Da pravaabaroncaŭ-viasnoŭcaŭ źviarnułasia mama niepaŭnaletniaha A., jakaja raskazała, što jaje syna i jaho siabra M. supracoŭniki minskaha AMAPu źbivali ŭ aŭtazaku i pahražali seksualnaj raspravaj. Paźniej chłopcaŭ abvinavacili ŭ hvałcie ŭ dačynieńni da supracoŭnika AMAPu, piša spring96.org.
Tak, uviečary 18 lipienia 2016 niepaŭnaletnija A. i M. špacyravali pa Centralnym rajonie h. Minska, vypili nievialikuju kolkaść ałkaholnych napojaŭ, trochi paźniej paznajomilisia z kampanijaj padletkaŭ. Kali apošnija daviedalisia, što chłopcy vypivali, papiaredzili, što niedaloka znachodzicca adździaleńnie milicyi, i paraili iści na bližejšy prypynak hramadskaha transpartu. A. i M. pasłuchalisia paradaŭ, adnak, nie paśpieli dajści da miesca, jak ich paklikali supracoŭniki AMAPu. Chłopcy spałochalisia zatrymańnia, stali ŭciakać. Praź niekatory čas, jany paličyli, što ich bolš nie dahaniajuć, spakojnym krokam praciahnuli iści da prypynku. Ale niečakana da ich zzadu padbieh supracoŭnik AMAPu i biespadstaŭna ŭdaryŭ kułakom u hałavu M., z-za čaho toj upaŭ. A. staŭ znoŭ uciakać, adnak, viarnuŭsia i ŭbačyŭ, što M. usio jašče lažyć na ziamli i ŭ jaho pad vokam vielizarnaja hiematoma.
Paśla hetaha chłopcaŭ pahruzili ŭ aŭtazak i pavieźli na miedycynski ahlad. U śpiecmašynie znachodziłasia jašče troje niepaŭnaletnich zatrymanych chłopcaŭ.
Kali aŭtazak kranuŭsia, A. padyšoŭ da supracoŭnika AMAPu Aleha Šarko i chacieŭ paprasić, kab mašynu spynili, tamu što jamu stała kiepska. Mašyna stała prytarmažvać, A. prosta nie ŭtrymaŭsia i zvaliŭsia na Šarko.
Paśla hetaha amapaŭcy pačali rukami i nahami bić pa hałavie i tułavie nie tolki A., ale i jaho siabra M., zatym pakłali ich tvaram u padłohu, nadzieli kajdanki za śpinoj i praciahnuli źbivać.
Źbićcio praciahvałasia doŭha i płanamierna, ale samaje horšaje pačałosia, kali troje, što siadzieli ŭ aŭtazaku śviedkaŭ, pakinuli jaho. Da chłopcaŭ nabliziŭsia adzin z supracoŭnikaŭ AMAPu i vykazaŭ škadavańnie, što im niama 18 hadoŭ, inakš jon z zadavalnieńniem by ažyćciaviŭ nad imi hvałtoŭny analny pałavy akt, i ŭ budučyni jany ŭ miescach pazbaŭleńnia voli stali b asobami ź nizkim sacyjalnym statusam. Paśla takich pahroz ich abiazrušyli tvaram uniz, pačuŭsia huk zdymajemych štanoŭ, M. i častkova A. na hałovy paliłasia niejkaja vadkaść.
Paśla nieadnarazovych skarhaŭ, u dziaciej byŭ uziaty zrez vałasoŭ i hienietyčnaja ekśpiertyza paćvierdziła na hałavie ślady mačy. Adnak, pravierka nie zmahła ŭstanavić, chto kankretna z supracoŭnikaŭ pravaachoŭnych orhanaŭ heta zrabiŭ.
Hvałtoŭnyja dziejańni ŭ dačynieńni da chłopcaŭ taksama paćviardžajucca vynikami miedycynskaha ahladu i pakazańniami śviedak.
«Majho syna ciapier abvinavačvajuć u kryminalnym złačynstvie — hvałcie ŭ dačynieńni da supracoŭnika AMAP, jaki vyjaviŭsia ŭ naniasieńni jamu ŭdaru pa tvary. Ale heta nie praŭda — u syna prablemy z sercam, i jon pra heta kazaŭ, kali prasiŭ spynić mašynu», — raspaviadaje mama A.
Jana ličyć, što paśla taho, jak AMAPaŭcy ŭśviadomili, što narabili, jany napisali zajavu na niepaŭnaletnich A. i M., adnak, paźniej skazali, što biŭ tolki adzin — mienavita jaje syn.
Jak śćviardžaje paciarpieły supracoŭnik AMAPa Aleh Šarko, paśla taho, jak aŭtazak kranuŭsia, chłopiec padniaŭsia z łaŭki, padyšoŭ i ŭdaryŭ jaho pa tvary.
Taksama na padletkaŭ skłali pratakoły ab administracyjnym pravaparušeńni pa art. 17.3 KaAP, dzie standartnymi vyrazami havarycca: «znachodziŭsia ŭ pjanym vyhladzie ŭ hramadskim miescy, chistaŭsia z boku ŭ bok, u navakolnaj abstanoŭcy aryjentavaŭsia słaba».
Pravaabaroncy ŭ svaim paviedamleńni ŭkazvajuć proźviščy troch supracoŭnikaŭ AMAP, jakija majuć dačynieńnie da incydentu. Usie jany viaduć staronki ŭ sacyjalnych sietkach, źmiest jakich kaža, što jany sapraŭdy pracujuć u vajskovaj čaści 3214 (śpiecnaz MUS).
Amapaŭcy śćviardžajuć, što nie nanosili dzieciam nivodnaha ŭdaru.
«Uźnikaje pytańnie: kali padletki byli nastolki pjanyja, jak jany zmahli ŭciačy ad AMAPu? Abo ŭ vajskovaj častcy nastolki kulhaje padrychtoŭka, što bajcy nie zdolnyja dahnać dvuch chistkich niepaŭnaletnich pjanych chłopcaŭ?» — zadajecca pytańniami mama A.
Jana ŭžo źviarnułasia sa skarhami ab niepravamiernym užyvańni fizičnaj siły supracoŭnikami AMAPa da A. i M. ŭ prakuraturu, Ministerstva ŭnutranych spraŭ i Śledčy kamitet.
Žančyna znajšła staronki ŭ sacyjalnaj sietcy supracoŭnikaŭ AMAPa i ździviłasia, kolki ahresii ŭ ich statusach i na fotazdymkach.
Pravaabaronca Pavieł Sapiełka padkreślivaje:
«Niezaležna ad taho, ci źjaŭlajucca niepaŭnaletnija vinavatymi ŭ pravaparušeńniach, prymianieńnie ŭ dačynieńni da ich žorstkaha, biesčałaviečnaha, źnievažalnaha abychodžańnia niedapuščalna. Pa kožnym fakcie takoha zvarotu pavinna pravodzicca abjektyŭnaja pravierka, i vinavatyja asoby pavinny pryciahvacca da adkaznaści. U dadzienaj situacyi składvajecca ŭražańnie, što pravierka była nieabjektyŭnaj i niapoŭnaj. Tym bolš, što, pa źviestkach pravaabaroncaŭ, apytanyja byli nie ŭsie śviedki biasčynstvaŭ pravaachoŭnikaŭ».
Ciapier čytajuć
«Lublu, kali biełarusy biełarusiacca»: u sacsietkach žartujuć z nadvorja i abmiarkoŭvajuć prablemy3
Kamientary