Sama jana nazyvała siabie «dačkoj Čaviesa». A zamiest tytuła «pieršaja łedzi» abrała zvańnie «pieršaja zmaharka». Na praciahu troch dziesiacihodździaŭ Silija Fłores adyhryvała centralnuju rolu va ŭradzie Vieniesueły.
Kali amierykanski śpiecnaz aryštavaŭ Nikałasa Madura i jaho žonku Siliju Fłores, jany zachapili nie tolki prezidenta Vieniesueły, ale i adnu z samych upłyvovych žančyn krainy.
Fłores 69 hadoŭ. Naradziłasia ŭ nievialikim horadzie Cinakiljo, ale vyrasła ŭ Karakasie. Jana vyvučała prava i skončyła Univiersitet Santa-Maryja. U studenckija hady Fłores nie tolki spaścihała jurydyčnyja kodeksy, ale i pačała cikavicca palitykaj, pranikacca levymi idejami.
U 1992 hodzie małady padpałkoŭnik Uha Čavies ździejśniŭ niaŭdałuju sprobu dziaržaŭnaha pieravarotu suprać prezidenta Karłasa Andresa Pieresa. Čavies apynuŭsia ŭ turmie, i jamu była patrebnaja jurydyčnaja dapamoha. Silija Fłores, jakaja tady była maładoj i ambicyjnaj advakatkaj, dałučyłasia da kamandy jaho abaroncaŭ, što damahlisia jaho pamiłavańnia i vyzvaleńnia z turmy ŭ 1994-m.
Mienavita ŭ toj burny revalucyjny pieryjad zaviazalisia i jaje adnosiny ź Nikałasam Madura, jaki byŭ prafsajuznym aktyvistam. Varta adznačyć, što Silija starejšaja za svajho muža na šeść hadoŭ. Ich sajuz doŭhija hady zastavaŭsia hramadzianskim — aficyjna jany pabralisia šlubam tolki ŭ 2013 hodzie, užo paśla taho, jak Madura staŭ vykonvać abaviazki prezidenta. Hetaje partniorstva mnohija analityki nazyvajuć palityčnym tandemam, dzie Silija časta vykonvaje rolu strateha, nakiroŭvajučy dziejańni muža.
Da sajuza z Madura Silija była zamužam za Valteram Havidyja Radryhiesam. Ad pieršaha šlubu ŭ Silii Fłores troje synoŭ: Valter Jakab, Josval Alaksandr i Joser Daniel Havidyja Fłores. Ź Nikałasam Madura sumiesnych bijałahičnych dziaciej u jaje niama. Adnak Madura maje ŭłasnaha syna ad papiarednich adnosin — Nikałasa Madura Hieru (viadomaha jak «Nikałasita»). Razam jany ŭtvaryli vialikuju siamju, jakaja funkcyjanuje jak adziny palityka-ekanamičny kłan.
Palityčnaja karjera: pieršaja žančyna va ŭładzie
U 2000 hodzie Fłores była abranaja ŭ Nacyjanalnuju asambleju, a ŭ 2006‑m stała jaje staršynioj — pieršaj žančynaj u historyi Vieniesueły na hetaj pasadzie. Charakterna, što ŭ śpikierskim kreśle Silija źmianiła mienavita Nikałasa Madura, jakoha pryznačyli ministram zamiežnych spraŭ.
10 studzienia 2007 hoda Fłores pryviała da prysiahi Uha Čaviesa paśla prezidenckich vybaraŭ. Jana ŭznačalvała parłamient da 2011 hoda — heta byli hady ŭmacavańnia čavisckaj madeli ŭłady, kali dziaržava ŭsio bolš pieratvarałasia ŭ sistemu, dzie realnyja rašeńni prymajucca ŭ vuzkim kole nabližanych.
Paźniej, u 2012—2013 hadach, jana pracavała Hienieralnym prakuroram krainy.
Jak adznačaje The New York Times, Fłores stvaryła sudovuju sistemu, u jakoj amal kožnaje važnaje rašeńnie prymałasia praź jaje, i ŭmacoŭvała dziaržaŭnyja instytuty svajakami i prychilnikami. U toj ža čas, pavodle słoŭ žurnalistaŭ, analitykaŭ i byłych čynoŭnikaŭ, jaje siamja nazapasiła vielizarnyja bahaćci.
Kali Madura pryjšoŭ da ŭłady, Silija aficyjna vyjšła zamuž za jaho i kateharyčna admoviłasia ad tradycyjnaha tytuła «pieršaja łedzi», bo ličyła jaho buržuaznym pieražytkam, jaki prynižaje rolu žančyny ŭ hramadstvie. Zamiest hetaha jana ŭviała va ŭžytak tytuł «pieršaja zmaharka» (pa-ispansku Primera Combatiente).
Žadańnie padkreślić svaju ideałahičnuju suviaź z papiarednikam prajaviłasia i ŭ 2015 hodzie, kali Silija stvaryła akaŭnt u Twitter, u jakim apisała siabie jak «dačka Čaviesa». Praŭda, paźniej jana ŭsio ž krychu źmiakčyła hety hučny vobraz, źmianiŭšy podpis na bolš łakaničnaje «čavistka». Sam Nikałas Madura nazyvaje žonku Silitaj.
Paśla viasiella palityčnaja karjera Silii nie skončyłasia. U 2015‑m jana znoŭ stała deputatam Nacyjanalnaj asamblei, a ŭ 2017 hodzie była abranaja ŭ Nacyjanalnuju ŭstanoŭčuju asambleju Vieniesueły, jakaja zajmałasia raspracoŭkaj prajekta novaj kanstytucyi.
Abvinavačvańni i skandały
Za vialikim upłyvam ciahniecca šlejf abvinavačvańniaŭ u kumaŭstvie. Kali Fłores uznačalvała parłamient, apazicyja i prafsajuzy zajaŭlali, što jana pracaŭładkavała ŭ strukturu dziasiatki svaich svajakoŭ — ad bratoŭ i siaścior da plamieńnikaŭ. U presie fihuravali śpisy z proźviščami kala 40 čałaviek ź jaje siamji, jakija atrymali pasady ŭ dziaržaparacie.
Asablivuju ŭvahu pryciahvajuć jaje syny ad pieršaha šlubu, jakich u Vieniesuele časta nazyvajuć «Los Chamos» («Chłopcy»). Choć jany imknucca trymacca ŭ cieniu, ich imiony stała fihurujuć u karupcyjnych rasśledavańniach.
U 2019 hodzie Ministerstva finansaŭ ZŠA ŭviało piersanalnyja sankcyi suprać usich traich synoŭ Silii Fłores, abvinavaciŭšy ich u datyčnaści da schiem pa kradziažy srodkaŭ ź dziaržaŭnych prahram.
Samy razburalny skandał, źviazany ź imiem Fłores, — heta sprava «narkaplamieńnikaŭ» (Narcosobrinos). U 2015 hodzie dva jaje plamieńniki, adnaho ź jakich jana paśla zaŭčasnaj śmierci siastry vychoŭvała jak ułasnaha syna, byli aryštavanyja na Haici pry sprobie arhanizavać pastaŭku 800 kiłahramaŭ kakainu ŭ ZŠA. Miascovaja palicyja pieradała ich Upraŭleńniu pa baraćbie z narkotykami ZŠA. Sud u Ńju-Jorku pryznaŭ mužčyn vinavatymi i prysudziŭ da doŭhich terminaŭ źniavoleńnia.
Hetaja historyja naniesła kałasalny ŭdar pa reputacyi prezidenckaj pary, pakazaŭšy mahčymyja suviazi siamji ź mižnarodnym narkatrafikam, choć sama Fłores nazvała heta «impieryjalistyčnym vykradańniem».
Z-za abvinavačvańniaŭ u padryvie demakratyi i karupcyi Silija Fłores znachodzicca pad piersanalnymi sankcyjami ZŠA, Kanady, Panamy i šerahu inšych krain. Złučanyja Štaty nazyvajuć jaje klučavoj fihuraj, jakaja dapamahała Madura ŭtrymlivać aŭtarytarny kantrol. 3 studzienia 2026 hoda ŭ ZŠA byŭ apublikavany fiederalny abvinavaŭčy akt, u jakim Fłores, Nikałas Madura i jaho syn abvinavačvajucca ŭ pramym supracoŭnictvie z narkahandlarami.
U Łahojsku piekar admaŭlajecca pradavać svoj chleb pakupnikam, u jakich jość sabaki84
Kamientary