Śviatłana Zielankoŭskaja syšła z Kupałaŭskaha teatra
«Na Kupalle raźvitvajusia sa svaim Kupałaŭskim teatram», — napisała Śviatłana Zielankoŭskaja ŭčora ŭ fejsbuku. Aktorka, viadomaja ź filmu «Anastasija Słuckaja», žonka Siarhieja Michałka, raspaviała Svabodzie pra akaličnaści sychodu z Kupałaŭskaha.
— Skažycie, kali łaska, čamu vy vyrašyli syści z teatru?
— Ja prosta bolš času pravodžu va Ŭkrainie, i pa zakonie nia maju prava pracavać u teatry, kali znachodžusia za miažoj. U nas zaraz žorstkija zakony.
Praŭda, ja čatyry hady ŭžo ničoha nia hrała. Ja była ŭ dekrecie. Tak supała prosta. U mianie zaraz šmat zdymak u kino va Ŭkrainie.
Karaciej, treba tady iści ŭ biełaruski teatar i zajmacca teatram. Ale tady ja pazbaŭlusia pražyvańnia va Ŭkrainie i zdymkaŭ va Ŭkrainie, jakich u nas šmat.
— Kupalskuju noč vy admysłova vybrali, kab zajavić pra vaš sychod z Kupałaŭskaha teatru?
— Nie, tak supała. Moža ŭ hetym jość niejkaja mistyka. Jak na Kupalle praz vohnišča skočuć, tak i ja skoknuła i ad teatru ŭ kino, ź Biełarusi — va Ŭkrainu.
— Pakul teatram vy zajmacca nia budziecie?
— Pahladžu pa abstavinach. Raz u mianie vyzvaliłasia teatralnaja niša, moža, niešta znajdu ŭ Kijevie, va Ŭkrainie.
— Ale ŭ Biełarusi dakładna pracavać nia budziecie?
— Pakul nie. Jość razmova, što budu pryjaždžać na adzin spektakl pa pracoŭnaj damovie. Nia ŭ jakaści štatnaha supracoŭnika, a jak zaprošanaja aktorka. Heta budzie Kupałaŭski teatar. Adzinaja rola, jakaja mnie bolš-mienš cikavaja — rola Franki ŭ spektakli «Cham». Ale pakul ja nia ŭpeŭnienaja ŭ hetym. Heta prosta dumki.
U masavaj śviadomaści vy zapomnilisia rolaj u filmie «Anastasija Słuckaja». Taksama ŭ fejsbuku vy paznačyli, što vykanali 17 rolaŭ u Kupałaŭskim teatry. Z čym vy siabie bolš asacyjujecie?
— Ja by nie padzialała. Ja 20 hadoŭ pracavała ŭ teatry. Try apošnija hady — u kino. Nia budu ja heta padzialać. Mnie chočacca, kab u mianie zastałasia i teatralnaja praktyka, i kinošnaja. Budu sprabavać spałučać.
U svaim fejsbuku Śviatłana Zielankoŭskaja ŭčora pieraličyła ŭsie 17 rolaŭ, jakija jana vykonvała ŭ Nacyjanalnym akademičnym teatry imia Janki Kupały.
Łukašenka pieraabuŭsia: Pozna ŭviečary Minsk pahruzili ŭ ciemru. Navošta? Ja ž ad vas hetaha nie patrabavaŭ20
Kamientary