Siejm Litvy zaklikaje pryniać miery dla spynieńnia budaŭnictva Biełaruskaj AES

Siejm Litvy zaklikaje pryniać miery dla spynieńnia budaŭnictva Biełaruskaj atamnaj stancyi. Adpaviednuju rezalucyju litoŭski parłamient pryniaŭ 12 maja «ŭ suviazi z mahčymaj niebiaśpiekaj dla Litvy Astravieckaj atamnaj elektrastancyi, jakaja budujecca za 50 km ad Vilniusa».

Litoŭskija deputaty zaklikali svoj urad «pryniać usie nieabchodnyja dypłamatyčnyja, jurydyčnyja, techničnyja miery, kab budaŭnictva było spyniena», paviedamlaje navinavy partał Delfi. Parłamientaryi taksama vyrašyli «nakiravać Biełarusi sihnał, što Litva nie prymie elektraenierhiju, jakaja budzie vypracoŭvacca na hetaj AES», u suviazi z čym Kabinietu ministraŭ prapanavana «nieadkładna, vielmi ćviorda i ŭ kateharyčnym vyhladzie vykazać Biełarusi volu Litvy».

Pavodle infarmacyi partała, da 1 červienia ŭrad pavinien pradstavić deputatam płan kankretnych dziejańniaŭ u hetym kirunku.

Paviedamlajecca taksama, što premjer-ministr Litvy Alhirdas Butkiavičus maje namier abmierkavać prablemu biaśpieki BiełAES sa staršynioj Jeŭrakamisii Žan-Kłodam Junkieram.

Nahadajem, 5 maja Ministerstva zamiežnych spraŭ Litvy ŭručyła pasłu Biełarusi Alaksandru Karalu notu z-za «mahčymaha incydentu na raźmieščanaj za 50 km ad Vilniusa Astravieckaj atamnaj elektrastancyi». Padstavaj dla hetaha stała apublikavanaja na sajcie telekanała «Biełsat» infarmacyja ab abrušeńni ŭ siaredzinie krasavika stojek budynka jadziernaha absłuhoŭvańnia elektrastancyi, jaki ŭzvodzicca.

Na nastupny dzień Ministerstva enierhietyki Biełarusi paviedamiła, što 8 krasavika byŭ zafiksavany defiekt pry padrychtoŭčych rabotach, nastupstvy jakoha likvidavanyja.

U toj ža dzień u Minenierha prajšła sustreča namieśnika ministra Uładzimira Zakreŭskaha z pasłom Litvy ŭ Biełarusi Evałdasam Ihnatavičusam, padčas jakoj dypłamata zaprasili naviedać placoŭku stancyi. Zatym pasoł byŭ pryniaty ŭ MZS Biełarusi, dzie jamu była pieradadziena aficyjnaja infarmacyja ab adsutnaści jakich-niebudź incydentaŭ na budplacoŭcy. 10 maja stała viadoma, što dypłamat admoviŭsia ad zaprašeńnia naviedać budplacoŭku, spasłaŭšysia na toje, što biaśpieku stancyi «pavinny aceńvać ekśpierty».

Aficyjny Vilnius nieadnarazova padkreślivaŭ, što Litva nie maje namieru kuplać elektraenierhiju ź Biełaruskaj AES. Z punktu hledžańnia litoŭskaha boku, budaŭnictva stancyi parušaje patrabavańni Kanviencyi ab acency ŭździejańnia na navakolnaje asiarodździe ŭ transhraničnym kantekście (Kanviencyja Espaa), jakaja praduhledžvaje acenku ŭździejańnia abjektaŭ na navakolnaje asiarodździe nie tolki ŭnutry krainy, ale i ŭ sumiežnych krainach.

• 0
• 0
• 0
• 0
• 0
• 0
• 0
• 0