Biełaruś naroščvaje naftavy patencyjał u Rasii

Dziaržkampanija «Biełarusnafta» maje namier aktyŭna raźvivać svoj biznes u Rasii. 21 vieraśnia ŭ Ciumieni, rehijon jakoj źjaŭlajecca bazavym dla biełaruskaj kampanii, było padpisana niekalki pierśpiektyŭnych pahadnieńniaŭ.

U pryvatnaści, Ciumienskaja vobłaść i Biełaruś zaklučyli pahadnieńnie ab sumiesnaj dziejnaści. Dakumient padpisali ministr pryrodnych resursaŭ i ekałohii RF Siarhiej Danski, ministr pryrodnych resursaŭ i navakolnaha asiarodździa Biełarusi Andrej Kaŭchuta i hubiernatar Ciumienskaj vobłaści Uładzimir Jakušaŭ.

Hałoŭnaja tema pahadnieńnia — intehravańnie technałohij i mahčymaściaŭ biełaruskich kampanij u naftahazavy siektar Zachodniaj Sibiry. U ramkach trochbakovaha pahadnieńnia ŭ Ciumieni adkryjecca filijał Biełaruskaha navukova-daśledčaha i prajektnaha instytuta nafty. Heta adno z padraździaleńniaŭ «Biełarusnafty».

Jašče adzin važny punkt trochbakovaha pahadnieńnia — harmanizacyja novaj kłasifikacyi zapasaŭ i resursaŭ vuhlevadarodnaj syraviny.

«Adkryćcio filijała dazvalaje vyjści na rynak servisnych i navukova-servisnych pasłuh Rasii i mienavita Ciumienskaj vobłaści, jakaja źjaŭlajecca ŭ RF najbujniejšaj u hetaj śfiery. My ŭžo tut pracujem, ale chočam umacavać inavacyjny patencyjał. My atrymajem mahčymaść pracavać pa technałohijach, jakija majuć bolš vysokuju dadanuju vartaść», — skazaŭ hiendyrektar «Biełarusnafty» Alaksandar Lachaŭ u kułuarach Ciumienskaha naftahazavaha forumu.

Dalejšyja płany pracy ŭ Rasijskaj Fiederacyi «Biełarusnafta» taksama źviazvaje z nabyćciom novych radoviščaŭ. Jość užo takija na prykmiecie? «Hladzim rynak. U pieršuju čarhu nas cikavić Ciumienskaja vobłaść, u jakoj my ŭžo pracujem, kab źnizić transpartna-łahistyčnyja vydatki», — adkazaŭ kiraŭnik «Biełarusnafty».

Padpisanyja siońnia pahadnieńni Lachaŭ nazvaŭ «krokami ŭ adnym kirunku, u tym liku i zdabyčy». «Heta kambinavany padychod, jaki dazvalaje pracavać i zarablać nie tolki na zdabyčy, ale i na servisie. Siońnia čym bolš vysokatechnałahičny servis, tym bolš mahčymaści atrymać dadatkovy prybytak», — rastłumačyŭ hiendyrektar dziaržkampanii.

Padvodziačy vyniki 10-hadovaj pracy na rasijskim rynku, Alaksandr Lachaŭ adznačyŭ toje, što «Biełarusnafta» «poŭnaściu adnaviła toj praces, jaki byŭ pry Savieckim Sajuzie». «My ŭžo try hady pracujem u zdabyčy ŭ Rasii. Pry SSSR byŭ tolki vachtavy mietad. A ciapier u nas svaje licenzijnyja ŭčastki. Heta značyć, my atrymali dośvied pracy jak u servisie, tak i ŭ zdabyčy, jaki dazvalaje mieć zakončany cykł», — skazaŭ kiraŭnik «Biełarusnafty».

Jon nie staŭ ahučvać finansavyja vyniki pracy ŭ Rasii. «Mahu tolki skazać, što heta ŭsio pracesy ekanamičnyja vyhadnyja. Ekanomika całkam prystojnaja», — skazaŭ Lachaŭ.

Zdabyvajučaja «dačka» «Biełarusnafty» «Janhpur» viadzie pracu na 5 radoviščach, raźmieščanych u Jamała-Nienieckaj aŭtanomnaj akruzie. Ahulny abjom vymanych zapasaŭ i resursaŭ kampanii składaje zvyš za 40 młn t, hadavaja zdabyča nafty i hazavaha kandensatu — kala 150 tys. t tavarnaha praduktu, pryrodnaha hazu — kala 70 młn kub. m. Realizavany zdabyvajučy patencyjał NK «Janhpur», pryviedzieny da ton naftavaha ekvivalentu (n. e.), składaje kala 320 tys. t n. e. u hod.

U horadzie Hubkinski JANAA pracuje servisnaje daččynaje pradpryjemstva «Biełarusnafty» — «Biełarusnafta-Sibir». U 2016 h. u kampanii pracavali 7 bryhad pa adnaŭleńni śvidravin mietadam bureńnia bakavych stvałoŭ, 29 bryhad kapitalnaha i biahučaha ramontu śvidravin i transpartnaje padraździaleńnie.

• 0
• 0
• 0
• 0
• 0
• 0
• 0
• 0