Dyrektaru padraździaleńnia BDU inkryminujecca kala 30 epizodaŭ atrymańnia chabaru
Zatrymanamu ŭ listapadzie minułaha hoda kiraŭniku vučebna-vopytnaha RUP «Ščomyślica» Biełaruskaha dziaržaŭnaha ŭniviersiteta inkryminujecca kala 30 epizodaŭ chabaru, paviedamili va UUS Minabłvykankama.
Zatrymlivali kiraŭnika supracoŭniki UBEP UUS Minskaha abłvykankama ŭ momant atrymańnia chabaru z nahody spryjalnaha vyrašeńnia pytańnia ab vydzialeńni ŭ arendu na try hady adnaho z pamiaškańniaŭ, jakija naležać uznačalvanamu im pradpryjemstvu, płoščaj 550 kv. m. Suma ŭ 1400 dalaraŭ była pieradadziena słužbovaj asobie indyvidualnym pradprymalnikam.
U chodzie dalejšaj pracy vyśvietliłasia, što fakty chabarnictva byli nie adzinkavyja. 28 krasavika pa materyjałach upraŭleńnia BEZ UUS Minskaha abłvykankama ŭpraŭleńniem Śledčaha kamiteta pa Minskaj vobłaści raspačata 10 kryminalnych spraŭ z nahody chabarnictva ŭ dačynieńni da byłoha dyrektara.
Pa najaŭnych va UBEP UUS źviestkach, fihurant, pracujučy na pasadzie z 2009 pa 2015 hod, za ŭsio toje ž spryjalnaje vyrašeńnie pytańnia ab zaklučeńni damovaŭ arendy pamiaškańniaŭ z roznymi subjektami haspadarańnia atrymaŭ u jakaści chabaraŭ 2100 dalaraŭ ZŠA i 900 jeŭra.
U dadatak da hetaha va UBEP UUS adznačyli, što ŭ dačynieńni da fihuranta ŭžo skončana rasśledavańnie 20 kryminalnych spraŭ pa anałahičnych padstavach. Zhodna z sabranymi materyjałami jon za zaklučeńnie i vykanańnie dahavoraŭ arendy atrymaŭ ad pradstaŭnikoŭ subjektaŭ haspadarańnia Minskaj vobłaści ŭ jakaści chabaraŭ hrašovyja srodki na ahulnuju sumu 123 700 dalaraŭ ZŠA i 73 260 jeŭra.
Ciapier čytajuć
U Minsku adbylisia masavyja zatrymańni vydaŭcoŭ i kniharaspaŭsiudnikaŭ4
Kamientary