Urad Biełarusi prapanavaŭ Jeŭrapiejskamu banku rekanstrukcyi i raźvićcia pravieści pieradprodažnuju padrychtoŭku piaci dziaržpradpryjemstvaŭ, paviedamiŭ na pres-kanfierencyi ŭ Minsku 27 vieraśnia kiraŭnik pradstaŭnictva JEBRR u Biełarusi Fransis Delej.
Hety kirunak pracy praduhledžvaje novaja krainavaja stratehija banka, zaćvierdžanaja ŭ vieraśni hetaha hoda, adznačyŭ Delej, adkazvajučy na pytańnie BiełaPAN pra płany pa pašyreńni supracoŭnictva JEBRR ź siektaram dziaržpradpryjemstvaŭ Biełarusi.
U pryvatnaści jon źviarnuŭ uvahu, što siońnia JEBRR paśpiachova zajmajecca pieradprodažnaj padrychtoŭkaj dziaržaŭnaha «Bielinviestbanka».
«My vykarystoŭvajem prykład «Bielinviestbanka» dla taho, kab abmiarkoŭvać z uradam mahčymaść paŭtareńnia hetaj historyi ź dziaržaŭnym «Bankam Maskva-Minsk». Taksama my atrymali zapyt ad urada na akazańnie sadziejničańnia ŭ pryvatyzacyi piaci bujnych dziaržaŭnych pradpryjemstvaŭ», — skazaŭ Fransis Delej.
Pa ŭsich piaci prajektach, dadaŭ jon, JEBRR pracavać nie zmoža, bo pieradprodažnaja padrychtoŭka — dastatkova zatratny zaniatak.
«Ciapier my pravodzim kompleksnuju acenku piaci takich pradpryjemstvaŭ, kab vybrać adno ź ich», — rastłumačyŭ Fransis Delej.
Pry hetym jon dadaŭ, što pakul nie moža nazvać biełaruskija dziaržkampanii, kompleksnaj acenkaj jakich zajmajecca JEBRR.
«Mahu tolki skazać, što kali budzie pryznačanaje pradpryjemstva, pieradprodažnaj padrychtoŭkaj jakoha my budziem zajmacca, my padpišam miemarandum, u jakim buduć vykładzienyja ŭsie nastupnyja kroki», — skazaŭ Delej.
Kali pieradpryvatyzacyjnaja praca budzie zavieršanaja, rastłumačyŭ jon, na abranaje dziaržpradpryjemstva pryjdzie stratehičny inviestar. «My ličym, što pytańnie ab pryciahnieńni stratehičnaha inviestara moža być vyrašanaje na praciahu piaci-šaści hadoŭ», — vykazaŭ mierkavańnie Delej.
***
Jak raniej paviedamlałasia, u pačatku vieraśnia JEBRR pryniaŭ novuju čatyrochhadovuju stratehiju dla Biełarusi. U joj adznačajecca, što ŭ suviazi ź niadaŭnimi źmienami ŭ rehijanalnaj hieapalityčnaj abstanoŭcy Biełaruś stała demanstravać vialikuju adkrytaść na mižnarodnym uzroŭni i vialikuju hatoŭnaść da abmierkavańnia palityčnaj situacyi ŭnutry krainy, u tym liku pytańniaŭ, źviazanych z vykanańniem pravoŭ čałavieka. Hetyja pazityŭnyja źmieny, a taksama reakcyja na ich mižnarodnaj supolnaści «stvaryli novy palityčny kantekst dla dziejnaści JEBRR» u Biełarusi i «adkryli mahčymaści dla bolš aktyŭnaha ŭzajemadziejańnia ź biełaruskimi ŭładami», havorycca ŭ dakumiencie.
JEBRR, u pryvatnaści, zajaviŭ pra hatoŭnaść padtrymlivać inicyjatyvy ŭrada pa praviadzieńni kankretnych reformaŭ inviestycyjami i techničnaj dapamohaj dla raźvićcia pryvatnaha siektara, sadziejničańnia pryvatyzacyi, a taksama pavyšeńnia ŭstojlivaści hramadskaj infrastruktury na asnovie kamiercyjnych rašeńniaŭ.
Nahadajem, stratehija JEBRR na 2013—2015 hady nie praduhledžvała finansavańnia biełaruskaha dziaržsiektara. Na sustrečy z prezidentam JEBRR Sumam Čakrabarci 18 lutaha 2016 hoda ŭ Minsku Alaksandr Łukašenka paprasiŭ źniać «usiakija abmiežavańni pa supracoŭnictvie ź Biełaruśsiu».
***
Biełaruś źjaŭlajecca paŭnapraŭnym členam JEBRR z 1992 hoda. Z pačatku svajoj dziejnaści ŭ Biełarusi ŭ 1992 hodzie bank inviestavaŭ pryblizna 1,8 młrd jeŭra ŭ ramkach prykładna 70 prajektaŭ u roznych siektarach ekanomiki krainy. Važnuju rolu ŭ dziejnaści JEBRR u Biełarusi tradycyjna majuć inicyjatyvy ŭ śfiery enierhaefiektyŭnaści i klimatyčnych źmienaŭ, jakija pavinny atrymać dadatkovy impuls u kantekście pierachodu da zialonaj ekanomiki.
Ciapier čytajuć
Zahinuŭ biełaruski dobraachvotnik Vasil «Dzir» Rapicki12
Kamientary