Fejł Łanskoj idzie na rekord: top-10 samych NN VIDEO

Kanał «NN VIDEO TV» byŭ stvorany na płatformie YouTube 10 studzienia 2008 hoda. Za 9 hod kanał maje amal dźvie tysiačy videa, ahułam amal 10 miljonaŭ prahladaŭ i troški nie daciahvaje da vaśmi tysiač padpisantaŭ.

Jakija ž videa na YouTube-kanale NN samyja papularnyja?

10. Aŭtamabilnaja revalucyja ŭ Minsku (109 tysiač prahladaŭ)

Videa žurnalistaŭ NN ź pieršaj akcyi «Stop-bienzin», jakaja prachodziła ŭ 2011 hodzie. Tady kiroŭcy, jakija pratestavali suprać pavyšeńnia cen na paliva, pierakryli praśpiekt Niezaležnaści.

9. Maskvičy pra Łukašenku (111 tysiač prahladaŭ)

Žurnalisty NN spytali ŭ žycharoŭ Maskvy, jak jany aceńvajuć palityku Alaksandra Łukašenki. Mierkavańni minakoŭ padzialilisia.

8. «Narodnyja hulańni-2» (116 tysiač prahladaŭ)

Druhaja akcyja maŭklivych pratestaŭ u Minsku. Tady supracoŭniki milicyi pierakryli Kastryčnickuju płošču, ale heta nie spyniła pratestoŭcaŭ, i akcyja adbyłasia na Niamizie. Na druhoj akcyi adbylisia pieršyja zatrymańni.

7. Biełaruskija i ŭkrainskija fanaty na matčy Ukraina-Biełaruś (118 tysiač prahladaŭ)

Videarepartaž NN z tavaryskaj hulni zbornych pa futbołu Biełarusi i Ukrainy. Tady fanaty abmieńvalisia vokličami «Razam i nazaŭždy», «Žyvie Biełaruś», «Słava Ukrainie» i h.d. U toj dzień u Lvoŭ prybyła bolš za tysiaču biełarusaŭ.

6. Jak z Płoščy ruski duch vyhaniali (205 tysiač prahladaŭ)

U 2015 hodzie padčas mitynhu suprać falsifikacyj na Płoščy Niezaležnaści nieviadomy chłopiec pravakavaŭ ludziej na bojku, načapiŭšy na siabie rasijski ściah. 

5. Što dumajuć biełarusy pra Pucina? (215 tysiač prahladaŭ)

Žurnalisty NN apytali minakoŭ u Minsku na temu staŭleńnia da palityki prezidenta Rasii Uładzimira Pucina.

4. Cud na «Słavianskim bazary»: Łanskaja zaśpiavała mužčynskim hołasam (237 tysiač prahladaŭ)

Śviežaje videa, jakoje ŭskałychnuła biełaruski internet. Na scenie Letniaha amfiteatra biełaruskija zorki śpiavali pieśniu «Usie kvietki lipienia». Śpiavačka Alena Łanskaja, jak i apieratar tranślacyi, nie viedała, dzie zakančvajucca jaje słovy, i praz kolki siekund fanahrama vydaje praciah pieśni mužčynskim hołasam, a Alena ŭsio jašče śpiavaje.

3. Dzień «Niezaležnaści» (291 tysiača prahladaŭ)

Videa z maŭklivaj akcyi pratestu, jakaja prachodziła na čyhunačnym vakzale 3 lipienia 2011 hoda. Akcyja adznačyłasia brutalnymi zatrymańniami aktyvistaŭ i žurnalistaŭ. 

2. Jak adznačyli Dzień VDV u Minsku na Niamizie (315 tysiač prahladaŭ)

Videarepartaž sa śviatkavańnia dnia VDV u Minsku ŭ 2013 hodzie. 

1. Film «Biełaruskaja mara». Poŭnaja viersija (364 tysiačy prahladaŭ)

Videa, jakoje kamientujecca internet-karystalnikami dahetul na našym akaŭncie. Vialiki film pra Płošču-2010 i maŭklivyja akcyi pratestu ad žurnalistki rasijskaha Pieršaha kanała, biełaruski Kaciaryny Kibalčyč.

U filmie raspaviadajecca historyja žyćcia maładoha čałavieka ź Minska, jaki apošnija 18 hadoŭ žyvie ŭ krainie «apošniaha dyktatara Jeŭropy». U asnovu filma lahli padziei 2010–2011 hadoŭ u Biełarusi: prezidenckaja kampanija, represii, sudy i toje, jak heta adbiłasia na žyćci samaj «stabilnaj» postsavieckaj respubliki.

• 0
• 0
• 0
• 0
• 0
• 0
• 0
• 0