Siamja školnicy, jakaja zahinuła pad Maładziečnam na bulbie, i ŭ abłasnym sudzie nie dakazała, što dziaŭčynka pracavała na poli

Minski abłasny sud razhledzieŭ kasacyjnyja skarhi na rašeńnie Maładziečanskaha suda ab adsutnaści pracoŭnych adnosin pamiž zahinułaj padčas uborki bulby školnicaj i SVK «Uschod Ahra». I pakinuŭ rašeńnie bieź źmienaŭ.

«Kalehija suda zhadžajecca z vysnovami suda (pieršaj instancyi) u tym, što ŭ dadzienaj situacyi 25 artykuł Pracoŭnaha kodeksa nieprymianialny, bo dziaŭčynka nie dasiahnuła 14-hadovaha ŭzrostu. I pryznać takija adnosiny pracoŭnymi nie maje padstaŭ. «Rašeńnie suda pakinuć bieź źmienaŭ», — začytaŭ sudździa.

Pierad hetym u studzieni prakuror Maładziečanskaha rajona Uładzimir Duboŭski vynies kasacyjny pratest na rašeńnie miascovaha suda ab adsutnaści pracoŭnych adnosin pamiž zahinułaj školnicaj Viktoryjaj Papčeniaj i SVK «Uschod-Ahra». Samo SVK tady nastojvała, što nie viedała, što na poli pracujuć dzieci, nie dapuskała ich da pracy. A pradstaŭniki śfiery adukacyi tłumačyli, što vučni na poli nie pracavali, a «vychoŭvalisia», zhodna z zaćvierdžanym u škole płanam. I sud pieršaj instancyi pryniaŭ hetyja arhumienty.

Ale z hetym nie pahadzilisia prakuratura i rodnyja dziaŭčynki. Prakuratura paličyła, što sud nie ŭličyŭ usie fakty, paćvierdžanyja «dakładnymi i dastatkovymi dokazami». A inśpiektary prafsajuza REP dapamahli baćku školnicy Alehu Papčeni skłaści svaju kasacyjnuju skarhu ŭ Minski abłasny sud na papiaredniaje rašeńnie.

Pa słovach pradstaŭnika istca, pravavoha inśpiektara Leanida Sudalenki, choć sud raniej daručyŭ pravieści śpiecrasśledavańnie incydentu adździełu adukacyi Maładziečanskaha rajvykankama (na dziejańni jakoha, ułasna, i byli narakańni), ab vynikach ničoha nie čuvać da hetaha času.

Paśla pasiadžeńnia Sudalenka taksama dadaŭ, što siońniašniaje rašeńnie suda «stvaraje niebiaśpiečny precedent» u vykarystańni dziciačaj pracy. Choć, pa słovach pravavoha inśpiektara REP Andreja Stryžaka, Ministerstva adukacyi «ŭśviedamlaje niebiaśpieku i niedapuščalnaść padobnaj praktyki», — bo jašče za niekalki miesiacaŭ da trahiedyi jano rassyłała list pa respublicy ab zabaronie pryciahnieńnia vučniaŭ da sielhasrabot.

Nahadajem, u kancy śniežnia sud Maładziečanskaha rajona vynies prysud kiroŭcu hruzavika: 22-hadovamu Paŭłu Cybinu. Jamu dali 3 hady abmiežavańnia voli ŭ papraŭčaj ustanovie adkrytaha typu. Na dumku boku abvinavačvańnia, jon moh ubačyć dziaŭčynku ŭ lusterka zadniaha vidu, ale pačaŭ ruchacca zadnim chodam i byŭ niaŭvažlivy. Baćki školnicy nie patrabavali ŭ kiroŭcy kampiensacyi maralnaha i materyjalnaha ŭronu.

• 0
• 0
• 0
• 0
• 0
• 0
• 0
• 0