Hałasavańnie na vybarach nie pavinna być štučnym, zajaviŭ siońnia Alaksandr Łukašenka ŭ čas rabočaj sustrečy sa staršynioj Centrvybarkama Lidzijaj Jarmošynaj.
«U nas pačałosia daterminovaje hałasavańnie. Ja chacieŭ by źviarnuć i vašu ŭvahu, i tych, chto arhanizoŭvaje vybary, adkazvaje za ich na miescach, kab nie było ŭ nas ničoha štučnaha, kab my nie hnali ludziej na vybary, kab my dastojna ich praviali, kab heta sapraŭdy było śviata i my razumieli, što robim heta dla svajoj krainy i naroda», — skazaŭ Alaksandr Łukašenka.
Kiraŭnik krainy adznačyŭ, što, viadoma, jamu chaciełasia b, kab na vybary pryjšło jak maha bolš ludziej. «Heta pakazčyk suviazi pamiž uładaj i narodam, pakazčyk acenki ludźmi parłamienckich vybaraŭ, roli deputataŭ, parłamienta ŭ žyćci našaha hramadstva i dziaržavy.
Ale tym nie mienš padkreślivaju: zahaniać ludziej na ŭčastki nie treba, treba ich paprasić. Treba paprasić, kab ludzi pryjšli i prahałasavali», — źviarnuŭ uvahu kiraŭnik dziaržavy.
Pry hetym, adznačyŭ Alaksandr Łukašenka, jość mierkavańni, što Zachad daść nizkuju acenku vybaram, kali budzie vialiki pracent daterminovaha hałasavańnia.
«Ja miarkuju, nam hetaha bajacca nie treba. Vielmi surjoznyja srodki masavaj infarmacyi praanalizavali inšyja krainy — tam nichto nie napružvajecca z hetaj nahody. Nadvorje na hetym tydni budzie vydatnaje, ludzi buduć siadzieć na leciščach, na bierazie voziera, buduć zajmacca svaimi pytańniami, i kožny budzie vybirać momant, kali jamu lepš prahałasavać», - padkreśliŭ kiraŭnik krainy.
Pa słovach kiraŭnika dziaržavy, u suviazi z zajmanaj pasadaj jamu było b lepš prahałasavać daterminova. «Ale ja tak padumaŭ, što, kali daterminova prahałasuju, pierakulicca śviet, u krajnim vypadku ŭ Biełarusi heta miesca raźvierźniecca, budzie vielizarnaja biezdań.
I ja ŭžo adkidaju ŭsie pytańni — źbirajusia prahałasavać ŭ niadzielu, jak zvyčajna. Tamu nie treba napružvacca — daterminova ci nie daterminova. Hałoŭnaje, kab čałaviek prahałasavaŭ. My heta robim dla svajho naroda», — padkreśliŭ biełaruski lidar.
«Pačnie pracavać novy parłamient, cicha, spakojna budziem žyć i pracavać. Hałoŭnaje, kab hetaja palityčnaja kampanija nie parušyła mir i spakoj u našaj krainie. Nam jon vielmi nieabchodnym. Tamu ja źviartajusia da ludziej, kab jany pryjšli i prahałasavali na hetych vybarach tak, jak ličać patrebnym»,— zaklikaŭ kiraŭnik dziaržavy.
Lidzija Jarmošyna adznačyła, što vialikaja kolkaść žurnalistaŭ źbirajucca aśviatlić ŭdzieł prezidenta ŭ hałasavańni.
Na što Alaksandr Łukašenka adkazaŭ: «Usie pierajmajucca, dzie prapaŭ małodšy syn. Ja ž čytaju ŭ tym liku ŭsiaki brud. Ja abaviazkova z małodšym synam pryjdu, jak zvyčajna. I dzieci prahałasujuć».
Ciapier čytajuć
Prosty biełarus ździviŭ ludziej, kali ŭ Hiermanii pryznavaŭsia ŭ lubovi da Łukašenki. Ale akazałasia, što jon niaprosty19
Kamientary