Namieśnik kiraŭnika Administracyi prezidenta Buzoŭski: My pieražyvajem druhi 1941 hod

Imknieńnie hramadstva da materyjalnych vyhod i adychod ad tradycyjnych kaštoŭnaściaŭ źjaŭlajecca vyklikam času, ź jakim dziaržava nie moža nie ličycca, zajaviŭ namieśnik kiraŭnika Administracyi prezidenta Ihar Buzoŭski 18 listapada ŭ Minsku na V Forumie maładych žurnalistaŭ «Ahulny pohlad u budučyniu. ŚMI: maralnaje vymiareńnie».

Pavialičyć

Forum arhanizavany Ministerstvam infarmacyi, Biełaruskim sajuzam žurnalistaŭ i Biełaruskim respublikanskim sajuzam moładzi.

Dziaržava, padkreśliŭ Buzoŭski, zacikaŭlenaja «ŭ farmavańni zdarovaj, maralnaj, duchoŭnaj asoby, jakaja ŭ dalejšym budzie farmavać budučuju dziaržaŭnaść». «Što budzie ŭ kaštoŭnaściach ŭ moładzi — heta nie hałasłoŭnyja intaresy, heta pierśpiektyva, jakaja achopić kožnaha z nas», — skazaŭ jon.

Pavodle słoŭ namieśnika kiraŭnika Administracyi prezidenta, u Biełarusi na dziaržaŭnym uzroŭni pravodzicca acenka cennasnych aryjenciraŭ hramadstva. «Ni dla kaho nie sakret, dla mnohich heta stanovicca narmalnym, što acenka efiektyŭnaści žyćciadziejnaści taho ci inšaha čałavieka — heta materyjalny dabrabyt. Hetaja kaštoŭnaść stanovicca najbolš značnaj z pryčyny tych tendencyj, jakija siońnia jość. Ale razam z hetym my ŭvachodzim u supiarečnaść, jakaja źjaŭlajecca dziaržaŭnaj», — zajaviŭ čynoŭnik.

«Hramadskija pracesy, maštabnyja tendencyi, jakija da nas iduć, jeŭrapiejskija kaštoŭnaści, mahčyma, navat jakija źjaŭlajucca mižnarodnymi niejkimi standartami, źviazanyja z paniaćciem sacyjalizacyi ŭ hramadstvie, — dadaŭ Buzoŭski. — Ale jakim čynam my siońnia sfarmujem dziaržavu, kali jany farmujucca jak «ja», «a vakoł mianie», «tut i ciapier», «pravy čałavieka», «pravy dziciaci». Heta značyć u centry ja, a dalej — trava nie raści. Heta sacyjalizacyja ci heta desacyjalizacyja?»

Pry hetym namieśnik kiraŭnika Administracyi prezidenta ŭpeŭnieny: «Tyja pasyły, na jakich my farmavalisia na praciahu nie adnaho dziasiatka hadoŭ, rujnujucca ŭ pryncypie». «Jany farmavalisia ŭ situacyi, kali pieravažali takija paniaćci, jak duchoŭnaść, maralnaść. Siońnia ŭ ich, mahčyma, sumniavajucca. Ale tolki ŭ tym vypadku, kali takaja siła, jak žurnalistyka, nie ŭśviedamlaje svaju pracu ŭ hetym kirunku», — ličyć Buzoŭski.

Namieśnik kiraŭnika prezidenckaj administracyi papraknuŭ ŚMI, u tym liku dziaržaŭnyja, u pahoni za rejtynhami, padčas jakoj jany nadajuć nie tak šmat uvahi maralnym pytańniam. «Jak sumiaścić rejtynhi i sacyjalnuju adkaznaść? Usio heta siońnia stała zvyšaktualnym z pryčyny taho, što navat na tych datacyjnych resursach, jakija dziaržava padtrymlivaje dla realizacyi infarmacyjnaj palityki, siońnia heta prajaŭlajecca da takoj stupieni jarka, što vyklikaje ŭžo i peŭnuju chvalu abureńnia, skažu prosta. I analiz kantentu, jaki siońnia my nazirajem kožny dzień, pakazvaje, što heta niasie peŭnyja pahrozy», — ličyć čynoŭnik. U jakaści prykładu takoha niehatyŭnaha kantentu jon pryvioŭ telepieradačy pra ekstrasensaŭ.

Buzoŭski spasłaŭsia na niadaŭniaje apytańnie 8 tys. maładych ludziej, 88,5% ź jakich paviedamili, što biaruć infarmacyju ab kultury ź internetu. «Kali ŭziać siońnia sietku internet i pahladzieć, što tam pieravažaje, jakaja infarmacyja, nakolki jana adpaviadaje paniaćciam duchoŭnaści i maralnaści, stanovicca žudasna. Jakuju kulturu, duchoŭnaść i maralnaść chto tam atrymlivaje?» — zadaŭ pytańnie čynoŭnik.

Jon nazvaŭ ŚMI kałasalnym resursam, jaki ŭpłyvaje na hramadskija ŭstanoŭki. «Nie darma kažuć, što heta čaćviortaja ŭłada. I heta praŭda, heta paćviardžajecca sučasnaściu, jakaja siońnia charaktaryzujecca takim paniaćciem, jak infarmacyjnyja vojny. U vojnach pieramahaje infarmacyja. Sastarełaje takoje paniaćcie ab tym, što piaro pryraŭnoŭvajecca da štyka, — jano znoŭ nabyło kałasalnaje značeńnie, pramoje. ŚMI siońnia pryraŭnoŭvajucca da bajcoŭ na froncie», — zajaviŭ Buzoŭski.

«Mahčyma, ja dzieści pierabolšvaju, — dadaŭ jon, — ale paviercie, hetaje nahniatańnie pachodzić ad viedańnia tendencyj, jakija iduć vielizarnymi, siamimilnymi krokami. Faktyčna my pieražyvajem druhi 41-šy hod, tolki tady našy dziady i pradziedy vystajali, a ci zdolejem my vystajać — heta pytańnie», — padsumavaŭ pradstaŭnik Administracyi prezidenta.

• 0
• 0
• 0
• 0
• 0
• 0
• 0
• 0