Napiaredadni dnia vybaraŭ deputataŭ Pałaty pradstaŭnikoŭ niezaležnaha kandydata pa Kalinoŭskaj akruzie № 108 Viktara Kułaka pazbavili akredytacyi.
U piatnicu, 9 vieraśnia, Viktar raspavioŭ «Našaj Nivie», što na ŭčastak №637, jaki mieścicca ŭ Centry hreka-rymskaj baraćby, masava zhaniajuć studentaŭ. U dadatak kamisija padaje zavyšanuju kolkaść hałasoŭ.
U subotu, 10 vieraśnia, staršynia hetaj učastkovaj kamisii Anatol Šabielnik pazbaviŭ jaho akredytacyi.
«Ja chacieŭ sfatahrafavać zapiačatanuju skryniu, ale jak tolki dastaŭ fotaaparat, kab heta zrabić, staršynia kamisii skazaŭ, što pazbaŭlaje mianie akredytacyi, — raspaviadaje Viktar Kułak. — Raniej jon papiaredžvaŭ, što tak i zrobić, kali ja pasprabuju sfatahrafavać skryniu. Adnak pavodle Vybarčaha kodeksu vybary pavinny pravodzicca svabodna i hałosna».
Pierad hetym naziralnik sustreŭsia z pradstaŭnikami ABSIE i paviedamiŭ im pra ŭsie zaŭvažanyja im parušeńni. Jon zaklikaŭ ich paŭpłyvać na toje, kab była praviedzienaja pravierka i vybary na hetym učastku pryznali niesapraŭdnymi.
«Akramia hetaha, jość i jašče adno parušeńnie. Ja zapytaŭsia ŭ staršyni kamisii Anatola Šabielnika, ci było praviedziena pasiedžańnie pa razhladzie majoj skarhi z apisańniem zaŭvažanych parušeńniaŭ, jakuju ja im padaŭ. U adkaz prahučała, što staršynia razhledzieŭ jaje sam, biez pasiedžańnia. Heta taksama supiarečyć zakanadaŭstvu i pakazvaje jaho niekampietentnaść», — dadaŭ naziralnik.
Ciapier jon maje namier źviarnucca ŭ CVK i prakuraturu.
Kamientary