Minčanka źviarnułasia ŭ Pieršamajskaje RUUS stalicy z zajavaj ab tym, što ź jaje bankaŭskaj płaciežnaj kartki, jakuju jana zhubiła ŭ kramie, adbyŭsia kradziež hrašovych srodkaŭ. Pra heta paviedamlaje pres-słužba HUUS Minharvykankama.
Žančyna rabiła pakupki ŭ kramie pa vulicy Suviazistaŭ u Minsku. Raźličyŭšysia svajoj bankaŭskaj kartkaj, nie zaŭvažyła, što vypuściła jaje z ruk kala kasy i pajšła dadomu. Vyjaviŭšy na nastupny dzień prapažu, žančyna źviarnułasia da supracoŭnikaŭ kramy. Kartka sapraŭdy była zhublenaja ŭ kramie i, paśla śviedčańnia asoby, była viernutaja zakonnaj uładalnicy, tolki na bałansie nie chapała bolš za 300 rubloŭ.
U chodzie praviadzieńnia apieratyŭna-vyšukovych mierapryjemstvaŭ supracoŭnikam hrupy pa raskryćci złačynstvaŭ u śfiery vysokich technałohij udałosia vyśvietlić, što kradziež hrašovych srodkaŭ z bankaŭskaj kartki ździejśniŭ achoŭnik kramy, jakomu pieradali kartku na zachoŭvańnie. Hrašovyja srodki byli śpisanyja ź jaje pry apłacie tavaraŭ na sajcie AliJexpress, bo pry afarmleńni tam pakupki nie patrabujecca ŭvod PIN-koda i dastatkova danych, jakija majucca na adnym baku karty, jakija achoŭnik kramy i pierapisaŭ.
Dziejańni mužčyny kvalifikujucca pa č. 1 art. 212 KK RB (Kradziež šlacham vykarystańnia kampjutarnaj techniki). Sankcyja dadzienaj častki artykuła praduhledžvaje pakarańnie ŭ vyhladzie pazbaŭleńnia voli da 3-ch hadoŭ.
Kamientary