Skulptara Bohdana i jaho žonku, imavierna, zabiŭ unuk, u jakoha jany znajšli elektronnuju cyharetu

Žachlivaje dvajnoje zabojstva adbyłosia ŭ Słonimie. Achviary — skulptar Leanid Bohdan i jaho žonka.

Pavialičyć

Upraŭleńnie ŭnutranych spraŭ Hrodzienskaha abłvykankama paviedamiła detali trahiedyi.

Padazravanym pa spravie prachodzić 17-hadovy ŭnuk skulptura. Jon žyŭ z 61-hadovaj babulaj i 64-hadovym dziadulem, pakolki ŭ maci druhaja siamja ŭ Abjadnanych Arabskich Emiratach, a baćka ŭ Minsku zajmajecca biznesam.

Prablem z hrašyma ŭ siamji nie było, junak vučycca ź siarednim bałam «7» u himnazii.

Pa słovach zatrymanaha padletka, trahiedyja razhulałasia kala apoŭnačy, kali piensijaniery ŭbačyli ŭ jaho elektronnuju cyharetu. Svajaki nie zrazumieli, što heta za pryłada, dumajučy, što jana źviazany z narkotykami. Takaja viersija aburyła ŭnuka, jon schapiŭ nož dy mietaličny šuflik i hetymi pradmietami zabiŭ babulu i surjozna paraniŭ dziadulu. Skulptar prasiŭ vyklikać chutkuju, ale junak adpraviŭsia ŭ haraž, uziaŭ tam siakieru i dabiŭ joj dziadulu. Paźniej vopratku i siakieru jon vykinuŭ u bałacinu na race Ščara.

Dalej junak nakiravaŭsia ŭ Śviata-Trajecki sabor i paviedamiŭ śviataru, što ŭ chatu nibyta ŭvarvalisia rabaŭniki ŭ maskach i ździejśnili zabojstva. Supracoŭniki milicyi vyznačyli, što nijakich rabaŭnikoŭ nie było, a zabiŭ piensijanieraŭ ich ułasny ŭnuk. Na dadzieny momant jon zatrymany, kryminalnaja sprava zaviedzienaja pa artykule «Zabojstva».

Niepaŭnaletniamu pahražaje da 15 hadoŭ źniavoleńnia.

* * *

Leanid Bohdan — talenavity biełaruski skulptar. Jon nie lez u vialikija mastaki, žyŭ u rodnym horadzie, tut pabudavaŭ sabie dom, majsterniu, dzie i pracavaŭ. Heta byŭ adzin z kulturnych, aŭtarytetnych i intelihientnych słonimcaŭ, piša radyjo «Racyja».

Jon naradziŭsia ŭ horadzie nad Ščaraj 64 hady tamu nazad. Ščyra lubiŭ svoj rodny horad i nikudy adsiul nie vyjazdžaŭ. Rodnamu horadu i ludziam jon biaspłatna daryŭ svaje pracy. Siarod ich byli biusty znakamitych ziemlakoŭ, vyjavy Hražyny Adama Mickieviča, Francyska Skaryny, paetaŭ Anatola Iviersa, Valancina Taŭłaja, Aleha Łojki, biust Michała Kazimira Ahinskaha i inšych vialikich ludziej.

Bohdan vykanaŭ z hranitu miemaryjalnuju došku, pryśviečanuju zasnavalniku Słonimskaha krajaznaŭčaha muzieja Jazepu Stabroŭskamu, jakaja ciapier znachodzicca na budynku muzieja. Zrabiŭ miemaryjalnuju šyldu, pryśviečanuju Michału Kazimiru Ahinskamu i prymacavaŭ jaje na budynku teatra. Apošniaja jaho praca — miemaryjalny kamień, ustanoŭleny na tym miescy, dzie było ŭ Słonimie zamčyšča.

• 0
• 0
• 0
• 0
• 0
• 0
• 0
• 0