Na pieramovach u Ženievie paćvierdžanaja ŭzajemnaja cikavaść pa dałučeńni Biełarusi da SHA

Na pieramovach, jakija adkrylisia ŭ Ženievie, paćvierdžana ŭzajemnaja cikavaść Respubliki Biełaruś i pradstaŭnikoŭ SHA pa dałučeńni krainy da hetaj arhanizacyi, paviedamiŭ kiraŭnik biełaruskaj delehacyi pieršy namieśnik ministra zamiežnych spraŭ Andrej Jeŭdačenka.U Ženievie 23 studzienia pačaŭsia čarhovy raŭnd pieramovaŭ ab dałučeńni Biełarusi da Suśvietnaj handlovaj arhanizacyi (SHA).

«Adbyłasia sustreča sa staršynioj rabočaj hrupy SHA pa ŭstupleńni Biełarusi, pastajannym pradstaŭnikom Turcyi pry SHA spadarom Kiemalem Madenahłu. My taksama praviali sustreču z hienieralnym dyrektaram SHA Rabierta Azievieda. Adbylisia pradmietnyja pieramovy z pradstaŭnikami departamienta pa dałučeńni novych krain. Sustrečy paćvierdzili ŭzajemnuju cikavaść i Respubliki Biełaruś i pradstaŭnikoŭ SHA pa dałučeńni našaj krainy da hetaha kłuba i paćvierdzili našy čakańni ad pieramoŭnaha pracesu», — paviedamiŭ Jeŭdačenka pa telefonie ŭ efiry navin telekanała «Biełaruś 1».

U ramkach vizitu, jaki budzie doŭžycca pa 26 studzienia, adbudziecca vośmaje aficyjnaje pasiadžeńnie rabočaj hrupy pa dałučeńni Biełarusi da SHA z udziełam pradstaŭnikoŭ 46 krain — členaŭ arhanizacyi, a taksama projduć dvuchbakovyja pieramovy biełaruskaj delehacyi z delehacyjami bolš čym dziesiaci krain.

Biełaruski bok pradstavić u Ženievie svoj pohlad na ŭsie sprečnyja pytańni, paviedamiŭ žurnalistam 20 studzienia ministr zamiežnych spraŭ Uładzimir Makiej. «My nie čakajem, što adrazu ž atrymajem zialonaje śviatło, ale pieramovy źjaŭlajucca vielmi važnymi. Jany važnyja dla vyśviatleńnia pazicyj bakoŭ, udakładnieńnia padychodaŭ adpaviednych dziaržaŭ i daviadzieńnia našaj pazicyi pa sprečnych pytańniach, jakija jašče pakul zastajucca», — skazaŭ jon.

Pavodle infarmacyi MZS, u skład delehacyi ŭvajšli pradstaŭniki ministerstvaŭ zamiežnych spraŭ, ekanomiki, antymanapolnaha rehulavańnia i handlu, finansaŭ, sielskaj haspadarki i charčavańnia, achovy zdaroŭja, justycyi, a taksama Dziaržkamiteta pa standartyzacyi, Dziaržaŭnaha mytnaha kamiteta, Nacyjanalnaha centra intelektualnaj ułasnaści i Nacbanka.

Staršynia Biełaruskaj handlova-pramysłovaj pałaty Uładzimir Ułachovič raniej nie vyklučyŭ, što Biełaruś moža dałučycca da SHA ŭžo da kanca hetaha hoda. Pavodle jaho słoŭ, surjoznych barjeraŭ dla hetaha ciapier nie isnuje.

Biełaruś — adzinaja dziaržava Jeŭrazijskaha ekanamičnaha sajuza (JEAES), jakaja nie źjaŭlajecca členam SHA.

29 sakavika 2016 hoda Łukašenka pravioŭ naradu ab uzajemadziejańni krainy z SHA, na jakoj daručyŭ aktyvizavać pieramoŭny praces. Nieŭzabavie paśla hetaha ŭkazam prezidenta byŭ abnoŭleny skład mižviedamasnaj kamisii pa pytańniach dałučeńnia Biełarusi da SHA, jakuju ŭznačaliŭ pieršy vice-premjer Vasil Maciušeŭski.

Zajaŭku na ŭstupleńnie ŭ SHA Biełaruś padała jašče ŭ 1993 hodzie. Šerah ekśpiertaŭ ličać, što kraina surjozna zapaźniłasia z ustupleńniem u SHA. Tak, adznačajuć jany, za minułyja 20 hadoŭ praces dałučeńnia da arhanizacyi istotna ŭskładniŭsia. Akramia taho, analityki ŭkazvajuć na takija ŭpuščanyja vyhady ad členstva ŭ SHA, jak palapšeńnie dostupu na rynki krain-partnioraŭ za košt źnižeńnia šerahu handlovych barjeraŭ, mahčymaść vykarystańnia miechanizmu vyrašeńnia sprečak, skaračeńnie antydempinhavych rasśledavańniaŭ.

• 0
• 0
• 0
• 0
• 0
• 0
• 0
• 0