U Minsku 10 listapada projdzie pieršy łatvijska-biełaruski turystyčny biznes-forum.
Udzieł u im voźmuć ministr ekanomiki Łatvii Arviłs Ašeradens, dyrektar Łatvijskaha ahienctva inviestycyj i raźvićcia (LIAA) Andrys Ozałs, pradstaŭniki Ministerstva sportu i turyzmu Biełarusi, Nacyjanalnaha ahienctva pa turyźmie, a taksama biełaruskija i łatvijskija biznesmieny, paviedamili arhanizatary.
Forum adbudziecca ŭ miežach Dzion Łatvii, jakija projduć z 10 listapada pa 10 śniežnia. Na praciahu miesiaca zapłanavanyja prezientacyi łatvijskich charčovych tavaraŭ u sietcy mahazinaŭ «Rubloŭski» i «Prestan», dzie možna budzie pakaštavać i nabyć pradukty łatvijskaj vytvorčaści.
U miežach prahramy Dzion Łatvii 11 listapada adbudziecca majstar-kłas łatvijskich kucharaŭ, jakija pradstaviać łatvijskuju nacyjanalnuju kuchniu.
15 listapada adkryjecca vystava i projdzie majstar-kłas viadomaha łatvijskaha dyzajniera i ilustratara mody Bajby Ładyhi, jakaja doŭhi čas žyła ŭ Kitai.
23 listapada pačnie pracavać vystava pra Łatviju biełaruskaha fatohrafa Julii Mackievič.
Pavodle danych statystyki, u 2015 hodzie ahulny źniešniehandlovy abarot tavaraŭ i pasłuh Łatvii i Biełarusi skłaŭ 522,4 młn jeŭra. Takim čynam, Biełaruś stała 15-m najvažniejšym partnioram Łatvii pa źniešnim handli. Biełaruskija ekspartnyja hruzy tradycyjna zajmajuć druhoje miesca ŭ ahulnym abjomie čyhunačnych pieravozak Łatvii. Abjom ekspartu tavaraŭ i pasłuh u Biełaruś skłaŭ 190,9 młn jeŭra, abo 1,3% ad ahulnaha abjomu ekspartu Łatvii. U svaju čarhu, abjom impartu tavaraŭ i pasłuh skłaŭ 3 młrd 331,5 młn jeŭra, abo 2,2% ad ahulnaha abjomu impartu Łatvii.
Pa inviestycyjach u asnoŭny kapitał zarehistravanych u Łatvii pradpryjemstvaŭ na 1 kastryčnika 2015 hoda Biełaruś zaniała 22-je miesca z ahulnym abjomam inviestycyj u 21,4 młn jeŭra i 2.261 pradpryjemstvam.
U asnoŭnym Łatvija ekspartuje ŭ Biełaruś pradukcyju chimičnaj i charčovaj pramysłovaści, mašyny i miechanizmy, transpartnyja pasłuhi (pavietrany, aŭtatranspart), turystyčnyja, kamiercyjnyja pasłuhi (budaŭničyja, infarmacyjnyja, kamputarnyja, pasłuhi suviazi i haspadarčaj dziejnaści).
Kamientary