Treniera słavienskaha kłuba zvolnili, bo jon nazvaŭ nihieryjskaha futbalista «čornym idyjotam»
36-hadovy sierbski śpiecyjalist Marka Nikalič mieŭ usie mahčymaści, kab pryvieści kłub «Alimpija» ŭpieršyniu za 21 hod da čempijonstva ŭ Słavienii, adnak u vyniku trapiŭ u hučny skandał.
Marka Nikalič pryjšoŭ u lublanskuju «Alimpiju» ŭ pačatku 2016 hoda. Pad jaho kiraŭnictvam kamanda praviała vosiem hulniaŭ, u jakich nie sastupiła nivodnaha razu (čatyry pieramohi pry čatyroch ničyich). Na dadzieny momant «Alimpija» idzie na pieršym miescy ŭ lizie, apiaredžvajučy na 2 punkty «Marybor».
Padčas chatniaj hulni 29-ha tura čempijanatu Słavienii suprać «Zavrca», «Alimpija» prajhravała ŭ liku (0:1) až da kampiensavanaha času. Na treciaj dadanaj arbitram chvilinie nihieryjski forvard «Alimpii» Blesinh Elekie zrabiŭ lik roŭnym (adrezak 2:15 na videa). Adnak zamiest taho, kab chucieńka pasprabavać usio ž vyrvać patrebnuju pieramohu, lehijanier pačaŭ vielmi doŭha śviatkavać svaju ŭdaču.
Mienavita za takija pavodziny Nikalič i nazvaŭ paśla hulni Elekie «čornym idyjotam». Paśla trenier paprasiŭ prabačeńni, adnak chod spravy byŭ užo zapuščany. Spačatku fiederacyja futbołu Słavienii paličyła słovy treniera rasisckimi i adchiliła jaho ad kiraŭnictva kamandaj na 7 matčaŭ. Paśla hetaha i menedžment «Alimpii» pryniaŭ rašeńnie raźvitacca z trenieram.
«Marka Nikalič – dobry trenier, dobry čałaviek, adnak jon ździejśniŭ vialikuju pamyłku», — skazaŭ prezident «Alimpii» Miłan Mandaryč.
Ad pryvatnikaŭ patrabujuć zavieści ideołaha ŭ štacie — raspytali, što robiać kampanii18
Kamientary