Dvoje biznesmienaŭ sa śpisu najbahaciejšych ludziej Rasiei «pradali» babuli Aliny Kabajevaj kvatery 

Dvoje biznesmienaŭ, jakija ŭvachodziać u śpis najbahaciejšych ludziej Rasii pa viersii Forbes, — Hienadź Cimčanka i Piotr Kołbin, — pradali try kvatery ŭ elitnych rajonach Maskvy i Sankt-Pieciarburha babuli staršyni rady dyrektaraŭ «Nacyjanalnaj miedyja hrupy», alimpijskaj čempijonki pa mastackaj himnastycy Aliny Kabajevaj. Dakumienty, jakija paćviardžajuć fakty ździełak, jość u rasparadžeńni telekanała «Dožd́».

Pavialičyć

Havorka idzie pra dźvie kvatery ŭ domie na Arbacie ŭ Maskvie i kvateru ŭ domie ź vidam na Pietrapaŭłaŭski sabor u centry Sankt-Pieciarburha. Zhodna z vypiskami z adzinaha dziaržaŭnaha rejestra pravoŭ na nieruchomuju majomaść (JEHRP), hetaja nieruchomaść u śniežni 2015 hoda była pieraaformlena biznesmienami Hienadziem Cimčankam i Piatrom Kołbinym na imia Hanny Zacapilinaj. Tak kličuć babulu Aliny Kabajevaj.

Płošča dźviuch susiednich dvuchpakajovych kvater Zacapilinaj u Maskvie — 601 kvadratny mietr; płošča pieciarburhskaj nieruchomaści — 211 kvadratnych mietraŭ.

Pa adrasie Arbat, 18, dzie byli kvatery Kołbina, raźmieščany siamipaviarchovy dom kłubnaha typu ź vidam na Stary Arbat. U 2009 hodzie «Novaja hazieta» pisała, što ŭ budynku raźmieščana ŭsiaho 10 kvater. Dom na Mytninskaj nabiarežnaj, 3 u Sankt-Pieciarburhu znachodzicca nasuprać vostrava, dzie raźmieščana Pietrapaŭłaŭskaja krepaść. Trochpaviarchovy dom pabudavany ŭ 1899 hodzie, u 2002 hodzie da jaho była dabudavana dvuchpaviarchovaja mansarda. Da rekanstrukcyi historyk architektury Andrej Punin zaličvaŭ dom da «najlepšych uzoraŭ poźniaj eklektyki na Pietrahradskim baku».

Heta nie ŭsia elitnaja nieruchomaść, jakaja pierajšła Zacapilinaj u apošni čas. U sakaviku 2016 hoda ahienctva Reuters apublikavała materyjał pra partniora Arkadzia Ratenbierha Ryhora Bajeŭskaha, jaki, jak śćviardžajuć žurnalisty, pieradavaŭ abo pradavaŭ nieruchomaść niekalkim žančynam, «źviazanym z prezidentam Uładzimiram Pucinym».

Spasyłajučysia na materyjały mižnarodnaj Arhanizacyi žurnalistaŭ-śledčych, ahienctva raskazała, što Bajeŭski pieradavaŭ elitnuju nieruchomaść Kaciarynie Cichanavaj (jaje Reuters raniej nazyvała małodšaj dačkoj rasijskaha prezidenta), studentcy Alisie Charčovaj, jakaja paziravała dla kalendara da dnia naradžeńnia Pucina, i dźvium svajačkam Aliny Kabajevaj — siastry Lejsan Kabajevaj i babuli Hańnie Zacapilinaj. Tady pres-sakratar prezidenta Dźmitryj Piaskoŭ admoviŭsia kamientavać materyjał Reuters, nazvaŭšy jaho «infarmacyjnym ukidam», jaki byŭ ažyćcioŭleny z metaj «razhajdać situacyju ŭ krainie».

• 0
• 0
• 0
• 0
• 0
• 0
• 0
• 0