Maci vaśmimiesiačnaj dziaŭčynki, zahryzienaj sabakam, prysudžanaja da troch hadoŭ pazbaŭleńnia voli

11 žniŭnia ŭ sudzie Frunzienskaha rajona Minska abvieščany prysud pa spravie 25-hadovaj minčanki Kaciaryny Pašuk, vaśmimiesiačnuju dačku jakoj zahryz sabaka. Jana prysudžanaja da troch hadoŭ pazbaŭleńnia voli ŭ kałonii ahulnaha režymu i štrafu ŭ pamiery 200 bazavych vieličyń. Prysud abviaściła sudździa Julija Krepskaja.

Dziaržaŭny abvinavaŭca, staršy pamočnik prakurora Frunzienskaha rajona Kryścina Asran, prasiła pryhavaryć žančynu da troch hadoŭ pazbaŭleńnia voli z adbyvańniem pakarańnia ŭ kałonii-pasialeńni. Svaju pazicyju dziaržabvinavaŭca vykazała 9 žniŭnia.

Abaronca Vasil Łušnikaŭ prasiŭ sud pryznačyć abvinavačvanaj aryšt i z ulikam znachodžańnia jaje ŭ SIZA vyzvalić z-pad varty ŭ zale suda.

Minčancy inkryminavałasia ŭčynieńnie złačynstva, praduhledžanaha č. 3 art. 159 KK (jaŭnaje pakidańnie ŭ niebiaśpiecy, učynienaje asobaj, jakaja sama pa nieaściarožnaści ci z uskosnym namieram pastaviła paciarpiełaha ŭ niebiaśpiečny dla žyćcia abo zdaroŭja stan). Maksimalnaje pakarańnie za heta złačynstva — try hady pazbaŭleńnia voli sa štrafam ad 30 da 1.000 bazavych vieličyń.

Trahiedyja adbyłasia pozna ŭviečary 27 sakavika 2016 hoda ŭ kvatery doma pa vulicy Jankoŭskaha, jakuju zdymała abvinavačvanaja. Pakul pjanaja maci spała, hałodny, jak śćviardžaje abvinavačańnie, chaski pakusaŭ dziaŭčynku za hałavu i adkusiŭ joj pravuju ruku amal pa plačo. Dzicia pamierła ŭ vyniku traŭmatyčnaj amputacyi ruki, straty kryvi i šoku. Krykaŭ dziaŭčynki nichto z susiedziaŭ nie čuŭ, tolki niejak niezvyčajna skrob padłohu sabaka, raskazała susiedka. Ustanoŭlena, što da trahiedyi maci ŭ roznych dozach užyvała ałkahol na praciahu troch sutak. 27 sakavika, pryjšoŭšy dadomu, jana pakłała dačku spać pobač z saboj na kanapu, a nie ŭ dziciačy łožak, jaki byŭ złamany.

Čatyrochmiesiačny na momant trahiedyi ščaniuk chaski nie byŭ zarehistravany va ŭstanoŭlenym paradku. Śledstva i abvinavačańnie nastojvajuć na tym, što sabaku nichto nie dresiravaŭ, karmiła haspadynia jaho drenna, žyvioła haładała. Taksama abvinavačańnie nastojvała na tym, što dzieci Pašuk haładali. Paćviardžeńnia hetamu ŭ sudzie nie znajšłosia.

9 žniŭnia zavodčyk sabaki z Tałačyna zajaviŭ, što hatovy zabrać chaski nazad. Jaho prava ŭłasnaści na žyviołu paćvierdžana damovaj z Kaciarynaj Pašuk, padpisanaj u studzieni hetaha hoda pry kupli ščaniuka ŭ rasterminoŭku. Hrošy za sabaku abvinavačvanaja nie zapłaciła.

Pa rašeńni suda žyvioła budzie viernuta zavodčyku.

Zavodčyk padčas jaho dopytu ŭ sudzie 9 žniŭnia zajaviŭ, što chaski nie mahła mučyć žyvoha čałavieka. Viersija hibieli vaśmimiesiačnaj Anhieliny da taho, jak chaski adkusiŭ joj ruku, u sudzie nie praviarałasia. U toj ža čas u sudzie abnarodavalisia vyniki ekśpiertyz, zhodna ź jakimi ŭ vyparažnieńni sabaki nie było bijałahičnaha materyjału zahinułaj dziaŭčynki. A vieturač «Faŭny horada» adnaznačna zajaviŭ, što chaski ŭžyvaŭ miasa z kryvioju — heta było bačna pa jaho kału. Ručku zahinułaj Anhieliny tak nichto i nie znajšoŭ.

Advakat Kaciaryny Pašuk Vasil Łušnikaŭ upeŭnieny, što kvalifikacyja jaje dziejańniaŭ pa č. 3 art. 159 KK «zavyšanaja» i jany ŭtvarajuć tolki skład złačynstva pa č. 2 art. 159 KK.

Pavodle jaho słoŭ, zastałosia niavyśvietlenym, čamu sabaka napaŭ na dzicia, nie dakazana, što žyvioła haładała, i abvinavačańnie budavałasia na zdahadkach. «Heta spadar niaščasny vypadak», — upeŭniena zajaviŭ abaronca padčas sprečak 9 žniŭnia i ŭ čarhovy raz papraknuŭ byłych mužoŭ Kaciaryny ŭ biaździejnaści.

Advakat byŭ aburany tym, što abvinavačańnie, akramia maładości, nie ŭbačyła inšych akaličnaściaŭ, jakija źmiakčajuć vinu Pašuk. Asabista jon upeŭnieny ŭ jaje poŭnym raskajańni, uśviedamleńni viny. U abvinavačvanaj zastajucca dvoje małaletnich dziaciej, i, choć jany žyvuć u baćkoŭ, baćkoŭskich pravoŭ jaje nichto nie pazbaŭlaŭ.

Akramia taho, abaronca źviarnuŭ uvahu suda na psichałahičnyja traŭmy, atrymanyja Pašuk. U 13-hadovym uzroście na jaje vačach była zabitaja maci. 3 lipienia 2008 hoda dziaŭčyna paciarpieła ŭ vyniku terakta na Dzień Niezaležnaści ŭ Minsku.

«Jana vychoŭvała adna traich dziaciej bieź jakoj-niebudź, akramia babulinaj, dapamohi», — zajaviŭ advakat 9 žniŭnia.

• 0
• 0
• 0
• 0
• 0
• 0
• 0
• 0