Hieorhijeŭskaja stužka 2.0: čamu va Ukrainie, Rasii i Biełarusi raptam zacpiavali savieckija pieśni?
Dva dziasiatki čałaviek na čyhunačnym vakzale Kijeva niastrojna śpiavajuć dziciačuju piesieńku «Pusť vsiehda budiet sołncie!». «Miru — mir!», — kryčać jany paśla vykanańnia. Heta častka tak zvanaha fłešmobu, u miežach jakoha ŭkraincy i rasiejcy źbirajucca na vakzałach svaich haradoŭ i vykonvajuć staryja savieckija pieśni. Fłešmob nibyta ŭźnik sam saboj jak śviedčańnie taho, što bratnija narody chočuć siabroŭstva, a nie vajny. Ale… Na žal, zaŭsiody jość «ale».
Nie fłešmob, a padarunak kambinatu
Pačaŭsia hety «fłešmob» u Zaparožžy 13 listapada, kali na miascovym čyhunačnym vakzale prahučała pieśnia ź filma «Viasna na Zarečnaj vulicy». I pačaŭsia jon nie z pryvatnaj inicyjatyvy miascovych — heta była akcyja miascovaha telebačańnia, padarunak telekanała TV5 na 83-i dzień naradžeńnia kambinata «Zaparožstal».
«Imianińnika takoha samavitaha ŭzrostu składana ździvić… Tamu my vyrašyli pavinšavać jaho sučasnym trendam i padumali, što vykanańnie pieśni z kultavaha filma, źniataha ŭ Zaparožžy, na «Zaparožstali», stanie pryjemnym, dušeŭnym i pamiatnym padarunkam dla kožnaha supracoŭnika kambinata. Tym bolš, u praviadzieńnie fłešmobu my ŭkłali častku dušy, bo ŭsim zaparožcam blizki kožny radok znakamitaha filma, jaki prasiaknuty ducham zaparožcaŭ», — zajaviŭ hienieralny dyrektar TV5 Maksim Anapryjenka.
I śpiavali ŭ Zaparožžy nie niejkija miascovyja amatary, a vakalisty zaparožskaha muzyčnaha vučylišča imia Majbarady.
Cikava, što takim čynam kanał, jaki naležyć viadomamu ŭkrainskamu aliharchu Rynatu Achmietavu, pavinšavaŭ kambinat, jaki naležyć jamu ž.
«Ruski śpieŭ suprać fašyzmu»
Reakcyja na «fłešmob» była niečakanaj. Rasiejskija ŚMI i sieparatysckija pabliki padchapili videa jak «śviedčańnie taho, što va Ukrainie nie ŭsie fašysty». I paniesłasia.
Nieŭzabavie pieśni zahučali i ŭ inšych haradach Ukrainy: Charkavie i Adesie. Adhuknulisia i rasiejcy, vykanaŭšy ŭ Maskvie ŭkrainskuju pieśniu «Rozpriahajtie, chłopci, koniej», padaŭšy svaju akcyju jak simvał siabroŭstva pamiž dźviuma krainami.
Zdavałasia b, dobra. Ale ž — arhanizavała rasiejski fłešmob supołka «Sorak Sarakoŭ», viadomaja svaimi ultraradykalnymi pravasłaŭnymi pohladami, padtrymkaj Ruskaha śvietu, «DNR» i «ŁNR». «Sorak Sarakoŭ» niaredka nazyvajuć «bajavymi atradami RPC», supołka abjadnoŭvaje jak futbolnych fanataŭ i pravasłaŭnych aktyvistaŭ, tak i byłych prakramloŭskich dziejačaŭ.
«Sarakoŭcy» byli nieadnojčy zaŭvažanyja ŭ pravakacyjach padčas antyklerykalnych mitynhaŭ. Siłavoje ž kryło supołki składajecca z maładych «kalafutbolščykaŭ» — kuryruje jaho nieanacyst Ivan Katanajeŭ, eks-čalec «Fratryi», fanackaj hrupoŭki maskoŭskaha «Spartaka».
Dalej — bolej. Savieckija pieśni hučali čaściej i čaściej: śpiavali na vakzałach Dnieprapiatroŭska i Lipiecka, Maskvy i Maryŭpala, Błahavieščanska, Łuhanska, Ałušty… Narastaŭ i hradus «patryjatyzmu»: pra akcyi ŭ zrazumieła jakim tonie pačali paviedamlać rasiejskija telekanały. Tak zvany «fłešmob» akazaŭsia vielmi zručnym instrumientam i arhumientam prapahandy.
«Prosty narod Ukrainy pastupova vylečvajecca ad atruty nacyjanalizmu, jakuju zalili ŭ jaho siońniašnija kijeŭskija kiraŭniki», — prakamientavali akcyi na rasijskim Pieršym kanale.
Radasna padtrymaŭ akcyju i rasiejski psieŭdahistoryk Mikałaj Starykaŭ, zapuściŭšy ŭ siecivie chešteh #myžilivodnojstranie.
Nie zmaŭčaŭ i kisialoŭski «Sputnik» (pryčym, biełaruskaja jaho redakcyja), nazvaŭšy akcyju «sapraŭdy narodnaj» i paraiŭšy adpravić štości ŭ takim ža styli na Jeŭrabačańnie: «Kali ludziam padabajecca savieckaje — dajcie im heta».
Historyja z fłešmobam, jaki ź vinšavańnia aliharcham samoha siabie pieraros u prapahandysckuju akcyju, nahadvaje historyju hieorhijeŭskaj stužki, jakaja sa štučnaha simvała Pieramohi pieratvaryłasia ŭ simvał Ruskaha śvietu i markier «svoj-čužy» dla vialikaj kolkaści narodu. Stužku prydumali ŭ 2005 hodzie pijarščyki RIA»Novosti», kab abjadnać ludziej i «nie dać zabycca, jakoj canoj atrymali pieramohu ŭ strašnaj vajnie».
A ŭ našych Novy hod
Zaśpiavali i biełarusy — 3 śniežnia ŭ Hrodnie taksama arhanizavali śpieŭny fłešmob. Praŭda, akcyju jany praviali na svoj ład: sabralisia nie na vakzale, a ŭ handlovym centry, dzie vykanali «V lesu rodiłaś jołočka». Śpiavali i vadzili karahody vakoł jełki navučency Hrodzienskaha dziaržaŭnaha muzyčnaha kaledža i dzietki ź miascovaj pačatkovaj škoły №1 — a razam ź imi i śpiavak Tea, jaki «vypadkova» akazaŭsia ŭ handlovym centry.
«Da rasijskich ci ŭkrainskich akcyj heta nie maje anijakaha dačynieńnia. Naš fłešmob byŭ pryśviečany Novamu hodu, — zapeŭnili markietołahi handlovaha centra. — Tea byŭ u nas na mierapryjemstvie, i my zrabili taki siurpryz dzietkam, kab jon zaśpiavaŭ ź imi. Usim vielmi spadabałasia».
Ciapier čytajuć
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku2424
Kamientary