Žarko: Biełaruskija leki nie horšyja za impartnyja, ale značna tańniejšyja

Biełaruskija lekavyja srodki nie horšyja za impartnyja pa jakaści i efiektyŭnaści, ale značna tańniejšyja, zajaviŭ ministr achovy zdaroŭja Vasil Žarko na źjeździe farmaceŭtyčnych rabotnikaŭ 22 krasavika ŭ Minsku. Pry hetym jon zaznačyŭ, što da pytańnia vybaru lekavych srodkaŭ «padychodzić treba ŭdumliva z ulikam śpiecyfiki situacyi».

Ministr zaznačyŭ, što kožny hod dola ajčynnych lekavych srodkaŭ na farmrynku pavialičvajecca i pa vynikach 2015 hoda skłała 52,7%.

Zadačami ajčynnaj farmpramysłovaści, skazaŭ ministr, źjaŭlajucca zasvajeńnie novych lekavych srodkaŭ, dyviersifikacyja pastavak, a da 2020 hoda — rost abjomu ekspartnych pastavak pradukcyi ŭłasnaj vytvorčaści nie mienš jak u dva razy i źnižeńnie sabiekoštu pradukcyi na 25%, a taksama stvareńnie novych pracoŭnych miescaŭ.

U suviazi z papularyzacyjaj biełaruskich lekaŭ namieśnik ministra achovy zdaroŭja, dyrektar departamienta farmaceŭtyčnaj pramysłovaści Valeryj Šaŭčuk padkreśliŭ važnaść «farmiravańnia stanoŭčaha imidžu lekavych srodkaŭ siarod śpiecyjalistaŭ i nasielnictva respubliki».

Jon paviedamiŭ, što na rekłamu lekavych srodkaŭ zatračvajucca surjoznyja srodki. Naprykład, RUP «Biełmiedpreparty» za 2013—2015 hady vydatkavała na rekłamnyja i markietynhavyja mierapryjemstvy 8,7 młrd rubloŭ, za pieršy kvartał 2016-ha — 696 młn, Barysaŭski zavod miedpreparataŭ — 11 młrd i 673 młn rubloŭ adpaviedna. «Hetaja praca maje vielmi vialikija reziervy», — ličyć namieśnik ministra.

Pavodle jaho słoŭ, pavialičvajecca kolkaść pradpryjemstvaŭ, jakija majuć siertyfikaty GMP ab naležnaj vytvorčaj praktycy. Ciapier siarod biełaruskich farmpradpryjemstvaŭ siertyfikat GMP majuć 48 vytvorčych učastkaŭ, u 2015 hodzie atrymana 17. Samaja vialikaja kolkaść učastkaŭ (10) siertyfikavana na Barysaŭskim zavodzie miedpreparataŭ i «Biełmiedpreparatach» (7).

Kažučy pra mižnarodnyja siertyfikaty jakaści mižnarodnaj farminśpiekcyi PIC/S, namieśnik ministra adznačyŭ, što takija dakumienty jość u čatyroch pradpryjemstvaŭ — TAA «Farmtechnałohija», STAA «Lekfarm», RUP «Biełmiedpreparaty» i Barysaŭskaha zavoda miedpreparataŭ.

Šaŭčuk taksama paviedamiŭ, što na ŭnutranym rynku 76,2% ajčynnych lekavych srodkaŭ realizujecca ŭ roźničnych aptečnych sietkach (bolš za 80% ź ich naležać dziaržavie) i 23,8% — u špitalnym siektary. Ad 70% da 80% pradukcyi viadučych vytvorcaŭ lekavych srodkaŭ — RUP «Biełmiedpreparaty» i Barysaŭskaha zavoda miedpreparataŭ — pradajucca ŭ aptekach pa canie nižejšaj za adzin dołar u ekvivalencie za ŭpakoŭku.

• 0
• 0
• 0
• 0
• 0
• 0
• 0
• 0