Biełaruski pravaabaronca nakiravaŭ adkryty list Papu Francišku

Kaardynatar kampanii «Pravaabaroncy suprać śmiarotnaha pakarańnia» Andrej Pałuda ŭ adkrytym liście Papu rymskamu prosić kiraŭnika katalickaj carkvy abmierkavać admienu vyšejšaj miery pakarańnia z Alaksandram Łukašenkam. Pra heta pravaabaronca paviedamiŭ na prezientacyi 5 kastryčnika sumiesnaha dakłada pravaabarončaha centra «Viasna» (pazbaŭleny aficyjnaj rehistracyi ŭ 2003 hodzie) i Mižnarodnaj fiederacyi za pravy čałavieka (FIDH) «Śmiarotnaje pakarańnie ŭ Biełarusi: zabojstvy na (nie)zakonnych padstavach».

«Respublika Biełaruś źjaŭlajecca apošniaj krainaj u Jeŭropie i na postsavieckaj prastory, dzie na praktycy vykarystoŭvajecca śmiarotnaje pakarańnie, — havorycca ŭ liście Pałudy. — Ja i maje kalehi na praciahu doŭhich hadoŭ prykładajem usie mahčymyja namahańni dla taho, kab taki varvarski vid pakarańnia staŭ historyjaj na jeŭrapiejskim kantyniencie. Na žal, tolki našych namahańniaŭ pakul niedastatkova… Źviartajusia da Vas pa dapamohu».

Dalej Pałuda prosić Papu padniać pytańnie admieny śmiarotnaj kary pry sustrečy z Alaksandram Łukašenkam padčas mahčymaha vizitu pantyfika ŭ Biełaruś.

«Paśla asabistaj sustrečy z Vami, jakaja adbyłasia ŭ mai 2016 hoda, Łukašenka zajaviŭ, što jon z Vami vielmi blizki ideałahična, što ŭ vas adnolkavyja pryncypy i pohlady na śvietaŭładkavańnie, raźvićcio. Ja ź vialikaj nadziejaj uspryniaŭ hetuju infarmacyju», — adznačyŭ Pałuda, dadaŭšy, što Papa, jak i katalickaja carkva ŭ cełym, źjaŭlajecca praciŭnikam śmiarotnaha pakarańnia.

Pravaabaronca patłumačyŭ, što jon i jaho kalehi vykarystoŭvajuć usie mahčymaści, kab Biełaruś pajšła pa šlachu cyvilizavanych krain i spyniła praktyku rasstrełu hramadzian. List, pavodle słoŭ Andreja Pałudy, Papu pieradała Ludmiła Čykunova — viadomaja praciŭnica śmiarotnaha pakarańnia. Jaje syn byŭ niezakonna pryhavorany da rasstrełu va Uźbiekistanie.

Adznačym, što raniej pietycyju za admienu śmiarotnaha pakarańnia ŭ Biełarusi padpisali takija viadomyja asoby, jak muzykanty Łaryn, Stynh, Lavon Volski, piśmieńniki Uładzimir Arłoŭ, Śviatłana Aleksijevič i inšyja.

Biełaruś zastajecca apošniaj krainaj u Jeŭropie i na postsavieckaj prastory, dzie da hetaha času ŭžyvajecca śmiarotnaje pakarańnie. Z 1991 hoda pa prysudach było rasstralana bolš za 400 čałaviek. Viadomy tolki adzin vypadak, kali asudžanaha na śmierć pamiłavaŭ prezident. Pakarańnie ŭ hetym vypadku było zamienienaje na praciahły termin pazbaŭleńnia voli.

Na hety momant śmiarotnaj kary čakajuć čatyry źniavolenyja: žychar Lidskaha rajona Ivan Kuleš (pryznany vinavatym u žorstkim zabojstvie troch pradaŭščyc), žychar Vilejki Hienadź Jakavicki (pryznany vinavatym u žorstkim zabojstvie sužycielki), žychar Minskaha rajona Siarhiej Chmialeŭski (pryznany vinavatym u žorstkim zabojstvie troch susiedziaŭ ), žychar Homiela Siarhiej Vostrykaŭ (pryznany vinavatym u žorstkim zabojstvie i zhvałtavańni dźviuch kalehaŭ). Pryhavory ŭ dačynieńni da nazvanych asob nabyli moc i mohuć być vykananyja ŭ luby momant.

• 0
• 0
• 0
• 0
• 0
• 0
• 0
• 0