Zasnavalnik znakamitaha prafsajuza «Salidarnaść» i pieršy prezident postkamunistyčnaj Polščy Lech Valensa dałučyŭsia da pratestaŭ suprać skandalnaj sudovaj reformy, piša Dw.de.
«U 1989 hodzie my dali vam demakratyčnuju Polšču. Vy pavinny zmahacca za jaje — usimi mahčymymi srodkami», — zajaviŭ jon u subotu, 22 lipienia, na akcyi pratestu ŭ Hdańsku.
Valensa abvinavaciŭ pravakansiervatyŭny ŭrad u tym, što jon «prajhraŭ» demakratyčnyja zavajovy zmaharoŭ suprać kamunistyčnaha režymu. «Našamu pakaleńniu ŭdałosia nakiravać Polšču na pravilnuju darohu i damahčysia padziełu ŭładaŭ. Nielha dapuścić, kab zaraz usio heta było razburana», — zajaviŭ jon. U Hdańsku, jak i pa ŭsioj Polščy, u subotu prajšoŭ mitynh suprać sudovaj reformy.
U noč na subotu polski Sienat uchvaliŭ zakon ab rearhanizacyi Viarchoŭnaha suda hałasami 55 sienataraŭ pry 23 hałasach suprać i dvuch tych, chto ŭstrymaŭsia. Sojm uchvaliŭ hety zakon 20 lipienia.
Krytyki bačać u zakonie, jaki faktyčna stavić Viarchoŭny sud pad kantrol ŭrada i parłamienta, sprobu padarvać pryncyp padziełu ŭładaŭ i zamach na pravavuju dziaržavu. Zakon ustupić u siłu, kali jaho padpiša prezident Andžej Duda, na heta ŭ jaho jość 21 dzień.
Kamientary