«Racyja»: z-za miažy na FM
Mikoła Markievič planuje, što z vosieni «Racyja» budzie dabivać da Bieraścia, Horadni, Vaŭkavysku i Ašmianaŭ.
Radyjo «Racyja» moža ŭvajści ŭ historyju ajčynnaha radyjoviaščańnia jak pieršaja stancyja, jakaja viaščaje na biełaruski FM z-za miažy. Start zaplanavany na pačatak vosieni.
«Vy słuchajecie Radyjo Racyja – volnaje radyjo, jakoje robiać biełarusy dla biełarusaŭ z volnaha śvietu», – z hetych słovaŭ pačynajecca štodnia viaščańnie biełaruskaj radyjostancyi, nievialičkaja redakcyja jakoj mieścicca ŭ Biełastoku.
Užo niekalki tydniaŭ, jak Racyja vyjšła ŭ tamtejšy FM-eter, i try miesiacy, jak radyjo viaščaje na siarednich chvalach. «Pakul heta ścipły pačatak», – kaža prahramny dyrektar Racyi Mikoła Markievič. Siońnia viaščańnie radyjostancyi achoplivaje Biełastok, ale nie daciahvaje da Haradku, Bielsku, Hajnaŭki dy inšych miescaŭ, dzie žyvie niamała biełarusaŭ. U červieni da adzinaha pakul pieradatčyka 0,1 kVt maje dadacca jašče adzin ź Vilni mahutnaściu ŭ 30 kVt.
«Racyju» ŭ biełaruskim «efemie» pačujuć na pačatku vosieni. «My chočam, kab biełaruskaja častata była absalutna lehalnaj, tamu davodzicca vyrašać niamała jurydyčnych prablemaŭ», – apaviadaje M.Markievič. Planujecca, što z vosieni «Racyja» budzie dabivać da Bieraścia, Horadni, Vaŭkavysku i Ašmiany.
Były redaktar hazetaŭ «Pahonia» i «Dień» zaniaŭsia radyjo nia tolki praź cikavaść. Paśla zakryćcia «Dnia» jon zrazumieŭ, što ŭ Biełarusi žurnalistykaj jamu zajmacca nie daduć.
Novy-stary brend
Vypuskny redaktar «Racyi» Jania Kamienskaja była zvolniena z radyjo «Junistar», paśla taho jak u navinach skazała, što na adno z aficyjnych pasiedžańniaŭ z udziełam prezydenta nie puścili žurnalistaŭ niedziaržaŭnych medyjaŭ. Asabista rektar BDU Alaksandar Kazulin tady skazaŭ, što takim žurnalistam nia miesca na radyjostancyi ŭniversytetu. Jana kryŭdy nie trymaje i zadavolena novaj pracaj: «Ja lublu radyjo i nie lublu, kali mianie cenzurujuć. Na «Racyi» ja na svaim miescy».
Na «Racyi» časta hučać hałasy biełaruskich palitykaŭ, aktyvistaŭ, paetaŭ i muzykaŭ. Samy haračy čas u redakcyi na vulicy Ciopłaj – z 12.00 da 16.00, kali źbirajucca, zapisvajucca i mantažujucca karespandencyi. A 17-j naviny hučać u etery. Na 70% jany składajucca z paviedamleńniaŭ z rehijonaŭ ad ułasnych karespandentaŭ. «My aktyŭna šukajem karespandentaŭ u abłasnych centrach i małych haradach», – apaviadaje Mikoła Markievič.
Uvaha da rehijonaŭ – adna z pryčynaŭ, ź jakoj Mikoła nia ličyć novuju radyjostancyju pierajemnicaj staroj «Racyi». Jon naahuł chacieŭ, kab siońniašniaja «Racyja» zajmieła novy nazoŭ – «Pahonia», ale dla biełastockaha kiraŭnictva važna było pakinuć užo viadomy brend. Z nazvaj «Radyjo «Racyja» asacyjujecca niezaležny biełaruski eter na Biełastoččynie. «Racyja davała mažlivaść našym ludziam z Rybałaŭ, Haradka, Bielsku zamović svaju muzyku, pačuć biełaruskaje słova», – kaža žurnalist Michaś Andrasiuk.
75% biełaruskaj muzyki
Bolšuju častku viaščańnia «Racyi» zajmaje muzyka dy zabaŭlalnyja aŭtarskija prahramy. Muzyčny farmat unikalny – heta kaktejl z ułasnabiełaruskaj, padlaskaj biełaruskamoŭnaj, polskaj i zamiežnaj muzyki. Asnovu składajuć tvory niezaležnych biełaruskich muzykaŭ – ad rarytetnych zapisaŭ «Pieśniaroŭ» da apošnich pop-hitoŭ. Muzyčnym redaktaram na «Racyi» pracuje Łukaš «Step» Stepaniuk – muzyka, dy-džej, stvaralnik adzinaha polskamoŭnaha muzyčnaha partału pra biełaruskuju muzyku «Zona».
Słuchačy ŭ «Racyi» źjavilisia adrazu, kali radyjo jašče pracavała ŭ testavym režymie. Adzin ź ich dasłaŭ list ź ciopłymi słovami dy ŭkłaŭ razam ź im adzin dalar. Toje, što radyjo słuchajuć na siarednich chvalach, paćviardžajuć taksama listy z Mazyra, Homiela i Horadni, a taksama… z bałtyjskich krainaŭ i Skandynavii. U červieni Internet-karystalniki atrymajuć mahčymaści słuchać «Racyju» on-łajn. Ciapier raspracoŭvajecca kancepcyja sajtu i paradkuvajecca archiŭ.
Siarhiej Budkin, Biełastok–Miensk
Radyjo Racyja viaščaje štodnia:
Biełastok (105,5 FM) – štosutki;
Vilenščyna (103,8 FM) – 20.00–20.30;
Na siarednich chvalach (1080 kHc) – 20.00–22.00.
Na radyjo «Racyja» siońnia vychodzić 7 aŭtarskich prahramaŭ:
«Kantekst» z Paŭlukom Bykoŭskim – refleksii z nahody padziejaŭ tydnia;
«Hramadzianskaja supolnaść» Michasia Andrasiuka i Vali Łajeŭskaj – prahrama, jakaja znajomić biełarusaŭ z palitykaj dy ekanomikaj Polščy;
«Biełaruski śled u historyi» z Aleham Hardzijenkam;
«Radyjo-Hit» z Aleham Chamienkam – supolny prajekt «Racyi» i Internet-partału «Tuzin Hitoŭ»;
«Zala Słavy» ź Mikołam Biańkom – prahrama, pryśviečanaja hierojam ajčynnaha rok-n-rołu;
«Hołas z pavucińnia» z Andrejem Žukom – apošnija naviny ź virtualnaj prastory;
«Rymejk na dyvanie» z Andrejem Žukom – muzyčnaja prahrama
Kamientary