Źbityja na Dzień Voli: Mikołu Dziadka z aŭtobusa «vynosili nahami»
Mikoła Dziadok trapiŭ u špital paśla akcyi 25 sakavika, jaho achoŭvajuć čatyry milicyjanty.
Anarchisty ŭ svajoj supołcy ŭ sacsietkach raspaviali padrabiaznaści svajho zatrymańnia 25 sakavika. Na praśpiekcie Niezaležnaści aktyvisty dastali baner i ściahi i niejki čas prajšli ź imi ŭ składzie nievialikaj hrupy ludziej. Ale vielmi chutka padjechaŭ aŭtobus ź siłavikami, anarchisty stali, sčapiŭšysia rukami, i sprabavali supraćstajać zatrymańniu. Ludziej pakidali ŭ aŭtobus, bili ich i navat stanavilisia na hałavu.
Mikoła Dziadok (były palitviazień, anarchist) pasprabavaŭ supraciŭlacca, jak vynik vidavočcy kažuć, što z aŭtobusa jaho prosta «vynosili nahami». Chłopiec apynuŭsia ŭ Partyzanskim RUUS, adnak na nastupny dzień jaho znajšli ŭ špitali z čerapna-mazhavoj traŭmaj u supravadžeńni kanvoju.
Rodnyja tolki siońnia zmahli pieradać synu nieabchodnyja srodki hihijeny i bializnu.
«My daviedalisia, što Mikoła ŭ špitali, i pasprabavali ŭviečary prarvacca ŭ pałatu da syna, ale milicyjanty pavodzili siabie ahresiŭna. Kryčali na nas i zahadvali «sychodzić», bo nam nielha znachodzicca pobač ź im. Siońnia ŭžo pavodzili siabie bolš adekvatna i dazvolili pieradać rečy i troški pahutaryć. Praŭda, jak tam pahutaryš, kali ŭ pałacie adrazu čatyry aficery milicyi ź Mikołam i słuchajuć usio?!» — raspavioŭ Alaksandr Dziadok, baćka Mikoły.
U Mikoły Dziadka vyjavili čerapna-mazhavuju traŭmu lohkaj stupieni, paškodžańni miakkich tkanak, u jaho padbitaje voka. Ciapier aktyvist prachodzić abśledavańnie ŭ špitali chutkaj dapamohi na vulicy Kižavatava. Pavodle daktaroŭ, Dziadka pratrymajuć u pałacie prykładna da čaćviarha.
Aktyvista čakaje administratyŭnaje raźbiralnictva. Na chłopca byli składzienyja dva administratyŭnyja pratakoły za ŭdzieł u «niesankcyjanavanym mierapryjemstvie» i «niepadparadkavańnie supracoŭnikam milicyi».
Ciapier čytajuć
U Poznani hiniekołah vydaliŭ 24‑hadovaj biełaruscy matku i jaječniki bieź jaje zhody. Jamu pahražaje da 20 hadoŭ turmy11
Kamientary