Dla raspracoŭki novaj kancepcyi dekreta №3 stvaryli pracoŭnuju hrupu

Dla raspracoŭki novaj kancepcyi dekreta № 3 stvaryli śpiecyjalnuju mižviedamasnuju pracoŭnuju hrupu, u jakuju ŭklučyli kiraŭnikoŭ mnohich viedamstvaŭ, a taksama navukoŭcaŭ. Kiruje hrupaj namieśnik premjer-ministra Vasil Žarko. Prajekt źmianieńniaŭ u dekret płanujuć pradstavić na razhlad Alaksandru Łukašenku ŭ pačatku červienia, paviedamili FINANCE.TUT.BY u Saŭminie.

Pavialičyć

Nahadajem, Łukašenka padčas zvarotu z pasłańniem da naroda i deputataŭ vykazaŭsia z nahody našumiełaha dekreta №3. Jon prapanavaŭ parłamientaryjam pradumać takuju kancepcyju, jakaja prymusić pracavać pierš za ŭsio 350 tysiač čałaviek, jakija niekankurentnyja na rynku pracy i «nie chočuć pracavać». «Što budziem ź imi rabić? Kali vy prapanujecie alternatyvu, jak prymusić ich pracavać, ja adstuplusia», — zajaviŭ jon.

Litaralna za dva dni da hetaha — 19 krasavika — premjer-ministr Biełarusi Andrej Kabiakoŭ padpisaŭ rasparadžeńnie ab stvareńni mižviedamasnaj rabočaj hrupy dla raspracoŭki novaj kancepcyi dekreta № 3 pad staršynstvam Vasila Žarko. U jaje trapili amal try dziasiatki čałaviek, u tym liku mnohija ministry — pracy i sacyjalnaj abarony Iryna Kaścievič, finansaŭ Uładzimir Amaryn, ekanomiki Uładzimir Zinoŭski, adukacyi Ihar Karpienka, achovy zdaroŭja Valeryj Małaška, pa padatkach i zborach Siarhiej Nalivajka, suviazi i infarmatyzacyi Siarhiej Papkoŭ, transpartu i kamunikacyj Anatol Sivak, žyllova-kamunalnaj haspadarki Alaksandr Cierachaŭ.

U hrupu taksama ŭklučyli namieśnika staršyni Savieta Respubliki Maryjanu Ščotkinu, deputataŭ — Tamaru Krasoŭskuju i Balasłava Pirštuka, namieśnika staršyni Minabłvykankama Viktara Sirenku, namieśnika dyrektara PVT pa markietynhu i raźvićci Alaksandra Marcinkieviča, dyrektara Instytuta ekanomiki NAN Biełarusi Valeryja Bielskaha i inšych.

— Praciahvajecca praca nad vypracoŭkaj źmianieńniaŭ u dekret №3, u pačatku červienia, jak płanujecca, ich nakirujuć na razhlad kiraŭniku dziaržavy, — paviedamili ŭ Saŭminie. — Pasiadžeńni rabočaj hrupy prachodziać pa miery nieabchodnaści.

Udzielniki hrupy nie afišujuć, jakija varyjanty źmianieńniaŭ u dekret jany razhladajuć.

— Viadziecca praca. Abmiarkoŭvajecca praktyka realizacyi dekreta, uličvajucca ŭsie prablemnyja momanty, kab vypracavać niejkija novyja padychody, unieści prapanovy kiraŭniku dziaržavy, — adznačyła dyrektar centra daśledavańniaŭ dziaržaŭnaha kiravańnia Akademii kiravańnia pry prezidencie Iryna Sidarčuk.

Pa jaje słovach, zadača hrupy — «praanalizavać plusy i minusy dekreta, dla hetaha ŭličvajucca i hramadskaje mierkavańnie, i publikacyi ŭ ŚMI, i mierkavańnie dziaržsłužačych».

— Dekret byŭ i budzie, abmiarkoŭvajucca varyjanty, jak jaho ŭdaskanalić. U pasłańni prezident skazaŭ ab tym, jak prymusić pracavać tych, chto nie choča pracavać. Siońnia tolki pra hetych ludziej idzie havorka. Ale jašče rana pra niešta kazać, pakul usio ŭ pracy, my staranna pracujem, — udakładniła deputat Tamara Krasoŭskaja.

Dyrektar Instytuta ekanomiki NAN Biełarusi Valeryj Bielski taksama nie staŭ kankretyzavać, jakija varyjanty źmianieńniaŭ hrupa razhladaje, ale paviedamiŭ, što ŭ bližejšy čas pavinny stać viadomyja pramiežkavyja vyniki. Nahadajem, raniej Valeryj Bielski raspaviadaŭ, što «Instytut ekanomiki ŭ adpaviednaści z daručeńniami prezidenta razhledzieŭ mnostva stratehij, jakija dapamahli b papoŭnić i vykarystoŭvać fondy hramadskaha spažyvańnia: ad udaskanaleńnia sistemy padatkaabkładańnia z pavieličeńniem padatkovaj nahruzki na spažyvańnie i dyfierencyjacyjaj padatku na dachody (za košt rostu vylikaŭ dla nizkaapłatnych supracoŭnikaŭ) i tak zvanaha siamiejnaha padatkaabkładańnia — da ŭkaranieńnia dyfierencyravanaj apłaty pasłuh z ulikam suśvietnaha dośviedu».

• 0
• 0
• 0
• 0
• 0
• 0
• 0
• 0