Kolkaść sałodkaha ŭ rańnim dziacinstvie istotna ŭpłyvaje na zdaroŭje ŭ darosłym žyćci
Maštabnaje daśledavańnie pakazvaje: toje, što čałaviek jeść u pieršyja hady žyćcia — i navat jašče da naradžeńnia, — moža vyznačać ryzyku sardečna-sasudzistych zachvorvańniaŭ na dziesiacihodździ napierad.
Z padrabiaznaściami znajomić vydańnie Der Spiegel.
Pytańnie ŭpłyvu rańniaha charčavańnia na stan zdaroŭja ŭ stałym uzroście źjaŭlajecca pradmietam praciahłych navukovych dyskusij. Centralnaje miesca ŭ hetych abmierkavańniach zajmaje kancepcyja pieršaj tysiačy dzion žyćcia — pieryjadu, jaki pačynajecca z momantu začaćcia i doŭžycca da dvuch hadoŭ.
Kab pravieryć hetuju hipotezu, mižnarodnaja hrupa daśledčykaŭ vykarystała svojeasablivy histaryčny «naturalny ekśpierymient». Padčas Druhoj suśvietnaj vajny i jašče niekalki hadoŭ paśla jaje zakančeńnia ŭ Vialikabrytanii dziejničała žorstkaja sistema narmavańnia cukru.
Ź lipienia 1942 hoda da vieraśnia 1953‑ha darosłyja i dzieci, starejšyja za piać hadoŭ, mahli atrymlivać kala 230 hramaŭ cukru na tydzień i 340 hramaŭ cukierak na miesiac. A voś dzieci da dvuch hadoŭ uvohule nie atrymlivali ni cukru, ni sałodkich prysmakaŭ.
Paśla admieny narmavańnia spažyvańnie cukru chutka vyrasła. Pry hetym astatniaja struktura charčavańnia nasielnictva źmianiłasia nie tak značna. Heta dazvoliła daśledčykam paraŭnać ludziej, čyje pieršyja hady žyćcia prypali na pieryjad strohich abmiežavańniaŭ, z tymi, chto naradziŭsia ŭžo paśla ich admieny.
Navukoŭcy praanalizavali infarmacyju pra 63 433 udzielnikaŭ prajekta UK Biobank, jakija naradzilisia pamiž kastryčnikam 1951 hoda i sakavikom 1956-ha.
Ź ich 40 063 asoby naradzilisia jašče ŭ čas, kali dziejničała sistema narmavańnia. U zaležnaści ad daty naradžeńnia jany praviali roznuju kolkaść času — u maciarynskim ułońni abo ŭ rańnim dziacinstvie — pry vielmi nizkim uzroŭni spažyvańnia cukru.
Jašče 23 370 udzielnikaŭ byli začatyja ŭžo paśla admieny abmiežavańniaŭ i z samaha pačatku žyćcia spažyvali značna bolš sałodkaha.
Mienš cukru — mienšaja ryzyka
Paraŭnańnie hetych dźviuch hrup pakazała adnaznačny vynik: tyja, čyjo rańniaje dziacinstvie da dvuch hadoŭ i pieryjad unutryvantrobnaha raźvićcia prypali na čas abmiežavańnia cukru, mieli prykładna na 20% nižejšuju ryzyku sardečna-sasudzistych zachvorvańniaŭ u darosłym uzroście ŭ paraŭnańni z tymi, chto nie zaśpieŭ narmavańnia.
Jašče bolš prykmietnymi byli roźnicy ŭ kankretnych dyjahnazach. Ryzyka infarktu, sardečnaj niedastatkovaści, fibrylacyi pieradserdziaŭ i śmierci ŭ vyniku zachvorvańniaŭ serca była prykładna na 25% nižejšaja. Ryzyka insultu źnižałasia amal na 30%.
Daśledčyki taksama zaŭvažyli svojeasablivy «efiekt dozy». U tych, chto žyŭ va ŭmovach narmavańnia da dvuchhadovaha ŭzrostu, jon byŭ bolšym, čym u tych, chto mieŭ abmiežavańni tolki da adnaho hoda. Adnak navat u apošnich efiekt byŭ bolš značnym, čym u tych, chto zaśpieŭ abmiežavańni tolki va ŭłońni maci. I navat u hetym vypadku ryzyka była nižejšaj, čym u tych, chto naohuł nie sutykaŭsia z narmavańniem cukru.
Čamu heta adbyvajecca
Pavodle aŭtaraŭ daśledavańnia, dakładnyja miechanizmy pakul jašče nie da kanca zrazumiełyja, adnak navukoŭcy prapanujuć niekalki abhruntavanych viersij.
Vysoki ŭzrovień hlukozy ŭ kryvi maci moža pravakavać praźmiernuju vypracoŭku insulinu ŭ płoda, što patencyjna viadzie da hipiertrafii kletak sardečnaj myšcy jašče da naradžeńnia.
Akramia taho, nizkaje spažyvańnie cukru ŭ rańnim uzroście spryjaje pamianšeńniu aksidacyjnaha stresu i zapalenčych pracesaŭ, što stanoŭča ŭpłyvaje na farmavańnie i raźvićcio kryvianosnych sasudaŭ.
Na dumku ekśpiertaŭ, vyniki hetaha daśledavańnia pavinny stać padstavaj dla pierahladu padychodaŭ da achovy zdaroŭja dziaciej na dziaržaŭnym uzroŭni. Niahledziačy na isnyja rekamiendacyi paźbiahać dadadzienaha cukru ŭ racyjonie dziaciej da dvuch hadoŭ, realizacyja hetych parad časta ŭskładniajecca markietynhavaj palitykaj vytvorcaŭ charčavańnia.
Śpiecyjalisty padkreślivajuć, što adnych tolki zaklikaŭ da baćkoŭ niedastatkova. Na ich dumku, adkaznaść pavinna nieści i ŭsio hramadstva. Nieabchodnyja sistemnyja miery, takija jak uviadzieńnie padatku na cukar, jaki ŭžo dziejničaje ŭ mnohich krainach, zabarona na rekłamu sałodkich praduktaŭ, aryjentavanych na dziaciej, a taksama mahčymaje ŭviadzieńnie śpiecyjalnych papiaredžańniaŭ na ŭpakoŭkach tavaraŭ z vysokim utrymańniem cukru.
Vychadcy z «Alfa» KDB Biełarusi zajmajuć kiraŭničyja pasady ŭ novym rasijskim supiersakretnym śpiecpadraździaleńni, pryznačanym dla zabojstvaŭ za miažoju18
Kamientary