Parašenka: Ja viedaŭ i lubiŭ Šaramieta i nie zadavoleny vynikami rasśledavańnia zabojstva
Prezident Ukrainy Piatro Parašenka zajaŭlaje, što zaŭtra, 15 traŭnia, u spravie pra zabojstva žurnalista Paŭła Šaramieta dapytajuć byłoha supracoŭnika Słužby biaśpieki Ukrainy Ihara Usicimienku, na mahčymuju datyčnaść jakoha ŭkazvaje niezaležnaje rasśledavańnie, zroblenaje žurnalistami prajektu «Ślidstvo.Info» razam z pradstaŭnikami mižnarodnaj sietki OCCRP.
«Raśśledavańnie, jakoje viadzie Nacyjanalnaja palicyja i Słužba biaśpieki Ŭkrainy, budzie maksymalna adkrytym dla praviadzieńnia lubych śledčych dziejańniaŭ. Mianie prainfarmavali, što ŭ paniadziełak spadar Uścimienka vyklikany na dopyt i budzie dapytany. Toje, što možna budzie viedać srodkam masavaj infarmacyi, ja ŭpeŭnieny, što vy pavinny viedać», — paviedamiŭ Piatro Parašennka siońnia na presavaj kanferencyi ŭ Kijevie.
Takim čynam, prezydent Ukrainy adreahavaŭ na toje, što niekatoryja žurnalisty pryjšli na presavuju kanferencyju u futbołkach z nadpisam «Chto zabiŭ Paŭła?».
«Ja viedaŭ i lubiŭ Paŭła. Možna skazać, što my ź im siabravali. Dla mianie, jak i dla bolšaści z vas, była šokam taja terarystyčnaja ataka, cyničnaje zabojstva, što adbyłosia», — skazaŭ jon.
Piatro Parašenka skazaŭ, što niekalki tydniaŭ tamu sustrakaŭsia z maci i dačkoj Paŭła Šaramieta i raspaviadaŭ im pra chadu raśśledavańnia
Ukrainski prezydent nahadaŭ, što adrazu paśla zabojstva źviarnuŭsia pa dapamohu da zamiežnych specyjalistaŭ. «Na žal, ja čakaŭ bolšaha i lepšaha vyniku i nie zadavoleny, što da hetaha času ŭ nas niama zabojcy i jon nie pryciahnuty da adkaznaści», — padkreśliŭ jon.
«Ja chacieŭ by padziakavać žurnalistam, jakija praviali svajo raśśledavańnie. Adrazu paśla hetaha patelefanavaŭ kiraŭniku Nacyjanalnaj palicyi i paprasiŭ, kab jon sustreŭsia z žurnalistami. Nakolki mnie viadoma, sustreča adbyłasia. Staršynia SBU dałažyŭ mnie, što spadar Uścimienka, jaki byŭ zhadany, zvolniŭsia z SBU ŭ krasaviku 2014 hodu razam z 2 tysiačami inšych supracoŭnikaŭ Słužby biaśpieki paśla Revalucyi hodnaści», — skazaŭ ukrainski prezydent.
«My pavinny abjadnać namahańni, kab raśśledavańnie było maksymalna prazrystaje i maksymalna efektyŭnaje. Ličycie, što na siońniašni dzień ja razam z vami ŭ hetaj samaj futbołcy», — dadaŭ Piatro Parašenka.
Kamientary