Rada Biaśpieki AAN adnahałosna padtrymała rezalucyju z prapanovaj razharnuć u siryjskim Alepa misiju naziralnikaŭ AAN i jaje partnioraŭ, jakija zmahli b sačyć za evakuacyjaj z uschodniaj častki horada, paviedamlaje VVS.
U ciapierašniaj redakcyi dakumient padtrymała Rasija, choć pieršapačatkovy varyjant prapanavanaha Francyjaj prajekta jana nazyvała niebiaśpiečnym.
U rezalucyi ŭtrymlivajecca patrabavańnie da ŭsich bakoŭ, jakija ŭdzielničajuć u kanflikcie, zabiaśpiečyć biaśpieku manitorynhu i bieśpieraškodny dostup naziralnikaŭ. Hienieralnaha sakratara AAN prosiać pryniać terminovyja miery i damovicca z bakami kanfliktu ab razhortvańni naziralnikaŭ.
Hałasavańnie pa prajekcie rezalucyi ŭ paniadziełak prajšło biez abmierkavańnia. Heta pieršy vypadak adzinaha mierkavańnia ŭ radzie biaśpieki AAN za niekalki miesiacaŭ.
Zadačaj AAN stavicca «adekvatny» i «niejtralny» manitorynh jak za pracesam evakuacyi, tak i za losami ludziej, jakija zastalisia ŭ Alepa. Raniej pradstaŭniki AAN paviedamlali ab mahčymych raspravach nad mirnymi žycharami, jakija mahli ŭčynić praŭradavyja vojski, kali im udałosia zachapić uschodni Alepa paśla dvuch hadoŭ abłohi. Siryjskija i rasijskija ŭłady nazyvali takija paviedamleńni falsifikacyjami.
Stały pradstaŭnik Francyi pry AAN Fransua Diełatr zajaviŭ, što rezalucyja pavinna praduchilić «novuju Srebranicu», dzie tysiačy baśnijskich mužčyn i padletkaŭ byli zabityja ŭ 1995 hodzie. Jon nazvaŭ hałasavańnie ŭ radzie biaśpieki AAN «adpraŭnoj kropkaj» dla dalejšaha ŭrehulavańnia situacyi ŭ Alepa.
Pieršapačatkova Rasija ŭspryniała francuzski prajekt rezalucyi ŭ štyki. Da pačatku kansultacyj rasijski pradstaŭnik u AAN Vital Čurkin napiaredadni zajaŭlaŭ, što ŭ pieršapačatkovym vyhladzie prajekt, jaki praduhledžvaje nieadkładnuju adpraŭku ŭ Siryju mižnarodnych naziralnikaŭ, «nievykanalny» i «niebiaśpiečny». «My nie možam padtrymać, my nie možam dazvolić jamu prajści», — skazaŭ Čurkin.
U vyniku paśla trochhadzinnaha abmierkavańnia za začynienymi dźviaryma ŭ francuzski prajekt byli dadadzienyja prapanovy Maskvy, i ŭ niadzielu kampramisny tekst byŭ uzhodnieny Radaj biaśpieki AAN. Čurkin nazvaŭ hety varyjant «dobrym».
Z 2011 hoda Rasija zabłakavała šeść rezalucyj ab Siryi.
Evakuacyja, jakaja pačałasia va ŭschodnim Alepa na minułym tydni, u paniadziełak była praciahnutaja. Paŭstancy razam ź siemjami pa humanitarnym kalidory pierapraŭlajucca na aŭtobusach na pieravałačny punkt, adkul dastaŭlajucca na terytoryju, kantralavanuju praciŭnikami Bašara Asada.
Kamientary