Patencyjnyja kandydaty ŭ deputaty ad pravacentrysckaj kaalicyi ŭ vypadku rehistracyi nie majuć namieru zdymać svaje kandydatury padčas vybarčaj honki, zajavili lidary kaalicyi žurnalistam 4 lipienia na pikiecie pa vyłučeńni kandydatam namieśnika staršyni ruchu «Za Svabodu» Jurasia Hubareviča.
Pikiet prajšoŭ u Minsku, la hałoŭnaha ŭvachodu ŭ Centralny bataničny sad.
«Kandydaty pravacentrysckaj kaalicyi nie buduć zdymacca, tamu što siońnia adsutnaść mocnych kandydataŭ u biuleteniach — heta padarunak Jarmošynaj i tym, chto imkniecca sfalsifikavać vybary. Bo hulnia biełaruskich uładaŭ zastajecca niaźmiennaj: heta pryznačeńnie tak zvanaj apazicyi ŭ parłamient i vydača hetaha za demakratyzacyju, jakaja adbyłasia ŭ Biełarusi», — zajaviŭ sustaršynia arhkamiteta pa stvareńni partyi «Biełaruskaja chryścijanskaja demakratyja» Vital Rymašeŭski.
Pavodle jaho słoŭ, źniaćcie apazicyjnych kandydataŭ ź pieradvybarnaj honki budzie padarunkam uładam, «tamu što im tady falsifikavać budzie niama čaho». Rymašeŭski ŭdakładniŭ, što ad kaalicyi pa ŭsioj krainie majuć namier vyłučacca bolš za 90 čałaviek, dźvie traciny ź jakich užo padali dakumienty na rehistracyju inicyjatyŭnych hrup. Častka patencyjnych kandydataŭ, dadaŭ sustaršynia BCHD, majuć namier vyłučacca pa partyjnym śpisie Abjadnanaj hramadzianskaj partyi ŭ suviazi z tym, što «na mnohich ź ich byŭ akazany nacisk» padčas piersanalnaha vyłučeńnia.
«Taktyka źniaćcia mieła peŭny popyt čatyry hady tamu, kali była mahčymaść zaklikać da bajkotu mienavita ŭ znak pratestu. Siońnia takoj mahčymaści niama, i naša hałoŭnaja zadača — kab jak maha bolšaja kolkaść ludziej padčas ekanamičnaha kryzisu prahałasavali za vybar pravacentrystaŭ, za novy ekanamičny kurs, jeŭrapiejski vybar, palityčnyja reformy», — zajaviŭ staršynia AHP Anatol Labiedźka.
«Dla čaho my idziem u hetuju kampaniju? Mienavita dla taho, kab vychodzić u centr Minska, Babrujska, Smarhoni, razmaŭlać ź ludźmi i danosić našu pazityŭnuju alternatyvu. My bačym absalutnaje bankructva ŭładaŭ, my bačym poŭny ekanamičny tupik», — praciahnuŭ palityk. Jon padkreśliŭ, što padčas vybarčaj kampanii pravacentrysty majuć namier sabrać dokazy nielihitimnym vybaraŭ, taho, što «jany pravodziacca nie ŭ adpaviednaści sa standartami ABSIE».
Adznačym, što mienavita paśla zaklikaŭ da bajkotu vybaraŭ padčas ahitacyjnaj kampanii z boku apazicyjnych kandydataŭ i źniaćcia mnohich ź ich z vybarčaj honki padčas parłamienckich vybaraŭ 2012 hoda ŭ vybarčaje zakanadaŭstva byli ŭniesienyja źmieny, jakija zabaraniajuć ahitacyju za bajkot.
Parłamienckija vybary projduć 11 vieraśnia
Ciapier čytajuć
Vajb-prahramavańnie źmienić rolu raspracoŭščyka, RLVR, i kali łopnie burbałka. Biełarus-inžynier u halinie ŠI, jaki pracuje ŭ ZŠA, raskazaŭ, što nas čakaje ŭ 20263
Kamientary