Prafsajuz REP patrabuje ad ministra adukacyi spynić praktyku ŭdziełu školnikaŭ u sielhasrabotach
Staršynia Biełaruskaha prafsajuza rabotnikaŭ radyjoelektronnaj pramysłovaści (REP) Alaksandr Fiadynič źviarnuŭsia z adkrytym listom da ministra adukacyi Michaiła Žuraŭkova.
U dakumiencie kiraŭnik prafsajuza REP patrabuje dać pravavuju acenku słužbovym asobam sistemy adukacyi, jakija vykarystoŭvajuć pracu dziaciej, i spynić praktyku ŭdziełu školnikaŭ u sielhasrabotach. Taksama Fiadynič patrabuje dać prafsajuzu infarmacyju ab słužbovych asobach sistemy adukacyi, jakija vykarystoŭvali ŭ 2016 hodzie pracu dziaciej va ŭzroście da 18 hadoŭ, a taksama ab słužbovych asobach, jakija addali ŭkazańnie na pryciahnieńnie da pracy vučniaŭ siaredniaj škoły № 11 horada Maładziečna ŭ cełym i vučanicy 8-ha kłasa hetaj škoły Viktoryi Papčeni, jakaja zahinuła 29 vieraśnia padčas sielhasrabot.
Načalnik Maładziečanskaha mižrajonnaha adździeła Minskaha abłasnoha ŭpraŭleńnia departamienta dziaržaŭnaj inśpiekcyi pracy ŭžo zajaviŭ pra parušeńni z boku tych, chto adpraviŭ 13-hadovuju školnicu na ŭborku bulby. Pavodle infarmacyi, jakuju atrymaŭ prafsajuz REP ad baćkoŭ zahinułaha dziciaci, svajoj zhody na ŭdzieł dziaŭčynki ŭ tak zvanaj «hramadska-karysnaj pracy» baćki nie davali, što dazvalaje śćviardžać ab vykarystańni prymusovaj dziciačaj pracy ź pieraryvańniem navučalnaha pracesu.
Jak paviedamiŭ pravaabaronca, pravavy inśpiektar prafsajuza REP Leanid Sudalenka, taksama na sajcie zvarot.by ciapier źbirajucca podpisy za toje, kab spynić praktyku rabskaj pracy, jakaja doŭžycca z časoŭ SSSR, kali biełaruskich školnikaŭ zamiest vučoby prymusova vyvoziać na sielhasraboty.
Sudalenka ciapier akazvaje jurydyčnuju dapamohu siam`i zahinułaj školnicy. «Farmalna praca školnikaŭ ličycca «dobraachvotnaj», a ŭ vypadku admovy ad pajezdak na sielhasraboty administracyja škoł, jak praviła, pahražaje vučniam sur`ioznymi niepryjemnaściami pa vučobie, što dazvalaje kazać ab vykarystańni prymusovaj dziciačaj pracy, zabaronienaj da taho ž biełaruskaj Kanstytucyjaj. Takim čynam, uźnikaje pytańnie, nakolki zakonna i abhruntavana prymianiać praktyku, kali biełaruskich dziaciej, jakija pavinny ŭ hety čas siadzieć za partami, adpraŭlajuć źbirać uradžaj», — havorycca ŭ zvarocie na zvarot.by. Karystalnikaŭ internetu prosiać prajavić salidarnaść i padpisać zvarot.
Ciapier čytajuć
Biełarusy sustrakajuć vyzvalenych palitviaźniaŭ u Vilni FOTY i VIDEA2
Kamientary