Nacyjanalnaje ŭpraŭleńnie ZŠA pa aeranaŭtycy i daśledavańni kaśmičnaj prastory (NASA) zajaviła pra namier zapuścić zond, jaki pahruzicca ŭ atmaśfieru Sonca. Pra heta paviedamlajuć infarmahienctvy sa spasyłkaj na sajt upraŭleńnia.
Metaj misii, nazvanaj Solar Probe Plus, budzie zbor danych ab soniečnaj aktyŭnaści. Heta, imavierna, dapamoža ludziam pradkazvać uspyški i mahnitnyja bury, jakija ŭźnikajuć na Ziamli.
Aparat, jaki «pamacaje» Sonca, budzie zapuščany ŭ žniŭni 2018 hoda. Na praciahu siami hadoŭ zond budzie karektavać svaju trajektoryju, vykarystoŭvajučy dla hetaha hravitacyjnaje pole Vieniery, pobač ź jakoj jon projdzie siem razoŭ. Paśla hetaha jon nablizicca da Sonca na minimalnuju adlehłaść — šeść miljonaŭ kiłamietraŭ.
Zond pavinien budzie vytrymać tempieraturu 1400 hradusaŭ Celsija. Dla hetaha inžyniery praduhledzieli ciepłaachoŭny ekran taŭščynioj 11,5 sm, zrobleny z kampazitnaha materyjału z vuhlarodnym vałaknom. Akramia taho, aparat budzie abstalavany sistemaj cyrkulacyi vady dla pamianšeńnia ŭździejańnia soniečnaha vypramieńvańnia na prybory.
U 1976 hodzie zond «Hielijas-2» prajšoŭ nad soniečnaj fotaśfieraj na adlehłaści 43 miljona kiłamietraŭ. Jon byŭ zapuščany ŭ ramkach misii, metaj jakoj było daśledavańnie soniečnaha vietru i kaśmičnych pramianioŭ.
Kamientary