U amierykanskaha bambardziroŭščyka ŭ palocie advaliŭsia ruchavik
Turbavientylatarny ruchavik advaliŭsia ad ciažkaha bambardziroŭščyka B-52 Stratofortress padčas trenirovačnaha palotu nad terytoryjaj ZŠA, piša defensenews.com.

Dziakujučy tamu, što samalot vykarystoŭvaje až 8 takich ruchavikoŭ, ekipaž z 5 čałaviek pasadziŭ mašynu na ziamlu bieź incydentaŭ.
Zatym za reštkami ruchavika, jaki byŭ znojdzieny na niezasielenaj terytoryi prykładna ŭ 50 km ad avijabazy, byŭ adpraŭleny viertalot.
Vypadak, pryčyny jakoha vyśviatlajucca, adbyŭsia ŭ sieradu ŭ štacie Paŭnočnaja Dakota.
B-52 Stratofortress — šmatmetavy ciažki mižkantynientalny stratehičny bambardziroŭščyk, jaki staić na ŭzbrajeńni VPS ZŠA z 1955 hoda. Usiaho było zroblena 744 takich mašyn, apošnija z katorych — 1962 hoda vypusku.
V-52, jaki nieadnarazova madernizavaŭsia, zastajecca asnoŭnym samalotam amierykanskaj dalniaj avijacyi.
Čakajecca, što cykłapičnaja mašyna masaj pad 100 ton, jakaja moža brać jašče kala 100 ton dadatkovaha paliva, bomb i abstalavańnia, budzie na ŭzbrajeńni jak minimum da 2030 hoda.
Ciapier čytajuć
Pahladzieli film «Piaščotna da siabie», źniaty pa dzika papularnaj biełaruskaj knizie — pra zaciukanuju žančynu, jakuju chočuć zrabić dla ŭsich zručnaj
Kamientary