Zachad pačaŭ dziejničać

Polšča i ZŠA padpisali papiaredniaje pahadnieńnie ab raźmiaščeńni systemy PRA. Estonija atrymała puskavyja ŭstanoŭki francuskaj systemy SPA. Ukraina ŭvodzić abmiežavańni dla dziejnaści Čarnamorskaha fłotu.

Paśla pieršaha šoku, vyklikanaha ŭžyćciom Rasiejaj vajennaj siły na terytoryi suverennaj dziaržavy, krainy eŭraatlantyčnaj supolnaści pierajšli ad słovaŭ da kankretnych dziejańniaŭ.

Uranku ŭ Tbilisi prybyŭ pieršy vajskova-transpartny samalot ZŠA z hruzam dapamohi. Papiarednie ZŠA dapamahli ŭ adnaŭleńni radaraŭ, razbomblenych rasiejskaj avijacyjaj.

A ŭviečary stała viadoma, što ŭ Hruziju prybyła hrupa estonskich achvotnikaŭ. Jak było zajaŭlena, jany hatovyja ŭziać udzieł u abaronie suverenitetu krainy.

Estonski bajavy adździeł budzie nasić hruzinskuju vajskovuju formu.

U Tbilisi maje prybyć dziaržsakratarka ZŠA Kandaliza Rajs. Pa darozie jana sustrełasia z prezydentam Francyi Nikala Sarkazi, a adrazu paśla pieramovaŭ skirujecca ŭ Kroŭfard, Techas, dzie na ranča Buša adbudziecca nadzvyčajnaje pasiedžańnie Rady nacyjanalnaj biaśpieki ZŠA pa pytańni sytuacyi vakoł Hruzii.

U subotu ŭ Tbilisi prylacić Anhieła Merkiel.

Paśla pasiedžańnia Rady biaśpieki Armienii stała viadoma, što kraina časova ŭviadzie biaźvizavy režym dla tranzytu hramadzianaŭ krainaŭ Eŭrasajuzu. Heta krytyčna važna va ŭmovach blakady marskich i pavietranych znosinaŭ Hruzii. Najbližejšym dziejnym aeraportam akazvajecca erevanski Zvartnoc.

Siońnia ž Polšča i ZŠA padpisali pahadnieńnie pa supraćpavietranaj abaronie. «Jano ŭłučaje harantyi vajennaje supracy z boku ZŠA u vypadku napadu na Polšču treciaj krainy», — zajaŭlajuć krynicy ŭ polskim uradzie. U pryvatnaści, Polšča atrymaje 96 procirakietaŭ «Petryjot».

Tak supała, što siońnia ž u Estoniju prybyła pieršaja čarha systemy supraćpavietranaj abarony Mistral. Francuskaja systema składajecca z radaraŭ Giraffe AMB, punktaŭ kiravańnia, rakietnych ustanovak, rakietaŭ Mistral. Dakładny košt uhody zasakrečany, ale havorka idzie pra sotni miljonaŭ dalaraŭ.

Krajniuju zaniepakojenaść raźvićciom padziejaŭ na Kaŭkazie vykazvaje Ŭkraina. Prezydent krainy Viktar Juščanka vydaŭ ukaz, zhodna ź jakim karabli Čarnamorskaha fłotu Rasiei, što bazujucca ŭ Sievastopali, majuć prava pakidać bazu tolki pastaviŭšy ŭkrainskija Ŭzbrojenyja siły ŭ viadomaść pra heta za try dni. Pradstaŭniki Rasiei zajavili, što nia buduć vykonvać takoje normy. U svaju čarhu načalnik Hienštabu ŭkrainskaje armii zajaviŭ, što Ŭzbrojenyja siły krainy hatovyja zabiaśpiečyć vykanańnie ŭkazu prezydenta.

• 0
• 0
• 0
• 0
• 0
• 0
• 0
• 0