Fejsbuk u Biełarusi pamiraje, tyktok samy masavy, VK i «Adnakłaśniki» stahnujuć, a tredsy vybuchova rastuć
U minułym hodzie ŭpieršyniu za doŭhi čas mnohija sacsietki ŭ Biełarusi pierastali raści. Vyklučeńniem stała vybuchovaja cikavaść da Threads, a voś usie astatnija, padobna, upierlisia ŭ stol, raskazali Office Life apytanyja vydańniem ekśpierty.
Siarhiej Kuźmienka, viadučy vykładčyk Webcom Academy, havoryć:
«Prablema ŭ tym, što z vyraznaj statystykaj pa sacyjalnych sietkach u Biełarusi tradycyjna składana. U nas jość, pa sutnaści, try asnoŭnyja krynicy: Digital Data Report, unutranyja danyja Webcom Group i raźliki ahienctvaŭ Wunder i AMDG. Ale kali skłaści hetuju mazaiku, karcina atrymlivajecca vielmi pakazalnaja.
Pieršaje i hałoŭnaje: pa vynikach minułaha hoda ahulny rost aŭdytoryi ŭ biełaruskich sacsietkach praktyčna spyniŭsia. Vyklučeńniem staŭ tolki Threads, jaki za paŭhoda vyras u try razy.
Absalutny lidar pa achopach siońnia — TikTok, jon pierasiahnuŭ miažu amal u 9 miljonaŭ karystalnikaŭ. Padkreślu: karystalnikaŭ, a nie nasielnictva! Mnohija zachodziać ź niekalkich pryład, ale ličba ŭsio adno kałasalnaja. TikTok «źjadaje» ŭvieś svabodny čas, i hetaja tendencyja budzie tolki ŭzmacniacca».
Alesia Černik, kiraŭnica SMM-napramku Design Wunder Digital, u svaju čarhu, śćviardžaje:
«Za hod aŭdytoryja sacsietak ź Biełarusi vyrasła na 13% (pavodle DataReportal). Samaja masavaja placoŭka ŭ našaj krainie — TikTok: im karystajucca 95% internet-karystalnikaŭ. Heta faktyčna maksimalny achop. Płatforma praciahvaje raści, ale tempy zakanamierna zapavolvajucca: patencyjał pašyreńnia amal vyčarpany».
Dalej, kaža Siarhiej Kuźmienka, idzie «ciomny konik» — YouTube, pa jakim, na žal, niama prazrystaj biełaruskaj statystyki, a zatym — Instagram ź jaho 3,9 miljona.
«Zdavałasia b, mienš, čym u TikTok, ale tut toicca najvažniejšy niuans: čas znachodžańnia! Ludzi zachodziać u Instagram dziasiatki razoŭ na dzień, hartajuć stužku, hladziać ryłsy. Mienavita hety faktar — klučavy dla rekłamadaŭcy.
Usio, što nie traplaje ŭ top-3, albo staić na miescy, albo padaje. Naprykład, kolkaść karystalnikaŭ Facebook u Biełarusi źniziłasia prykładna da 500 tysiač. Heta ŭžo nie masavaja sacsietka, a nišavaja placoŭka.
Siurpryzam hoda staŭ LinkedIn. Pavodle acenak, jaho miesiačnaja aŭdytoryja ŭ Biełarusi ŭžo dasiahnuła 2 miljonaŭ čałaviek. Heta dziełavaja sietka, jakaja realna pracuje i daje vynik. Što tyčycca «VKontaktie» (mienš za 2 miljona) i «Odnokłaśśnikov» (kala 1 miljona), dyk hetyja sietki stahnujuć.
Hałoŭnaja padzieja hetaha hoda — Threads. Da listapada 2025 hoda jaho aŭdytoryja ŭ Biełarusi była 450 tysiač, a da sakavika 2026‑ha my ŭžo pierasiahnuli paroh u miljon karystalnikaŭ.
«Čym Threads adroźnivajecca ad usiaho, što my bačyli raniej? — razvažaje Siarhiej Kuźmienka. — Kali pravodzić anałohii, to TikTok — heta hihancki futbolny maniež. Tam 9 miljonaŭ čałaviek, šum, šturchanina. Kab vas zaŭvažyli, treba kryčać vielmi hučna. A Threads — heta takaja nievialikaja kuryłka, dzie źbirajucca tolki svaje, i naviny raznosiacca imhnienna».
Ciapier čytajuć
Ad pryvatnikaŭ patrabujuć zavieści ideołaha ŭ štacie — raspytali, što robiać kampanii17
Kamientary