Novy ŭładalnik «Formuły-1», amierykanskaja kampanija Liberty Media, zvolniła Bierni Ekłstoŭna z pasady hienieralnaha pramoŭtara honak, jakuju jon zajmaŭ niekalki dziesiacihodździaŭ.
Pa słovach samoha Ekłstoŭna, jaho pazbavili ŭsich paŭnamoctvaŭ i pryznačyli hanarovym prezidentam «Formuły-1». Pry hetym, pryznaŭsia biznesmen, jon nie zusim razumieje, što heta za pasada i što na joj treba rabić.
Miesca Ekłstoŭna zojmie Čejz Kery, viadomy jak paplečnik miedyjamahnata Rupierta Merdaka i vice-prezident kampanii XXI Century Fox. Akramia taho, pa inicyjatyvie novaha ŭładalnika ŭ «Formułu-1» vierniecca Ros Braŭn.
Braŭn stanie spartyŭnym dyrektaram «Formuły-1». Da hetaha jon pracavaŭ techničnym dyrektaram u kamandach Benetton, Ferrari i Honda, a taksama ŭznačalvaŭ Mercedes i ŭłasnuju kamandu Braun GP.
Kampanija Liberty Media anansavała nabyćcio «Formuły-1» jašče ŭ vieraśni, adnak aficyjna ździełku zakryli tolki ciapier. Vosieńniu kampanija abiacała, što Ekłstoŭn zachavaje svaju pasadu.
Suma ździełki aceńvajecca prykładna ŭ 4,4 młrd dalaraŭ. Košt aktyvaŭ «Formuły-1» aceńvajecca vyšej — prykładna ŭ 8 młrd dalaraŭ - ale ŭ chodzie pieramovaŭ baki ŭličyli isnujučy ŭ jaje ŭładalnikaŭ doŭh 4,1 młrd dalaraŭ.
Bierni Ekłstoŭn pačynaŭ svaju karjeru jak honščyk, ale istotnych pośpiechaŭ nie dasiahnuŭ. Jon pierakvalifikavaŭsia spačatku ŭ asabistaha mieniedžara dla honščykaŭ, a zatym u dyrektara kamandy Brabham.
U 1970-ch hadach Ekłstoun, jaki ŭvajšoŭ da taho momantu ŭ asacyjacyju kanstruktaraŭ «Formuły-1», zdoleŭ zaklučyć niekalki vyhadnych ździełak z roznymi telekanałami, pradaŭšy im prava na tranślacyju honak za niazvykła bujnyja pa tych časach hrošy.
Mienavita ź imiem Ekłstoŭna źviazvajuć rezki rost papularnaści «Formuły-1» i prychod u jaje vialikich hrošaj, bo da zaklučanych im ździełak hety vid aŭtasportu nie byŭ paśpiachovym z kamiercyjnaha punktu hledžańnia.
U vyniku Ekłstoŭn staŭ ličycca faktyčna hałoŭnym čałaviekam u «Formule-1» i zastavaŭsia im da niadaŭniaha času.
Ciapier čytajuć
Źjaviłasia jašče adno FOTA Mikoły Statkieviča paśla vyzvaleńnia2
Kamientary