U pavietranaj častcy vajennaha parada ŭ Dzień Niezaležnaści Biełarusi, 3 lipienia, u Minsku voźmuć udzieł rasijskija bambardziroŭščyki i źniščalniki Su-34 i Su-30, paviedamiŭ na pres-kanfierencyi 27 červienia načalnik upraŭleńnia infarmacyi hałoŭnaha ŭpraŭleńnia ideałahičnaj pracy Ministerstva abarony Uładzimir Makaraŭ.
Na pytańnie, ci ŭdzielničali ekipažy hetych samalotaŭ u bajavych dziejańniach u Siryi, pradstaŭnik Minabarony Biełarusi nie adkazaŭ.
Pavodle słoŭ Makarava, usiaho ŭ praviadzieńni i zabieśpiačeńni vajennaha parada zadziejničanyja prykładna 5 tys. čałaviek, niepasredna ŭ paradzie voźmuć udzieł pryblizna 3.100 vajennasłužačych. Sfarmavanyja 18 piešych paradnych raźlikaŭ. Heta vychavancy Minskaha vajennaha suvoraŭskaha vučylišča, kursanty i vykładčyki Vajennaj akademii, kursanty vajenna-techničnaha fakulteta BNTU, vajennasłužačyja 120-j asobnaj miechanizavanaj bryhady, čaściej VPS i vojskaŭ SPA, vojskaŭ suviazi, supracoŭniki Dziaržaŭnaha pahraničnaha kamiteta, MNS, kursanty fakulteta ŭnutranych vojskaŭ Vajennaj akademii, bajcy 3-j asobnaj bryhady śpiecyjalnaha pryznačeńnia ŭnutranych vojskaŭ MUS, sił śpiecyjalnych apieracyj Uzbrojenych sił (38-ja i 103-ja asobnyja mabilnyja bryhady).
Pierad trybunami projduć taksama vajskoŭcy 76-j desantna-šturmavoj dyvizii Uzbrojenych sił RF.
Sfarmavanyja 14 paradnych raźlikaŭ vajennaj techniki — prykładna 130 adzinak. Adkryje prachodžańnie miechanizavanaj kałony technika časoŭ Vialikaj Ajčynnaj vajny: tanki T-34-85, IS-2, samachodnaja artyleryjskaja ŭstanoŭka Su-100, pieršaja reaktyŭnaja sistema załpavaha ahniu BM-13 «Kaciuša».
Paślavajennaja technika budzie pradstaŭlenaja tankam T-55, płavalnym tankam PT-76, bajavoj mašynaj piachoty BMP-1 i bajavoj mašynaj desantu BMD-1P.
Sučasnaja technika, jakaja znachodzicca na ŭzbrajeńni biełaruskaj armii, budzie pradstaŭlenaja paradnymi raźlikami asnoŭnaha bajavoha tanka T-72B, bajavoj mašyny piachoty BMP-2, bronietransparciora BTR-80, braniravanaha aŭtamabila «Vołat», haŭbicy «Hvaździk», reaktyŭnyja sistemy załpavaha ahniu «BiełHrad», «Śmierč», «Pałanez». Technika VPS i vojskaŭ SPA — zienitnych rakietnych kompleksaŭ «Asa», «Tor-M2», S-300PS i S-300V.
U pavietranym ešałonie buduć zadziejničanyja 24 samaloty i 15 viertalotaŭ. Nad Minskam pralaciać viertaloty Mi-2, Mi-8, Mi-24, Ka-52 rasijskich Uzbrojenych sił, vajenna-transpartny samalot An-26, vučebna-bajavyja Jak-130, šturmaviki Su-25, źniščalniki MiH-29, vajenna-transpartny Ił-76, vučebna-trenirovačnyja Ł-39, rasijskija bambardziroŭščyki Su-34 i źniščalniki Su-30 47-ha źmiešanaha avijacyjnaha pałka Vajenna-kaśmičnych sił VS RF.
Pieršaja treniroŭka pavietranaha ešałona prajšła 27 červienia. Nastupnaja zapłanavanaja 30 červienia. Hienieralnaja repietycyja projdzie 1 lipienia.
Hienieralnaja treniroŭka parada adbudziecca 29 červienia.
Kamientary