Sinoptyk Dźmitryj Rabaŭ papiaredziŭ u efiry ANT, što pieršy tydzień lutaha ŭ krainie budzie vielmi maroznym. Pavodle jaho słoŭ, z 2 pa 8 lutaha tempieratury buduć na 10—15 hradusaŭ nižejšyja za klimatyčnuju normu, a z-za mocnaha vietru choład budzie adčuvacca jašče macniej.
Luty pačniecca «pa-zimovamu surova»: u pačatku tydnia ŭ Biełaruś uvarviecca mahutny skandynaŭski antycykłon. Jon pryniasie suchoje, ale vielmi chałodnaje nadvorje bieź istotnych śniehapadaŭ, z prajaśnieńniami i soncam. Viecier budzie pieravažna paŭnočna-ŭschodni, paryvisty, zachavajucca hałalod i hałalodzica.
U noč na paniadziełak, 2 lutaha, tempieratura moža apuskacca da -19…-29 °C, udzień čakajecca -12…-17 °C. U aŭtorak, 3 lutaha, mocny maroz zachavajecca: nočču -17…-25 °C, udzień -9…-15 °C, pry hetym paryvisty viecier zrobić nadvorje asabliva praniźlivym.
U sieradu, 4 lutaha, situacyja pačnie pastupova źmianiacca. Antycykłon častkova adharodzić krainu ad choładu, ale źjaviacca tumany i ślizkija darohi. Viecier źmienicca na paŭdniovy i stanie słabiejšym. Tempieratury buduć vielmi roznymi: nočču na paŭdniovym zachadzie kala -11 °C, na paŭnočnym uschodzie — da -25 °C, udzień — ad -12 °C na poŭnačy da -4 °C na zachadzie.
Papiarednie ŭ čaćvier, 5 lutaha, čakajecca karotkaja «pieradyška»: marozy asłabnuć dziakujučy ciopłym pavietranym masam z paŭdniovaha zachadu Jeŭropy. Mahčymyja śnieh i mokry śnieh, pavysicca vilhotnaść, uzraście ryzyka tumanaŭ i hałalodzicy. Nočču budzie -8…-13 °C, udzień — -6…-12 °C.
U piatnicu, 6 lutaha, nadvorje zastaniecca padobnym: apadki roznaj intensiŭnaści, paryvisty viecier užo ŭschodniaha napramku i anałahičny tempieraturny fon.
Na vychadnych, 7—8 lutaha, Biełaruś apyniecca pad upłyvam antycykłonu z centralnaj Rasii. Viecier budzie paŭdniova-zachodni, paryvisty, vierahodnaść apadkaŭ nievialikaja. Nočču tempieratury składuć kala -8…-15 °C, udzień u subotu budzie -3…-9 °C, a ŭ niadzielu marazy znoŭ uzmocniacca da -6…-12 °C.
Kamientary