Słužba biaśpieki Ukrainy abvierhła infarmacyju pra pahrozu padniać źniščalniki dla viartańnia ŭ Kijeŭ samalota «Biełavii». Pra toje, što hetaja infarmacyja nie adpaviadaje rečaisnaści, zajaviŭ u efiry ŭkrainskaha telekanała «112 Ukraina» kiraŭnik aparata kiraŭnika SBU Alaksandr Tkačuk.
«Samalot užo niejki čas znachodziŭsia ŭ pavietry. Pavodle patrabavańnia avijadyśpietčara hety bort spakojna zrabiŭ adpaviednyja manieŭry i pryziamliŭsia ŭ aeraporcie, dzie byli praviedzieny nieabchodnyja pravieračnyja mierapryjemstvy, kab pierakanacca, što lubaja pahroza i nacyjanalnym intaresam Ukrainy, i nacyjanalnaj biaśpiecy našaj dziaržavy łakalizavanaja», — raspavioŭ jon.
Adkazaŭ Tkačuk i na pytańnie, ci praŭda, što ŭ pavietra pavinny byli padniacca źniščalniki.
«Ja dumaju, što heta krychu absurdna ličyć, što našy vajskovyja latalnyja aparaty mohuć być užytyja suprać hramadzianskaha borta», - skazaŭ jon.
U svaju čarhu pres-sakratar SBU Alena Hitlanskaja patłumačyła, što stała pryčynaj viartańnia samalota biełaruskaj avijakampanii.
Na svajoj staroncy ŭ Facebook jana paviedamiła, što SBU atrymała infarmacyju ab zamiežnym hramadzianinie i mahčymaj pahrozie nacyjanalnaj biaśpiecy dziaržavy.
«My nieadkładna prainfarmavali pra heta HP «Ukraeraruch». Da taho času, kali dyśpietčar źviazaŭsia ź piłotam, samalot užo niekalki chvilin znachodziŭsia ŭ pavietry», — paviedamiła Hitlanskaja.
Śpikier SBU dadała, što «paśla pravieračnych mierapryjemstvaŭ my pierakanalisia, što pahroza nacyjanalnaj biaśpiecy łakalizavanaja. SBU dziejničała i budzie dziejničać u ramkach kampietencyi dla zabieśpiačeńnia biaśpieki krainy i jaje hramadzianaŭ», - dadała jana.
Tym časam avijakampanija «Biełavija» praciahvaje nastojvać, što pahroza padniać źniščalniki ad Kijeva zychodziła.
«Zapis pieramovaŭ ekipaža z naziemnymi słužbami viadziecca na ŭsich samalotach. Kali spatrebicca, my jaje rasšyfrujem i damo, - zajaviŭ namieśnik hienieralnaha dyrektara biełaruskaj avijakampanii «Biełavija» Ihar Čarhiniec.
Kamientary