Śviatłana Aleksijevič pieraličyła 5 tysiač dalaraŭ na stvareńnie muzieja Alesia Adamoviča
Piśmieńnica Śviatłana Aleksijevič pieraličyła abiacanyja joju 5 tys. dołaraŭ na stvareńnie muzieja Alesia Adamoviča ŭ pasiołku Hłuša Babrujskaha rajona Mahiloŭskaj vobłaści.
Jak paviedamlałasia raniej, 5 listapada 2016 hoda ŭ Mahilovie adbyŭsia kruhły stoł «Muziej Alesia Adamoviča: supracoŭnictva hramadskaści i ŭłady», zaklikany aktyvizavać zbor srodkaŭ na muziej piśmieńnika. U chodzie hetaha mierapryjemstva byŭ stvorany hramadski saviet pry abłasnoj arhanizacyi «Tavarystva biełaruskaj movy», zadačaj jakoha źjaŭlajecca arhanizacyja pracy pa zbory hrošaj. U začytanym na kruhłym stale pryvitańni ad piśmieńnicy Śviatłany Aleksijevič havaryłasia, što nobieleŭskaja łaŭreatka pieraličyć na stvareńnie muzieja 5 tys. dołaraŭ.
Ab pieraličeńni hrošaj BiełaPAN paviedamiła inicyjatar kruhłaha stała i zboru srodkaŭ na stvareńnie muzieja — žurnalistka haziety «Źviazda» Neli Zihula.
Taksama jana skazała, što hrošy pieraličyła i deputat Pałaty pradstaŭnikoŭ Alena Anisim.
Pavodle słoŭ Zihuli, najbližejšym časam pavinien prajści tendar na stvareńnie prajektna-kaštarysnaj dakumientacyi dla restaŭracyi budynka ŭ vioscy Hłuša Babrujskaha rajona, dzie płanujecca stvaryć muziej.
Jak zajaŭlaŭ na kruhłym stale pradstaŭnik mahiloŭskaha Centra pa restaŭracyi Marat Abdulin, na vyrab prajektna-kaštarysnaj dakumientacyi nieabchodna kala 12 tys. rubloŭ. Ciapier, pa śćviardžeńni Neli Zihuli, sabrana bolš 11,5 tys. rubloŭ.
Adznačym, što ideja stvaryć muziej Alesia Adamoviča naležyć siabram i ziemlakam piśmieńnika. Pavodle słoŭ dački piśmieńnika Natalli, hetaje pytańnie pačało abmiarkoŭvacca jašče padčas pachavańnia piśmieńnika ŭ 1994 hodzie. Tolki ŭ kancy lutaha 2016 hoda ŭłady Babrujskaha rajona adkryli dabračynny rachunak dla zboru srodkaŭ na stvareńnie muzieja Alesia Adamoviča na jaho małoj radzimie ŭ vioscy Hłuša.
Achvotnyja pieraličyć hrošy na stvareńnie muzieja pavinny nastojvać u bankach na ŭkazańni ŭ pryznačeńni płaciažu doŭhaha zapisu: «Dla vyrabu prajektna-kaštarysnaj dakumientacyi i rekanstrukcyi budynka ŭ p. Hłuša pad muziej A. Adamoviča».
Rekvizity dla pieravodu hrošaj: adździeł ideałahičnaj raboty, kultury i pa spravach moładzi Babrujskaha rajvykankama. Raźlikovy rachunak 3642129272326 u filijale 703 AAT «ASB» Biełarusbank «, kod 706, Babrujsk, 701226324 UNP.
Uładzimir Łapcevič, BiełaPAN.
Ciapier čytajuć
Mackievič: Cichanoŭskuju źniać, zamianić, pieraabrać nielha. Nie mučajciesia. Nielha — i ŭsio28
Kamientary