U Bałtyjskim mory zdaryŭsia druhi za tydzień razryŭ padvodnaha kabiela suviazi
Ułady Łatvii paviedamili pra paškodžańnie aptyčnaha kabiela ŭ Bałtyjskim mory i pačali rasśledavańnie. Premjer-ministarka krainy Evika Silinia paviedamiła ŭ sacsietcy X, što kabiel, jaki naležyć pryvatnaj kampanii, byŭ paškodžany niedaloka ad porta Lijepaja. Pry hetym łatvijskija karystalniki suviazi nie paciarpieli. Adkaznyja viedamstvy vyśviatlajuć usie abstaviny zdareńnia.
Zhodna sa źviestkami Reuters, jaki spasyłajecca na Dziaržaŭnuju palicyju Łatvii, paškodžańnie adbyłosia 2 studzienia — praz try dni paśla taho, jak finskija ŭłady zatrymali sudna, jakoje vyjšła z Rasii i padazravałasia ŭ mahčymaj datyčnaści da ataki na inšy kabiel u Bałtycy.
U niadzielu łatvijskija śledčyja padnialisia na bort sudna ŭ Lijepai, jakoje moža być datyčnym da paškodžańnia kamunikacyj. Ni sudna, ni jaho ekipaž pakul nie zatrymanyja, jany supracoŭničajuć z palicyjaj.
Pa paviedamleńni Pamiežnaj słužby Uzbrojenych sił Łatvii, sudna spačatku ruchałasia nad nieaktyŭnym kabielem, ale potym źmianiła kurs i nakiravałasia na aktyŭny, jaki ciapier paškodžany. Palicyja pravieryła sudna, jaho jakar, techničnaje abstalavańnie i sudnavyja žurnały, a taksama dapytała niekalkich čałaviek. Rasśledavańnie praciahvajecca.
Sam kabiel prachodzić pamiž prybiarežnymi haradami — Šviantoi ŭ Litvie i Lijepaja ŭ Łatvii, na adlehłaści prykładna 65 km adzin ad adnaho, adznačyli ŭ Litoŭskim nacyjanalnym centry pa kiravańni kryzisami.
Raniej, 1 studzienia, finskaja palicyja paviedamiła pra aryšt dvuch členaŭ ekipaža sudna Fitburg, padazravanaha ŭ paškodžańni kabiela pamiž Chielsinki i Talinam. Jašče dvum marakam zabaroniena pakidać terytoryju Finlandyi. Siarod 14 členaŭ ekipaža byli hramadzianie Rasii, Hruzii, Azierbajdžana i Kazachstana.
Fitburg byŭ zatrymany finskimi ŭładami 31 śniežnia padčas ruchu z Rasii ŭ Izrail. Pry ahladzie sudna vyśvietliłasia, što jano pieravoziła kanstrukcyjnuju stal rasijskaj vytvorčaści, na jakuju raspaŭsiudžvajucca siektaralnyja sankcyi ES. Na hruz nakładzieny aryšt, pravodzicca pravierka.
Ciapier čytajuć
«Muž syšoŭ ź Sipłym i Małym». Imavierna, pad Kramatorskam ukraincy adnym macham ubajdosili troch biełaruskich najomnikaŭ4
Kamientary