Za kradziež z carkvy asudžany 38-hadovy niepracujučy žychar Pinska. Raniej jon byŭ čatyry razoŭ asudžany za kradziažy.
Jak paviedamiła staršy prakuror adździeła prakuratury Bresckaj vobłaści Łarysa Karanievič, u sakaviku 2014 hoda mužčyna ŭzłamaŭ zamki na ŭvachodnych dźviarach pravasłaŭnaj carkvy ŭ vioscy Miasiacičy Pinskaha rajona. Prakraŭšysia ŭ chram, złamyśnik vykraŭ dzieviać staradaŭnich abrazoŭ, dva Jevanhielli, kielich dla kamunii i spodak z achviarnaha naboru. Jašče dźviuma ikonami mužčyna zavałodać nie zmoh — jamu nie ŭdałosia vyciahnuć ich z akładu.
Zatym praź internet jon znajšoŭ u Rasii pakupnikoŭ na častku vykradzienaha za 19 tysiač rasijskich rubloŭ. Paśla taho jak hetyja pradadzienyja pradmiety relihijnaha kultu vyjavili i kanfiskavali ŭ Smalenskaj vobłaści, była vyjaŭlenaja asoba pradaŭca.
U studzieni 2016 hoda jaho zatrymali.
14 listapada sud Pinskaha rajona i horada Pinska pryznaŭ mužčynu vinavatym u zamachu na tajemnaje vykradańnie majomaści paŭtorna ŭ asabliva bujnym pamiery (č. 1 art. 14 KK, č. 4 art. 205 KK) i prysudziŭ da vaśmi hadoŭ pazbaŭleńnia voli ŭ kałonii strohaha režymu z kanfiskacyjaj majomaści.
Ź jaho spahnana na karyść Pinskaj jeparchii Biełaruskaj pravasłaŭnaj carkvy 10 tysiač denaminavanych rubloŭ naniesienaj škody.
U sudovym pasiadžeńni pinčuk pryznaŭ svaju vinu častkova i zajaviŭ, što nie chacieŭ vykradać dva abrazy, jakija jamu nie ŭdałosia vyciahnuć z akładu.
Prysud jašče nie ŭstupiŭ u zakonnuju siłu i moža być abskardžany.
Kamientary