Kamitetam dziaržaŭnaj biaśpieki Respubliki Biełaruś uskryta i spyniena karupcyjnaja dziejnaść šerahu byłych i dziejučych słužbovych asob Minskaj rehijanalnaj mytni.
Ciaham apošnich niekalkich hadoŭ supracoŭniki mytni, praz pasiarednika ź liku byłych rabotnikaŭ, sistematyčna atrymlivali chabar ad pradstaŭnikoŭ kamiercyjnych struktur za akazańnie sadziejničańnia ŭ paskareńni mytnaha afarmleńnia hruzaŭ, a taksama praviadzieńni nienaležnym čynam apieracyj mytnaha kantrolu, havorycca ŭ paviedamleńni pres-słužby KDB.
Apieratyŭnymi padraździaleńniami KDB ustanoŭlena dačynieńnie da supraćpraŭnaj dziejnaści načalnika Maładziečanskaha mytnaha pasta, jaki byŭ zatrymany z dokazami złačynstva pry atrymańni čarhovaha chabaru ŭ sumie 1100 dalaraŭ ZŠA.
Pamahaty ŭ atrymańni chabaru, były supracoŭnik mytni, jaki dziejničaŭ u intaresach adnoj z kamiercyjnych struktur, taksama zatrymany.
U vyniku praviedzienych mierapryjemstvaŭ ustanoŭleny ŭdzieł u karupcyjnaj schiemie i inšych supracoŭnikaŭ mytni.
Tak, pry ŭźniknieńni prablem, źviazanych z mytnym koštam hruzaŭ, chabary ŭručalisia supracoŭniku adździeła taryfnaha rehulavańnia Minskaj rehijanalnaj mytni, jaki, razam sa spryjalnym rašeńniem hetych pytańniaŭ, pieradavaŭ kamiersantam abmiežavanyja da raspaŭsiudžvańnia źviestki z baz dadzienych mytnych orhanaŭ.
Pasłuhi namieśnika načalnika adździeła pa baraćbie z kantrabandaj i ATP Minskaj rehijanalnaj mytni abychodzilisia pradstaŭnikam kamiercyjnaha asiarodka ŭ 500 dalaraŭ ZŠA, a inśpiektara, jaki niepasredna ažyćciaŭlaŭ mytnaje afarmleńnie hruzaŭ u PTA «Kaladzičy — Aŭta» - 50 dalaraŭ ZŠA.
Raspačatyja kryminalnyja spravy pa art. 430 KK Respubliki Biełaruś (atrymańnie chabaru, dapamohu ŭ atrymańni chabaru). Čatyry supracoŭniki Minskaj rehijanalnaj mytni, jakija dapuścili karupcyjnyja pravaparušeńni, i pasiarednik zatrymanyja, da ich prymieniena miera strymańnia ŭ vyhladzie zaklučeńnia pad vartu.
Pravodziacca nieabchodnyja apieratyŭna-vyšukovyja i śledčyja dziejańni, nakiravanyja na vyjaŭleńnie i dakumientavańnie inšych epizodaŭ supraćpraŭnaj dziejnaści padazravanych.
Kamientary