U Stakholm 16 listapada prybyŭ i prystupiŭ da vykanańnia svaich abaviazkaŭ časovy pavierany ŭ spravach Biełarusi ŭ Šviecyi. Takim čynam, aficyjny Minsk adnaviŭ dypłamatyčnuju prysutnaść u hetaj skandynaŭskaj krainie.
Pra adnaŭleńnie dypłamatyčnaj prysutnaści ministr zamiežnych spraŭ Uładzimir Makiej prainfarmavaŭ pasła Šviecyi ŭ Biełarusi Marcina Obierha na sustrečy 18 listapada.
«Baki abmierkavali pierśpiektyŭnyja kirunki raźvićcia supracoŭnictva Biełarusi i Šviecyi, uzajemadziejańnie pa linii Biełaruś—ES, a taksama aktualnyja pytańni rehijanalnaha paradku dnia», — paviedamiła pres-słužba biełaruskaha źniešniepalityčnaha viedamstva.
Achaładžeńnie ŭ adnosinach pamiž dźviuma krainami pačałosia čatyry hady tamu. 4 lipienia 2012 hoda adnamatorny samalot sa šviedskim ekipažam z supracoŭnikaŭ kampanii Studio Total niesankcyjanavana pierasiok pavietranuju miažu Biełarusi. Jon pravioŭ u pavietranaj prastory krainy kala paŭtary hadziny, skinuŭšy nad Iviancom i ŭskrainaj Minska plušavych miedźviedzianiat z zapiskami ŭ padtrymku demakratyi ŭ Biełarusi (u biełaruskich ŚMI akcyja atrymała nazvu «plušavy desant»).
Spačatku vajennyja i pamiežniki admaŭlali parušeńnie dziaržmiažy. 13 lipienia ŭ ramkach rasśledavańnia byŭ zatrymany 20-hadovy fatohraf Anton Surapin, jaki pieršym vykłaŭ na svaim sajcie Belarusian News Photos fatahrafii skinutych šviedami cacačnych miadźviedziaŭ. Paźniej stała viadoma pra zatrymańnie ryełtara Siarhieja Bašarymava, jaki zajmajecca zdačaj kvater na karotki termin i ŭ jakoha šviedy mahli abo płanavali zdymać žyllo.
31 lipienia za «nienaležnaje vykanańnie słužbovych abaviazkaŭ pa zabieśpiačeńni nacyjanalnaj biaśpieki» Alaksandr Łukašenka źniaŭ z pasad kiraŭnika Dziaržpahrankamiteta Ihara Račkoŭskaha i kamandujučaha Vajenna-pavietranymi siłami i vojskami supraćpavietranaj abarony hienierał-majora Dźmitryja Pachmiełkina.
1 žniŭnia biełaruskija ŭłady admovili ŭ praciahu akredytacyi pasłu Šviecyi Stefanu Eryksanu, abvinavaciŭšy ŭ destruktyŭnaj dziejnaści. U adkaz šviedskija ŭłady zajavili, što nie prymuć novaha pasła Biełarusi, i rekamiendavali dvum supracoŭnikam biełaruskaha pasolstva pakinuć Stakholm. 30 žniŭnia abodva pasolstvy spynili svaju pracu. Łukašenka zajaviŭ, što kanflikt vakoł pasła Šviecyi i incydent ź niezakonnym palotam nad Biełaruśsiu šviedskaha samalota nijak nie źviazanyja.
Viasnoj 2013 hoda biełaruski bok zadavoliŭ prośbu šviedskaha boku i akredytavaŭ u Minsku časovaha pavieranaha ŭ spravach Šviecyi ŭ Biełarusi.
Ź lipienia 2013 hoda Marcin Obierh pracavaŭ u Minsku ŭ ranhu časovaha pavieranaha ŭ spravach Šviecyi ŭ Biełarusi, a ŭ kancy krasavika 2015 hoda byŭ pryznačany pasłom. Paśla hetaha pryznačeńnia dypłamat zajaviŭ, što Šviecyja vitała b adkryćcio pasolstva Biełarusi ŭ Stakholmie, ale kančatkovaje rašeńnie za Biełaruśsiu.
25 červienia 2015 hoda Alaksandr Łukašenka, prymajučy davierčyja hramaty šviedskaha pasła Marcina Obierha, zajaviŭ, što naśpieŭ čas adnavić poŭnafarmatnaje supracoŭnictva sa Šviecyjaj. Jon adznačyŭ, što Šviecyja adyhryvaje važnuju rolu ŭ rehijanalnych i subrehijanalnych pracesach na poŭnačy Jeŭropy. «Jaje hołas važka hučyć u Jeŭrasajuzie. Dy i my nikoli nie skryvali, što nam jość čamu pavučycca ŭ Šviecyi», — dadaŭ Łukašenka.
2 kastryčnika pra mahčymaści adnaŭleńnia pracy pasolstva Biełarusi ŭ Šviecyi ŭ 2016 hodzie paviedamiła žurnalistam namieśnik ministra zamiežnych spraŭ Alena Kupčyna.
Ciapier čytajuć
Žonka adhavorvała padpałkoŭnika DFR brać chabary, a toj kazaŭ: «Atrymaju pałkoŭnika — i na piensiju». Pieršaja piensija pryjšła ŭžo na aryštancki rachunak2020
Kamientary