Rok-hurt Eagles padaŭ u sud na mieksikanski hatel «Kalifornija», čyja nazva adsyłaje da pieśni i alboma hurta Hotel California.
Haścinica ŭ pasiołku Todas-Santas u štacie Paŭdniovaja Nižniaja Kalifornija ŭvodzić naviedvalnikaŭ u zman i ekspłuatuje svaju ŭjaŭnuju suviaź z muzykami dla prybytku, śćviardžajuć pazoŭniki. Pavodle ich infarmacyi, u chole 11-paviarchovaha hatela hrajuć pieśni Eagles i pradajucca tematyčnyja futbołki.
Eagles prosiać sud Łos-Andželesa zabaranić haścinicy nazyvacca «Kalifornijaj» i paviedamlać pra jakija-niebudź suviazi z tvorčaściu kalektyvu.
Hotel California źjaŭlajecca «imavierna, samaj viadomaj pieśniaj hrupy i ŭ mnohich adnosinach uvasablaje» jaje «samuju sutnaść», havorycca ŭ pazovie.
Hatel «Kalifornija» u Todas-Santas adkryŭsia ŭ 1950 hodzie — za čverć stahodździa da vychadu adnajmiennych alboma i sinhła Eagles. Z tych časoŭ jon źmianiŭ niekalki nazvaŭ.
U 2001 hodzie ŭstanovu kupiła siamiejnaja para z Kanady i, jak śćviardžajuć Eagles, pačała vykarystoŭvać jaho histaryčnaje najmieńnie ŭ markietynhavych metach.
«Pa lehiendzie, haścinica dała nazvu viadomaj pieśni», — paviedamlaje sajt daviednika Lonely Planet.
Tym časam aŭtary chita kažuć, što jaje tekst nie adsyłaje da nijakaha peŭnaha miesca. Vokładka alboma Hotel California jość fatahrafijaj realna isnujučaha kalifarnijskaha hatela «Bevierli-Chiłz».
Kadr byŭ vykarystany hrupaj biez dazvołu. Eagles znachodzilisia pad pahrozaj sudovaha razboru, pakul nie vyśvietliłasia, što kolkaść braniravańniaŭ u «Bevierli-Chiłz» patroiłasia paśla pośpiechu alboma.
Dva sinhły z płaścinki — ułasna Hotel California i New Kid in Town — zaniali pieršyja radki ŭ amierykanskich i kanadskich čartach paśla jaje vychadu ŭ 1976 hodzie
U čym pryčyna niezadavolenaści žycharoŭ mikrarajona Lebiadziny ŭ Minsku? Voś što nasamreč tam płanavali budavać6
Kamientary