U Irłandyi razmarozili 100 młn jeŭra Michaiła Chadarkoŭskaha

Akruhovy sud Dublina zadavoliŭ chadajnictva byłoha ŭładalnika JUKASa Michaiła Chadarkoŭskaha ab razmarozcy srodkaŭ dvuch inviestycyjnych fondaŭ na ahulnuju sumu bolš za 100 miljonaŭ jeŭra, zabłakavanych piać hadoŭ tamu ŭładami Irłandyi, piša VVS. 

Pieršym pra rašeńnie suda paviedamiŭ sam Chadarkoŭski ŭ svaim tvitary. «Irłandski sud padtrymaŭ maju prośbu razmarozić rachunak, jaki «visieŭ» z 2011 hoda. Chłuśnia pra «admyvańnie» zastałasia chłuśnioj», — napisaŭ były kiraŭnik naftavaj kampanii, asudžany ŭ Rasii i pamiłavany Pucinym u 2013 hodzie.

Na sajcie Chadarkoŭskaha skazana, što sudździa Cimaci Lusie pryznaŭ, što srodki Chadarkoŭskaha nie źjaŭlajucca dachodami ad złačynnaj dziejnaści.

Infarmacyju ab rašeńni suda Dublina ŭ karyść Chadarkoŭskaha paćvierdziŭ kiraŭnik Mižnarodnaha centra pravavoj abarony Andrej Kandak (centr kaardynuje abaronu ad pazovaŭ byłych akcyjanieraŭ JUKASa pa daručeńni miniusta Rasii). Jon paskardziŭsia na toje, što rasijski bok nie byŭ apavieščany naležnym čynam ab pazovie Chadarkoŭskaha i tamu nie mieŭ mahčymaści dać nieabchodnyja dokazy ab niezakonnym pachodžańni zamarožanych srodkaŭ, niahledziačy na «hatoŭnaść i žadańnie».

Bolš za 100 miljonaŭ jeŭra zachoŭvałasia ŭ dvuch inviestycyjnych fondach u Irłandyi i naležali trastu na vostravie Hiernsi, čyim bienieficyjaram byŭ Chadarkoŭski. U 2011 hodzie hetyja hrošy byli zamarožanyja irłandskim biuro pa rasśledavańni ekanamičnych złačynstvaŭ na padstavie druhoha prysudu Chadarkoŭskamu, vyniesienym eks-kiraŭniku JUKASa ŭ Rasii ŭ 2010 hodzie.

Słuchańni ŭ akruhovym sudzie Dublina pačalisia 21 listapada 2016 hoda. Vystupajučy ŭ pačatku pracesu, advakat Chadarkoŭskaha Remi Fareł kazaŭ, što irłandskaje biuro pa rasśledavańni ekanamičnych złačynstvaŭ «zdajecca, adzinaja dziaržustanova ŭ cyvilizavanym śviecie», jakaja ličyć jurydyčna apraŭdanymi prysudy Chadarkoŭskamu.

U adkaz pradstaŭnik palicyi Majkł Makdaŭeł zajaviŭ, što hrošy ad ździełak JUKASa mahli pastupić u Irłandyju praź sietku trastaŭ, a zakon ab supraćdziejańni admyvańniu hrošaj abaviazvaŭ Chadarkoŭskaha dakazvać adsutnaść złačynnych schiem pry pieravodzie hrošaj. Advakat piarečyŭ: padazreńni ab złačynnym pachodžańni hrošaj hruntavalisia tolki na prysudach rasijskich sudoŭ.

Sam Chadarkoŭski kazaŭ, što choć zamarožanaja ŭ Irłandyi suma dla jaho nie krytyčnaja, jon zajmajecca hramadskaj dziejnaściu, i hetyja hrošy byli b dla jaho niališnimi.

Kamientujučy rašeńnie suda ŭ svaju karyść, eks-kiraŭnik JUKASa paabiacaŭ vydatkavać častku razmarožanych srodkaŭ na ruch «Adkrytaja Rasija», jaki jon zasnavaŭ paśla vyzvaleńnia.

• 0
• 0
• 0
• 0
• 0
• 0
• 0
• 0