Mitrapalit Kandrusievič raspavioŭ, čamu ŭ Biełarusi niama «Rycaraŭ Kałumba» i «Opus Dei»
U toj čas, jak u susiednich ź Biełaruśsiu krainach pašyrajucca katalickija instytucyi, nakiravanyja na pracu siarod śvieckich viernikaŭ, takija jak bractva «Rycary Kałumba» ci piersanalnaja prełatura «Opus Dei», u Biełarusi pra ich zusim nie čuvać.
Pryčyny hetaha na sustrečy 22 śniežnia z žurnalistami patłumačyŭ mitrapalit Minska-Mahiloŭski, arcybiskup Tadevuš Kandrusievič, adkazvajučy na pytańnie karespandenta Krynica.info.
Pry hetym jon adznačyŭ, što jamu asabista hetyja arhanizacyi padabajucca. Bolš za toje, mienavita pry im u Rasii pačała pracavać «Opus Dei». Ale ŭ Biełarusi, pavodle jaho, z hetym vielmi składana.
Pryčynaj adsutnaści i «Rycaraŭ Kałumba», i «Opus Dei», i inšych padobnych arhanizacyj źjaŭlajecca biełaruskaje zakanadaŭstva, jakoje praduhledžvaje abaviazkovy dazvoł na relihijnuju dziejnaść zamiežnikaŭ, jakich musiać dasłać paznačanyja arhanizacyi. «A z hetym vielmi składana», — adznačyŭ mitrapalit.
Arcybiskup, adkazvajučy na pytańnie ŭžo inšych pradstaŭnikoŭ ŚMI, taksama raspavioŭ pra prablemy, ź jakimi sutykajucca relihijnyja arhanizacyi pry budaŭnictvie sakralnych i dabračynnych budynkaŭ, u tym liku chramaŭ i prytułkaŭ. «Na žal, u zakanadaŭstvie niama ničoha pra budaŭnictva sakralnych abjektaŭ», — adznačyŭ jon.
Hetak, dazvoł na budaŭnictva vydajecca tolki na hod, za jaki pabudavać štości praktyčna niemahčyma, tym bolš za achviaravańni. Dalej dazvoł moža praciahvacca na try ci šeść miesiacaŭ, a biez dazvołu budavać niemahčyma, jak i atrymać dapamohu na heta z-za miažy. «Z-za hetaha budaŭnictva zatrymlivajecca», — zajaviŭ mitrapalit.
Siarod budynkaŭ, budaŭnictva jakich zaraz zaciahvajecca, jość i dabračynny prytułak pry misii Dobraha samaranina, stvarać jaki Kaścioł pačaŭ pa prapanovie prezidenta Biełarusi. Pa słovach arcybiskupa, jon uvieś čas padymaje pytańnie nieabchodnaści ŭvieś čas atrymlivać dazvoły na budaŭnictva, u tym liku ŭ Administracyi kiraŭnika dziaržavy.
Kamientary