar zamoŭleny byŭ u rozny čas i košt zamoŭlenych pasyłak nie pieravyšaje 22 jeŭra na miesiac?

— Zakanadaŭstvam vyznačana, što mytnymi orhanami prymajecca pad uvahu data rehistracyi dakumientaŭ, pradstaŭlenych u adpaviednaści z mytnym zakanadaŭstvam Mytnaha sajuza dla źmiaščeńnia takich tavaraŭ na časovaje zachoŭvańnie. Inšy paradak vyličeńnia vyznačanaha terminu zakanadaŭstvam nie praduhledžany.

Dzie apłacić pošliny i zbory?

Pytańnie. Padkažycie, kali łaska, kali pasyłka ŭsio ž taki pieravyšaje košt 22 jeŭra, dzie apłačvajuć padatak na jaje? Na pošcie pry atrymańni ci treba jechać kudyści i płacić?

— Mytnyja płaciažy treba apłacić u paštovym adździaleńni, u jakim budzie vydavacca mižnarodnaje paštovaje adpraŭleńnie. Pra nieabchodnaść apłaty mytnych płaciažoŭ paviedamić apieratar paštovaj suviazi.

Pytańnie: Zamoviŭ źniešni vinčeścier koštam 90 dalaraŭ (abo 82 jeŭra). Jakuju pošlinu pryjdziecca vypłacić u dadzienym vypadku?

— Kali košt tavaru ŭ MPA dla asabistaha karystańnia składaje 90 dalaraŭ (što ŭ pieraliku skłała 82 jeŭra) i vaha nie pieravyšaje 10 kh i na praciahu kalandarnaha miesiaca ŭ adras dadzienaj fizičnaj asoby nie pierasyłalisia inšyja tavary, to suma pryznačanych da vypłaty mytnych płaciažoŭ budzie raźličana nastupnym čynam: (82 jeŭra — 22 jeŭra) ch 30% + 5 jeŭra (mytny zbor za ažyćciaŭleńnie mytnych apieracyj), — i składzie 23 jeŭra.

Pytańnie: Što budzie, kali ja nie zachaču płacić pieravyšany limit i zabirać pasyłku?

— Pry admovie atrymalnika apłacić naličanyja mytnyja płaciažy MPA budzie viernutaje adpraŭniku.

Pytańnie: Kali košt pasyłki paznačany ŭ rasijskich rublach, to jaki budzie ŭziaty pad uvahu kurs jeŭra? Ci treba budzie płacić pošlinu, kali za čas dastaŭki tavaru suma pieravysiła biazmytny limit za košt rostu rasijskaha rubla da jeŭra?

— Kursy dalara ZŠA i jeŭra da valuty dziaržavy — člena JEAES prymianiajucca na dzień rehistracyi mytnaha prychodnaha ordera.

Pytańnie: Ci buduć dziejničać novyja limity na pasyłki ź JEAES?

— MPA, jakija pierasyłajucca pamiž dziaržavami — členami JEAES, ličacca ŭnutrysajuznymi paštovymi adpraŭleńnia i nie padlahajuć mytnamu kantrolu. U dačynieńni da ich nie ździajśniajucca mytnyja apieracyi.

Viartańnie pa harantyi. Ci treba płacić?

Pytańnie: Cikavić situacyja, kali tavar prybyvaje ŭ nienaležnaj jakaści i pradaviec vysyłaje tavar paŭtorna. Ci treba budzie płacić u druhi raz pošlinu? Naprykład, ja kupiŭ fotaaparat za 100 dalaraŭ z harantyjaj pradaŭca 2 hady. Jon złamaŭsia da ŭviadzieńnia abmiežavańnia ŭ 22 jeŭra i byŭ adpraŭleny pradaŭcu dla zamieny abo ramontu. Fotaaparat viartajecca ŭ Biełaruś paśla ŭstupleńnia ŭkaza № 40 u siłu. Ci budzie naličany padatak?

— Vyklučeńniaŭ u dačynieńni da jakoj-niebudź katehoryi tavaraŭ, u tym liku jakija vysyłajucca paŭtorna pradaŭcom u suviazi z vykanańniem svaich dahavornych abaviazacielstvaŭ pa harantyjnym ramoncie abo absłuhoŭvańni, dadzienym ukazam nie ŭstanoŭlena.

U dadzienym vypadku mytnymi orhanami budzie ŭličvacca mytny košt i vaha tavaraŭ, dastaŭlenych na adras fizičnaj asoby ŭ MPA na praciahu kalandarnaha miesiaca.

U vypadku adpraŭki tavaraŭ dla harantyjnaha ramontu abo zamieny biez nastupnaj vypłaty ŭvaznych płaciažoŭ nieabchodna paćvierdzić, što mienavita hetyja tavary byli raniej ŭviezienyja, i źmiaścić ich pad mytnuju praceduru pierapracoŭki pa-za miežami mytnaj terytoryi. Paśla hetaha tavar možna adnieści na poštu dla pierasyłki pradaŭcu.

Ci ŭvachodziać u limit pasłuhi kurjera pa dastaŭcy pasyłki?

Pytańnie: Kali rabić pakupku praź internet-mahazin na sumu mienš za 22 jeŭra (dapuścim 20 jeŭra) i vahoj mienš za 10 kh, ale dastaŭka budzie kaštavać 5 jeŭra, a, takim čynam, sumarna vychodzić 25 jeŭra, ci budzie ličycca, što limit ŭkazu № 40 budzie pieravyšany i daviadziecca płacić pošlinu?

— U adpaviednaści z častkaj druhoj punkta 1 artykuła 361 MK MS pry ŭvozie tavaraŭ dla asabistaha karystańnia fizičnymi asobami na mytnuju terytoryju JEAES ŭ mytny košt tavaraŭ nie ŭklučajucca raschody pa pieravozcy i strachavańni tavaraŭ da ich prybyćcia i paśla ich prybyćcia na takuju terytoryju.

Pytańnie: Pryjšła pasyłka, na joj napisana 60 jeŭra: tavar kaštuje 32 jeŭra, a dastaŭka — 28 jeŭra, vaha pasyłki — 8 kh. Ź jakoj sumy budzie bracca pošlina?

— Vahavaja norma biaspošlinnaha ŭvozu (10 kh) nie pieravyšanaja. Košt dastaŭki nie ŭličvajecca. Suma mytnych płaciažoŭ, vyličanych zychodziačy z mytnaha koštu, składzie 8 jeŭra ŭ ekvivalencie: (32 — 22 jeŭra) x 30% + 5 jeŭra (mytny zbor) = 8 jeŭra.

• 0
• 0
• 0
• 0
• 0
• 0
• 0
• 0