Bundestah budzie pracavać z parłamientam Biełarusi, tabu na aficyjnyja kantakty źniata

Bundestah budzie na aficyjnym uzroŭni pracavać z abiedźviuma pałatami biełaruskaha parłamienta. Niefarmalnaj zabarony na kantakty z Pałataj pradstaŭnikoŭ bolš niama. Pra heta ŭ intervju Tut.by raspaviali deputaty parłamienta Hiermanii Ute Finkie-Kremer i Olivier Kačmarek, jakija pabyvali ŭ Minsku z trochdzionnym vizitam.

Delehacyja bundestaha ŭpieršyniu na aficyjnym uzroŭni sustrelisia z kalehami nie tolki z Savietam Respubliki (vierchniaja pałata), uklučajučy Michaiła Miaśnikoviča, ale i z deputatami Pałaty pradstaŭnikoŭ — ad jaje na sustrečy byŭ Vital Buśko. Tradycyjna jeŭrapiejskija deputaty paźbiahali takich aficyjnych kantaktaŭ, nie pryznajučy Pałatu pradstaŭnikoŭ lehitymnym parłamientam.

— Heta vynik palityčnych krokaŭ, zroblenych za apošni hod, - skazaŭ Olivier Kačmarek. — Ja kažu pra vyzvaleńnie palitviaźniaŭ, mirnyja vybary i kanstruktyŭnuju rolu Minska ŭ urehulavańni situacyi va Ukrainie.

Z papiaredniaha dakładu ABSIE ab parłamienckich vybarach, deputaty Bundestahu zrabili vysnovu, što jany prajšli nie idealna, ale ź nievialikim prahresam. «Dalejšaje supracoŭnictva budzie zaležać ad taho, jak buduć vykonvacca rekamiendacyi ABSIE», - skazała Ute Finkie-Kremier.

Adkazvajučy na pytańnie ab tym, ci aznačaje farmat hetaha vizitu pryznańnie biełaruskaha parłamienta Bundestaham, deputat padkreśliła:

— Niama takoha farmalnaha akta - pryznańnie parłamienta. Ale paśla vyvučeńnia vynikovaj spravazdačy ABSIE ab vybarach, my, chutčej za ŭsio, upieršyniu za šmat hadoŭ nakirujem zaprašeńnie vašym deputatam pryjechać u Bierlin. Heta znak taho, što biełaruski parłamient choć u niejkaj stupieni abrany naležnym čynam.

U pieršyja dni pracy novaha biełaruskaha parłamienta ŭ im sfarmirujuć hrupu siabroŭstva z Bundestaham, paviedamiŭ na sustrečy Michaił Miaśnikovič.

Pa słovach Finkie-Kremier, nielha stavicca da biełaruskaha parłamienta krytyčniej, čym da rasijskaha, kitajskaha abo azierbajdžanskaha. Z usimi z hetych orhanaŭ u Bundestahu aficyjnyja kantakty jość.

— Možna skazać, što tabu na takija kantakty źniata i ŭ dačynieńni da parłamienta Biełarusi.

Na dumku surazmoŭcy, niama pryčyn taho, kab biełaruskija deputaty nie byli pradstaŭleny ŭ parłamienckim vymiareńni Uschodniaha partniorstva («Jeŭraneście» u adroźnieńnie ad svaich kaleh ź inšych ŭschodniejeŭrapiejskich krain: «Ja była naziralnikam u Azierbajdžanie i ja viedaju pra prablemy na vybarach parłamienta tam».

Pa ŭražańniach hiermanskich deputataŭ, ich biełaruskija surazmoŭcy z aficyjnaha boku ščyra ličać adnosiny ź Bierlinam važnymi, i jany chočuć pracavać razam, jak u ABSIE, tak u budučyni — mieć bolš ciesnyja kantakty z Radaj Jeŭropy, kudy Biełaruś nie ŭvachodzić.

Deputaty Bundestaha na sustrečach padniali i prablemu śmiarotnaha pakarańnia. Pradstaŭniki aficyjnaha Minska, pa słovach Finkie-Kremier, pastajanna spasyłajucca na vyniki refierendumu 20-hadovaj daŭniny. «My im na heta kažam, što možna ŭvieści maratoryj. Jany skazali, što padumajuć nad hetym», - dadała deputat Bundestaha.

- Nam časta kažuć, što treba čas, treba iści maleńkimi krokami. Tak, my heta razumiejem. Ale ŭžo pryjšoŭ čas zrabić hetyja pieršyja kroki ŭ hetym kirunku, patrebien płan ruchu da admieny śmiarotnaha pakarańnia.

Olivier Kačmarek pryznaje, što ruch napierad u adnosinach ź Biełaruśsiu vyklikaje krytyku častki hramadzianskaj supolnaści.

- Naš dyjałoh nie značyć, što my admovilisia ad krytyki. Biełaruś robić maleńkija kroki, my robim maleńkija kroki. I kab praciahvać, my, naturalna, čakajem sustrečnych krokaŭ ź biełaruskaha boku, ŭstojlivaha ruchu napierad. Adkryłasia akno dla dyjałohu, i my chočam jaho vykarystoŭvać.

Akramia biełaruskich parłamientaryjaŭ, deputaty Bundestaha sustrelisia z kiraŭnikom MZS Uładzimiram Makiejem, namieśnik ministra ekanomiki, a taksama naviedali miemaryjał u Traściancy i azdaraŭlenčy centr dla dziaciej-čarnobylcaŭ «Nadzieja».

***

Parłamienckija vybary ŭ Biełarusi adbylisia 11 vieraśnia. Pa ich vynikach, upieršyniu za 12 hadoŭ u Pałatu pradstaŭnikoŭ prajšli dźvie apazicyjanierki — Alena Anisim i Hanna Kanapackaja. Naziralniki ABSIE zajavili, što vybary pa-raniejšamu nie adpaviadali demakratyčnym standartam, ale pa asobnych napramkach byŭ nievialiki prahres.

• 0
• 0
• 0
• 0
• 0
• 0
• 0
• 0